Македонија
„Иво, зошто ме местиш“, го праша Заев сведокот во „Поткуп“

„Иво, зошто ме местиш“, го праша Зоран Заев сведокот во „Поткуп“ на денешното рочиште во кривичниот суд во Скопје. Премиерот Заев, кој е обвинет во случајот „Поткуп“, повеќе од половина час го испрашуваше во судницата сведокот Иван Николов Сачевалиев. На прашањето дали кога претходно поднел барање за легализација на цистерна му бил побаран поткуп, сведокот одговори дека за тој случај не му бил баран поткуп.
Заев рече денот кога ги објавувал бомбите во Универзалната сала, тој му се јавил на сведокот и му рекол: „Иво, како не ти е срам? Со месеци и години се обидуваш да ме наместиш? Имаш внуци и никогаш си немал ни еден проблем од мене? Зошто се обидуваш да ме наместиш?”, рече Заев за снимката во неговиот кабинет.
Сведокот на прашањето на Заев рече дека не разговарале за градежните материјали, донација за црквата. Адвокатите прашаа, а сведокот одговори дека против него била отворена истрага. На прашањето дали таа била истрага била затворена истата година кога го пријавил случајот со поткупот во МВР, сведокот не можеше точно да се сети, но рече дека најверојатно станува збор за 2011 година, а не 2013 година кога пријавил поткуп.
На продолжението на глaвната расправа за случајот „Поткуп”, во кој е обвинет Зоран Заев дека ја злоупотребил функцијата градоначалник на Струмица и барал 200.000 евра поткуп за легализирање земјиште, сведокот Иван Николов Сачевалиев одговараше и на прашањата на адвокатот на Заев, Филип Медарски. Тој на прашање на Медарски, рече дека во Управата за безбедност и контразузнавање се сретнал со Митко Чавков, кој им рекол на колегите во МВР дека сведокот е најработливиот човек во Струмица.
Сведокот додаде дека со Чавков се сретнал само уште еднаш, кога барал соработка со неговиот син Иван, кој, пак, имал градежна фирма. Но, не договориле соработка бидејќи добил друга подобра понуда. Сведокот Сачевалиев рече дека се сеќава дека потпишал два записника, а третиот го видел во судницата. Медарски му предочи три записници од сослушување кои ги дал пред Обвинителството за организиран криминал и корупција.
На тоа обвинителката Бислимовска не се противеше, па сведокот си го препозна потписот. На прашање на адвокатот Медарски зошто случајот не го пријавил во Струмица, туку во Скопје, сведокот Сачевалиев одговори дека тоа го направил зашто стравувал дека Заев како градоначалник можел да го дознае тоа и да влијае.
Кога адвокатот го праша сведокот зошто продолжил да контактира со Заев откако го пријавил случајот, Иван Николов Сачевалиев рече дека на 10 март 2015 година, Заев му се јавил последен пат утрото во 9:45 и му рекол: „Земи тој милион што го имаш да го платиш и не ти чини тоа што го правиш…И ми затвори телефон. Потоа вечерта си го чув името од Заев во Универзалната сала.Па почнаа да ме прашуваат моите за што станува збор и им реков дека сум бил во Обвинителството“.
Бизнисменот Иван Николов Сачевалиев претходно во сведочењето за случајот „Поткуп“ повтори дека во 2013 година, кога Зоран Заев беше градоначалник, знаел дека тој треба да откупи државно градежно земјиште и му се јавил за да дојде кај него за 15 минути во градоначалничкиот кабинет во Струмица. Му рекол дека може да го откупи земјиштето за 70 денари од квадратен метар, но дека ќе треба да плати плус три евра – едно евро за него, едно за СДСМ и едно евро за црквата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Онлајн закажување термин за сликање за лични документи и за македонската дијаспора, соопшти МВР

Министерството за внатрешни работи овозможи онлајн закажување термин за сликање за лични документи во државата и за македонската дијаспора, односно сите оние кои не поседуваат македонски телефонски број преку можност да извршат резервација преку електронската пошта, https://termin.mvr.gov.mk/Call_Request.
Од моментот на воведување на електронското закажување преку Веб страницата на МВР во текот на 2024 имало во просек по 7000 закажани термини месечно, а во текот на 2025 има над 4000 термини месечно или во просек речиси по 200 закажани термини на ден преку овој сервис.
МВР информира дека закажувањето термин преку редовните телефонски линии функционира беспрекорно и термин за редовна постапка се добива за еден ден.
Македонија
Ковачки од Берово: Во првата година од мандатот економијата заздравува

Наследивме една тешка социоекономска состојба во државата којашто беше резултат на катастрофалното владеење на СДС и на ДУИ. За среќа, резултатите на Владата на ВМРО-ДПМНЕ покажуваат дека уште во првата година од мандатот, економијата заздравува а ветувањата се оставруваат, истакна Драган Ковачки, пратеник на ВМРО-ДПМНЕ.
„Во првата година од мандатот го реализиравме предизборното ветување за 5.000 денари зголемување на пензиите на сите пензионери. Понатму, ветивме дека ќе го завршиме проектот со клиничката болница во Штип, нешто што е многу значајно за овој крај, за овие граѓани во селото Ратево, во селото Миташинци, воопшто за општината Берово каде што сме денеска во посета.
Заедно сме денеска со нашиот кандидат и иден градоначалник на општина Берово тоа е господинот Петар Ружински. Заедно да ги слушнеме проблемите на граѓаните, работите со коишто тие се соочуваат и имаат да ни ги предложат за да ги ставиме во нашата програма“, додаде тој.
Најави дека во наредниот период Владата предводена од ВМРО-ДПМНЕ и премиерот Христијан Мицкоски ќе бидат насочени на инфраструктурно градење на овој дел од државата којшто, според Ковачки беше заборавен од претходната власт.
„Верувам дека ВМРО-ДПМНЕ во наредниот период ќе има градоначалник од ВМРО-ДПМНЕ и тоа ќе биде господинот Петар Ружински за доброто на сите граѓани во Берово“.
Македонија
Данок за немажени и неженети е спротивен на Уставот, човековите права и даночната правда, општеството не се гради со казни, велат од ДОМ

Демократска обнова на Македонија (ДОМ) загрижена поради најавата на премиерот Христијан Мицкоски за можноста од воведување данок за немажени и неженети лица.
Ваквата најава, велат од партијата, претставува недозволив и опасен преседан кој директно ги повредува темелите на уставниот поредок, човековите слободи и начелата на еднаквост.
„Во Македонија, Уставот во член 9 гарантира дека сите граѓани и граѓанки се еднакви пред Уставот и законите, без оглед на нивниот личен статус. Воведување даночен товар врз основа на брачен статус е директна дискриминација и грубо кршење на ова уставно начело.
Дополнително, ваквата мерка е во спротивност со Европската конвенција за човекови права, конкретно член 8, кој ја гарантира правото на почитување на приватниот и семејниот живот, и член 14, кој забранува дискриминација при уживање на правата и слободите утврдени со Конвенцијата“.
Според ДОМ, во доменот на фискалната политика, предлогот е и против основните начела на даночната правда, односно на правичноста, неутралноста и еднаквиот третман на даночните обврзници.
Додаваат дека даночниот систем не смее да се користи како алатка за морална или социјална санкција, туку како инструмент за праведна распределба на товарот и за создавање еднакви можности.
ДОМ повикува на итно повлекување од оваа идеја и отворање на сериозна јавна дебата за правичен и недискриминаторски пристап кон демографските политики.
Длабоко сме уверени дека општеството не се гради со казни, туку со поддршка, еднаквост и почитување на човековото достоинство.