СДСМ го повика министерот за внатрешни работи, Панче Тошковски да излезе пред јавноста, тврдејќи дека постои вистина што треба да ја каже за бегството на поранешниот вицепремиер Артан Груби, кој се бара со меѓународна потерница за проневера на 8 милиони евра во Државна лотарија.

Опозициската партија отворено се сомнева дека бегството на Груби не бил никаков пропуст, туку станува збор за, како што велат, добро оранизирана работа од страна на ВМРО-ДПМНЕ и ДУИ да се пушти Груби да избега, а на чело на целата операција, наводно, според тврдењата на Социјалдемократите, стоел Тошковски.

„Ако Тошковски не излезе во рок од 24 часа да ја каже вистината за случајот, тогаш СДСМ ќе го открие скандалот во целост“, велат од партијата преку допис до медиумите.

ВМРО-ДПМНЕ пак коментира дека опозициската партија не се оградува од Груби, туку гледа да го оправда и да го поистовети со тие кои го гонат.

Од партијата додаваат дека сите што го прекршиле законот ќе одговараат.

МВР вчера распиша меѓународна потерница по Груби и ексдиректорот на Лотарија, Бајазити кои се недостапни за органите на прогнот.

Вицепремиерот Арбен Фетаи, одржа воведно обраќање при презентирањето на Првото упатство за интегрирање на мерките против корупција во поглавјата и кластерите на преговорите со Европската унија.

Овој проект, поддржан од Владата на Шведска и имплементиран од страна на UNOPS, е важен чекор во напредокот на нашата реформска агенда.

Потпретседателот Фетаи истакна дека борбата против корупцијата е врвен стратешки приоритет за Владата на Северна Македонија, со фокус на зајакнување на механизмите за спречување и справување со неа на сите нивоа.

Преку ова упатство Владата има за цел: зајакнување на институционалните капацитети за идентификување и справување со ризиците од корупција; создавање на модел на набљудувачки центар за следење на случаите на корупција, базиран на најдобрите практики на земјите-членки на ЕУ; изградба на унифициран пристап на Владата и стандардизирани мерки кои ќе ги зајакнат транспарентноста, интегритетот и отчетноста.

Фетали вели дека овие чекори се од клучно значење за приближување на Северна Македонија до стандардите на ЕУ и за враќање на довербата на граѓаните во државните институции.

Тој им се заблагодари на владата на Шведска и на UNOPS за нивната постојана поддршка, како и на сите оние кои придонесуваат во овој трансформативен процес за гарантирање на европска иднина за нашата земја.

Директорот на Бирото за јавна безбедност при МВР Александар Јанев денеска ја проследи симулациската вежба што во организација на Одделението за превенција на СВР Скопје а во соработка со скопската Клиника за пластична и реконструктивна хирургија и Црвениот крст на РСМ на темата околу здравствените ризици од незаконската употреба на пиротехнички средства беше спроведена во центарот на Скопје на плоштадот „Македонија“ (во близина на „Порта Македонија“).

На вежбата на која што учествуваа и ученици од две скопски средни училишта – „Марија Склодовска Кири“ и „Владо Тасевски“ беа направени конкретни покази за сите здравствени ризици по оние што употребуваат приротехнички средства – пред се повреди на ектремитети (раце и нозе), повреди на глава и справувањето со истите.

Практично оваа активност е дел од континуираните превентивни активности на македонската полиција во различни сегметни од безбедноста и заштитата на сигурноста на граѓаните, што се одвиваат на подрачјата на сите осум Сектори за внатрешни работи при БЈБ на МВР.

Обраќајќи им се на средношколците учесници во показната вежба директорот Јанев истакна дека пиротехниката ниту била ниту може да биде средство за забава или прослава, особено не за децата и младите, притоа посочувајќи ја точноста и секако важноста на пораката што средношколците ја упатија преку пригодно отпечатените плакати: „Стоп за петардите – опасни, штетни и ни малку „кул“!