Основниот кривичен суд Скопје, по добивање на одлуката на Судскиот совет за судење на сите насрочени судења, која беше објавена во петокот (29 мај), ја информира јавноста дека почнува со интензивни подготовки на сите судници и простории во судската зграда.

Ќе се врши целосно дезинфицирање на судниците и ќе се воспостави нов распоред за седење на странките во согласност со препораките на Владата за заштита од ширење на коронавирусот.

Поради тоа, денеска и утре (1 и 2 јуни), судот ќе постапува само по итни, притворски предмети и предмети поврзани со член 205 – 206 од КЗ, како и во изминатите два месеца, а од среда, 3 јуни, доколку во меѓувреме не се добијат нови напатствија од Судскиот совет, ќе се постапува и по сите други насроечни судења во согласност со календарот за судење објавен на веб-страницата на судот.

За само еден ден од објавувањето на јавните повици за доделување субвенции за набавка на велосипеди и електрични тротинети, во Град Скопје поднесени се 696 барања од граѓани за субвенции за купен велосипед и 91 барање за субвенции за купен тротинет, информираат градските власти.

Годинава новитет е тоа што граѓаните ќе може да доставуваат фискални сметки за купен велосипед или електричен тротинет од 1 јануари 2020.

Средствата што Град Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари за лице, со вклучен персонален данок на доход, и 30 отсто од вредноста на електричниот тротинет, но не повеќе од 7.000 денари за лице, со вклучен персонален данок на доход.

Повиците ќе бидат отворени до 30 ноември годинава или до реализирање на средствата, а ќе се спроведуваат по принципот прв дојден, прв услужен.

Едно лице може да поднесе само едно барање за добивање субвенција за купување велосипед, а тоа важи и за субвенција за електричен тротинет.

Градоначалникот на општина Бутел, Велимир Смилевски, од вчера е во самоизолација поради средбата со директорката на УЈП, Сања Лукаревска, која е позитивна на Ковид-19.

„По вчерашната вест за позитивниот тест на Ковид-19 на Сања Лукаревска, а поради средбата што ја имав со неа минатата недела, од вчера, а во интерес на граѓаните, самоиницијативно сум во самоизолација и покрај тоа што при нашата средба и обајцата целосно ги почитувавме мерките за заштита“, напиша Смилевски на својот фејсбук-профил.

Тој додава дека денеска го направил тестот на Ковид-19 и резултатот го очекува во текот на утрешниот ден.

„Во моментот немам никакви симптоми и се чувствувам добро. Ѝ посакувам на мојата пријателка Сања Лукаревска, но и на сите граѓани кои се позитивни на Ковид-19 и се во самоизолација, брзо оздравување и добро здравје. Апелирам да не го потценувате вирусот, да бидете максимално внимателни и да ги почитувате мерките за заштита“, пишува градоначалникот Смилевски.