Македонија
ИВЗ пет години не доставила извештај за работењето до Централниот регистер

Исламската верска заедница пет години не доставила извештај и годишна сметка до Централниот регистар.
Како што информираше Нури Бајрами од Државната комисија за спречување корупција, комисијата ќе поведе иницијатива за утврдување одговорност на директорот и на службените лица.
Антикорупциската комисија од УЈП ќе побара да достави записник за извршената финансиска контрола за работењето на ИВЗ од 2014 до 2018 година, по што ќе одлучи какви мерки ќе преземе и ќе ја извести и Владата.
ДКСК од Министерството за финансии добило информација дека ИВЗ, по основ на враќање на имот, добила обврзници во висина од 9.100.000 евра, како компензација за имот кој не може да се врати, или поконкретно се работи за над 48.000 квадратни метри земјиште и 210 квадрати станбен простор.
До Јавното обвинителство за организиран криминал е доставена пријава за злоупотребата на финансиското работење на ИВЗ во која биле приложени 116 докази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Со метален предмет го убил брата си, па го закопал во дворот од заедничката куќа: расчистено убиство во Кавадарци

Денеска (06.08.2025), ОВР Кавадарци до Основното јавно обвинителство Кавадарци, поднесе кривична пријава против С.И.(43) од Кавадарци поради постоење основи на сомнение дека сторил кривичнo делo „убиство“ по член 123 од Кривичниот законик.
Тој се сомничи дека на 27.07.2025 во семејниот дом во Кавадарци со метален предмет нанел повреди на неговиот брат И.И.(42) од Кавадарци, од кои тој починал, по што телото го закопал во помошен објект во дворот од заедничката куќа.
Имено, вчера (05.08.2025), нивната сестра В.О.(44) во 11:00 часот во ОВР Кавадарци го пријавила за исчезнат нејзиниот брат И.И.. Додека, во 13:00 часот пријавила дека во помошниот објект во дворот од куќата на нејзините браќа, каде што отишла со сопругот, забележале дека има ископ покриен со ровка земја, по што се посомневале дека е можно нејзиниот исчезнат брат да е закопан внатре.
Веднаш по пријавата, на местото излегле јавен обвинител, полициски службеници и претставници од Институт за судска медицина Скопје, а од погребално претпријатие откопана е дупката и било пронајдено телото на И.И..
По наредба на јавен обвинител, телото на починатиот било дадено на обдукција и вештачење. Истиот ден во 14:40 часот, по извршени оперативни проверки и добиени сознанија и во координација со јавен обвинител, полициски службеници го лишиле од слобода С.И., по што го спровеле во јавното обвинителство, каде во службен разговор го признал делото.
Македонија
Само за спортско навивање има место на трибините: МВР најстрого ќе го санкционира говорот на омраза

Министерството за внатрешни работи во континуитет апелира до сите граѓани и членови на навивачки групи да ги бодрат своите спортски клубови, но да навиваат спортски, исклучиво во спортски дух, без говор на омраза, без какви било навреди по лична, етничка, верска или која било друга припадност што не соодветствува на спортски натпревари и е спротивно на законот.
МВР нагласува дека во рамките на обезбедувањето мирни и непречени спортски натпревари, како во минатото така и сега и во иднина, полицијата ќе биде крајно ригорозна по однос на какви било нарушувања на јавниот ред и мир, односно какви било навредливи скандирања и друг начин на ширење говор на омраза.
Потсетуваат дека во врска со кошаркарскиот натпревар, што се одржа на 2.8.2025 во спортската сала во Куманово, во СВР Куманово веќе се повикани неколку осомничени лица, со кои е извршен службен разговор, и по извршените анализи, во координација со ОЈО Куманово, ќе бидат преземени конкретни законски мерки, а едно лице е лишено од слобода и против него ќе следува соодветен поднесок.
Што се однесува за фудбалскиот натпревар, кој се одржа на арената „Тодор Проески“ во Скопје на 5.8.2025, СВР Скопје врз основа на снимениот и документиран материјал презема мерки во координација со надлежен јавен обвинител, информираат од Министерството. Појаснуваат дека е доставено писмено известување до Обвинителството врз основа на веќе утврдениот материјал по што МВР ќе постапува во согласност со своите надлежности во координација со ОЈО и за какви било утврдени законски прекршувања ќе следуваат соодветни поднесоци за што јавноста благовремено ќе биде информирана.
Македонија
Во тек е исплатата на правата од социјална и детска заштита

Министерството за социјална политика, демографија и млади информира дека денеска започна исплатата на правата од социјална, детска и цивилна заштита за месец јули 2025 година.
Корисниците на парични права коишто поседуваат дебитна картичка ќе можат да подигнат готовина на банкоматите на банките, да ги користат средствата за безготовински плаќања во продажната мрежа или преку електронско и мобилно банкарство од денеска, 06 Август 2025 година.
Со цел да се избегне метеж пред и во банките при исплата на правата, за корисниците кои не користат картички, исплатата ќе се спроведе во 2 групи во сите отворени филијали и експозитури на банките, согласно со утврдениот распоред по азбучен ред, според првата буква од презимето и тоа:
– 06.08.2025– А, Б, В, Г, Д, Ѓ, Е, Ж, З, Ѕ; И, Ј, К, Л, Љ
– 07.08.2025– М, Н, Њ, О;П, Р С, Т, Ќ, У, Ф, Х, Ц, Ч, Џ, Ш