Заменик-претседателката на СДСМ Радмила Шекеринска денес во Брисел учествуваше на состанокот на лидери на партии на Партијата на европски социјалисти.

,,И Владата и Европската комисија го споделуваат истото мислење – Северна Македонија донесе пресврт и дома и на Западен Балкан, направи круцијални, историски чекори напред и заслужи да ги почне преговорите за членство”, рече Шекеринска.

Таа истакна дека крајната цел за сите граѓани е земјата да функционира европски, да биде вистинска современа демократија и дека тој процес ќе биде брз и ефикасен единствено преку отворање и затворање на европските поглавја.

„Членството во Унијата е една од двете главни надворешно-политички цели на државата со децении. Државата припаѓа на обединета Европа, и културно и географски и според вредностите кои се втемелени во македонското општество. За нас нема друга опција освен полноправното членство во ЕУ и затоа сме фокусирани на тој пат“, рече Шекеринска.

На состанокот присуствуваа и новата финска премиерка Сана Марин, високиот претставник на ЕУ за надворешна и безбедносна политика Јозеп Борел, претседателот на Европскиот парламент Давид Сасоли, шведскиот премиер Стефан Лофвен, шпанскиот премиер и мандатар Педро Санчез, поранешните премиери на Грција Алексис Ципрас и на Бугарија, Сергеј Станишев.

Во кусиот разговор Шекеринска му честиташе на Борел за новата функција и рече дека очекува продолжување на соработката со нашата земја и почеток на преговори за членство. Во разговорот со премиерот и мандатар на Шпанија Санчез заменичката на претседателот на СДСМ ја истакна важноста од брзата ратификација на протоколот за НАТО од страна на неговата земја, на што премиерот и мандатар одговори дека Шпанија ќе стори сè да го заокружи навреме ратификацискиот процес.

Министерката за труд и социјална политика, Мила Царовска, и градоначалникот на Струмица, Коста Јаневски, денеска ја отворија новоизградената градинка во село Куклиш. Капацитетот на градинката е за 60 деца и е прва детска градинка во ова населено место.

„Министерството за труд и социјална политика и локалните самоуправи посветено работат на зголемување на капацитетите во детската заштита, а со тоа се инвестира во раниот детски развој и во иднината на нашата држава. За идната година во буџетот издвоивме 105 милиони денари за реконструкција, опремување и изградба на детски градини, а изминатите две и пол години инвестиравме над 180 милиони денари во вкупно 43 градинки”, рече Царовска.

Министерката истакна дека освен што се зголемуваат капацитетите се работи на јакнење на кадарот којшто се грижи и ги воспитува децата. Само за една година, додаде таа, платите на вработените во градинките се зголемени за 21%.

Премиерот Зоран Заев се сретна со Штефан Холтхоф-Пфорнер, германскиот покраински министер за федерални, европски и меѓународни прашања на Северна Рајна Вествалија.

„На средбата е пренесена силна поддршка од премиерот на покраината, Армин Лашет, и од Сојузна Република Германија, за придонесот на премиерот Заев во напредокот на Република Северна Македонија. Изразена е силна поддршка и за евро-атлантските перспективи на нашата држава, во коишто се гледа потреба како за нашата земја и за регионот, така и за самата Европа. Во таа насока, изразено е охрабрување, граѓаните и институциите во земјава да ја задржат проевропската ориентација“, соопштија од Владата.

Премиерот Заев се заблагодарил за големото и искрено пријателство од Северна Рајна Вествалија и од цела Сојузна Република Германија, од Бундестагот, од германскиот народ и посебно од германската канцеларка Ангела Меркел за помошта и придонесот на Германија во сите демократски процеси во нашата држава и во развојот на економијата.

„Ќе продолжиме да даваме аргументи за нови германски инвестиции во нашата земја. Дадовме аргументи на почитување и примена на европските вредности, како што е успешниот дијалог и функционалната дипломатија, изразени преку договорите со Бугарија и со Грција. Продолживме со уште поголема посветеност и кон реформите. Демократијата, слободата, владеењето на правото се европски вредности што Република Северна Македонија докажа дека е подготвена да ги спроведе. Но тие се и потреба за граѓаните, значат стабилност и економија и затоа остануваме ориентирани кон евро-атлантските интеграции“, рекол Заев.