Македонија
(Интервју) Моника Зајкова: Постојат недопирливи политички моќници, одговорноста мора да има име и презиме

Свесно влегов во политичкиот предизвик. Некој ќе каже во време-невреме, меѓутоа не можеме сите да стоиме на страна и да ги гледаме работите од страна. Треба да влеземе во системот и да го поправаме она што не чини или да го пофалиме она што е добро“, вели претседателката на ЛДП, Моника Зајкова во интервју за „Макфакс“.
Образованието и правосудството, оценува таа, се ресори каде постојат најгорливите проблеми, и таму треба да се делува.
„Ако сакате да уништите една нација, уништете ѝ го образованието. Ако сакате да има стагнација во една држава, треба да има уништен правосуден систем, бидејќи тој е темелот на сѐ она што понатаму се случува. Тука треба повеќе да работиме“, подвлекува претседателката на ЛДП, најавувајќи нови иницијативи, конкретно во судството.
„Тука ќе опфатиме дел од сите правосудни органи, од Законот за јавнообвинителска служба, Законот за јавни обвинители, Судскиот совет, кој што никој не го допрел. Но и често напоменувам и тука ќе напоменам, секоја одговорност мора да има име и презиме. И мора да престанеме со онаа генерална слика: „Не чини судството, не чини обвинителството“. Не. Мора да ја детектираме одговорноста и таа одговорност да биде санкционирана“, додава Зајкова.
Според неа никој не треба да се плаши од реформите.
„Затоа што се стекнува слика за тоа како самите политичари се плашат да се реформираат, како да имаат нешто да сокријат“, истакнува Зајкова, не негирајќи дека во државата има недопирливи политички моќници.
„Може да се сложиме да, има. И не за џабе се стекнала сликата дека има недопирливи политички моќници, затоа што де-факто, постојат такви луѓе“, вели таа.
ЛДП ќе ги поддржи уставните измени, потенцира Зајкова, појаснувајќи дека не е добро да се игра на етничката карта.
„Не е добро никогаш да играме на етничката карта и разгорување на тие емоции, затоа што тоа е само поигрување со емоциите и на долг рок, популизмот и таквата политика не носи никому добро. Ќе останеме заглавени во минатото, а треба да се движиме напред, бидејќи гледаме дека сите околу нас се движат напред. И не треба да се користат уставните измени како прашање кое што повторно ќе го дели народот, а гледам дека натаму оди реториката“, истакнува Зајкова, додавајќи дека со ЛДП не е разговарано за проширување на коалицијата.
Дали ќа има изненадувања и нови имиња во редовите на ЛДП, за новите иницијативи, за смената на Милевски, дали Европа води уценувачка политика за влез на Македонија во ЕУ и слично, во интервју за „Макфакс“, претседателката на ЛДП, Моника Зајкова.
.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Костадиновска-Стојчевска и Агелер: Во Битола има уникатно богатство на чија заштита посветено работиме

Битола е богат град, и културно и историски. Секое делче од неа раскажува посебна приказна. Имаме уникатно богатство за чија заштита треба посветена работа“, рече министерката за култура, Бисера Костадиновска-Стојчевска, која првата работна средба со амбасадорката на САД во нашата држава, Анџела Агелер, ја искористи за заедно да посетат неколку значајни локалитети и институции во Битола.
Костадиновска-Стојчевска и Агелер ги посетија археолошкиот локалитет Хераклеја Линкестис и Историскиот архив – Битола, а имаа и средба со пратенички и советнички од овој регион.
При посетата на локалитетот Хераклеја се запознаа со текот на активностите во рамките на проектот за конзервација и презентација на мозаици и архитектура на локалитетот, кој треба да биде финализиран до јуни годинава, а за кој беше обезбеден грант од американската амбасада во земјата.
Костадиновска-Стојчевска упати голема благодарност до амбасадорката Агелер за стратегиското пријателство меѓу Соединетите Американски Држави и Северна Македонија, за грижата и солидарноста на американскиот народ, кој преку амбасадорскот фонд во континуитет учествува во заштитата на македонските културни богатства за идните генерации што доаѓаат.
При посетата беше истакнато дека конзерваторските интервенции, кои првпат се преземаат во толку голем обем токму благодарение на овој грант, не само што ќе овозможат зачувување на овие исклучително вредни културни добра по кои е препознатлива Хераклеја туку ќе дадат и ново светло и значење на самиот локалитет.
Македонија
(Видео) Адвокатот на Лидија Димова: Не ги злоупотребила фондовите

Ексдиректорката на Националната агенција за европски образовни програми и мобилност, Лидија Димова, не ги злоупотребила фондовите. Ова го тврди нејзиниот адвокат Зоран Молчанов. Тој посочи: „Па до сега нема ниеден што пријавил оштета на тоа“, иако Обвинителството тврди дека штетата што ја направила е 20 милиони денари.
„Тезата е таква, од една страна. Меѓутоа, нема предочено спротивно од кои одредби на Законот за јавните набавки е постапено. Наспроти тоа, ние објаснивме дека целокупната процедура е запазена баш во согласност со Закон за јавните набавки цитирајќи по кои членови тоа е направено“, рече адвокатот.
Тој додава дека ОЛАФ ја затворило истрагата за Лидија Димова и посочува: „Се има интересирано, меѓутоа нема утврдено никаква неправилност во работењето“.
Лидија Димова не чувствува вина за делата злоупотреба на службената положба и овластувањето и измама на штета на европската заедница. Александар Гочев, второобвинет, призна вина за делото измама на штета на европската заедница. Со тоа судијката Фанка Јанчулева-Михаиловска ја раздвои постапката за Гочев.
Обвинителката Сузана Мирческа-Кузмановска поднесе обвинителен акт против Лидија Димова, разрешената директорка на Националната агенција за европски образовни програми и мобилност, Александар Гочев, тогашен нејзин близок соработник, и Ана Павлиду, пензионира благајничка во институцијата. Според обвинителката, сите три лица оштетиле средства на европската заедница. Лидија Димова се гони дека со намера за друг да прибави имотна корист ја злоупотребила положбата и овластувањето, па постапила спротивно на Законот за јавните набавки и на Законот за основање Национална агенција за европски образовни програми и мобилност. Таа ангажирала соработници во Агенцијата, без да објави оглас, а меѓу нив е и ангажирањето на Зоран Златковски. Истовремено, Димова се гони и за исплаќањето издатоци за службени патувања. Обвинителката бара одговорност од Димова и за склучени договори без јавни набавки.
Македонија
Кисела Вода гради паркинг за стотина возила во населбата 11 Октомври – згради

Општина Кисела Вода почна со изградба на нови паркинзи на три локации во урбаната заедница 11 Октомври – згради.
Лоцирани на улиците Ѓорѓи Сугаре и Михаил Чаков, во непосредна близина на трим-патеката, ќе отворат можност за паркирање стотина возила и значително ќе го подобрат сообраќајот во мирување во овој дел од општината.
„Свесни сме дека организацијата на сообраќајот во мирување е од исклучително значење за квалитетот на одвивањето на целокупниот сообраќај, па затоа интензивно работиме на обезбедување локации за изградба на соодветен паркинг-простор во општина Кисела Вода. Минатата година ја затворивме со 7 нови локации за паркирање на речиси 500 возила и оваа година, во согласност со ветувањата, ќе изградиме најмалку уште толку паркинзи. Денес, почнуваме со изградба на паркинзи на три нови локации во урбаната заедница 11 Октомври – згради, кои треба да бидат готови за две седмици. Со ова, се отвораат нови 100 паркинг-места, што значи намалување на сообраќајниот метеж во овој густо населен дел на општината. Изнаоѓањето вакви и слични сообраќајни решенија ќе продолжи со несмален интензитет и во периодот што претстои“, изјави градоначалникот Орце Ѓорѓиевски.