Македонија
Камчев: Не се само Катица и Боки 13, треба да има и други обвинети за „Рекет“
Веќе час и половина сведокот бизнисмен Орце Камчев го дава својот исказ во судот за случајот „Рекет“. Тој, освен кон Бојан Јовановски и Катица Јанева, прстот го впери и кон други лица, меѓу кои обвинителката на СЈО Лиле Стефанова и братот на судијката Весна Димишкова, адвокатот Васил Димишков.
„Не треба да се само овие двајца обвинети, треба да има и други“, рече тој.
На моменти зборуваше смирено, а на моменти беше нервозен. Бојан Јовановски во текот на сведочењето постојано го гледа во очи, на моменти се смее, додека ексшефицата на СЈО, обвинетата Катица Јанева, гледа во документите пред себе.
Камчев рече дека во август 2018 за првпат слушнал дека против него се води истрага и дека е под ПИ-мерки, кога адвокатот Васил Димишков побарал да се сретне со него на јавно место.
„Ми рече да му дадам 100.000 евра за да направиме договор и дека може да влијае да има поблаги мерки. Ако ми дадат притвор, тој да издејствува куќен притвор, фактички ми даде цела скала која мерка колку ќе чини, како да сме на пазар“, рече Камчев.
Во овој „дил“ имало и посредник – директор на позната банка, чие име Камчев не го кажа. Преку истиот директор, Камчев ја одбил понудата на Димишков.
Потоа, следувале контактите со Бојан Јовановски – Боки 13. Тој прво барал реклама за телевизијата, а потоа, заедно со Зоран Милески – Кичеец му доставил и две понуди. Едната за проект за фешнмолови, а втората за старечки домови.
„Јас го погледнав зачудено и му кажав дека со молови не работам. Тогаш тој ја сврте последната страница од договорот и ми рече, ама види кој е потпишан тука, Лазар Јанев, синот на Катица Јанева. Јас реков, е добро де, ништо не ми значи тоа, и преку Милески ја одбив понудата“, рече Камчев.
За проектот со изградбата на старечки домови Боки 13, според Камчев, му барал 4 милиони евра за лиценцата.
„Кога направивме пресметка, сфатив дека со тој проект јас ќе бидам во загуба 10 милиони евра и го одбив. Тогаш Милески ми се јави и рече дека Боки е многу лут, дека е моќен, има телевизија, може да ме плука и дека е најдобро да платам за реклама“, рече сведокот Камчев.
Тој вели дека за реклами на „1ТВ“ платил 170 илјади евра, преку 2 фактури, едната од „Систина“, а втората од „Орка холдинг“.
Но, според Камчев, ова не било доволно, па тој завршува во притвор за случајот „Империја“. Тогаш, рече тој, дека „сè му станало јасно“.
„Вршеа жестока тортура врз моите компании, нотар не можеше да ми влезе. Сето тоа беше притисок смислен од Боки 13, реализиран од Лиле Стефанова, по наредба од Катица Јанева“, рече тој.
Камчев зборуваше и во името на својата сопруга Ана, за која рече дека имала неколку средби со Боки 13 и Зоран Милески, кои ѝ барале пари за тој да излезе од притвор.
„Во населбата Орман во декември Бојан организирал состанок и ја викнал Ана… И во станот била Катица. Катица ѝ упатила директна закана дека ќе отвори уште 3-4 предмети против мене ако не платиме. Откако Ана излегла од станот, на вратата чекал нов клиент – Дејан Панделески, исто како на пазар!“, рече тој.
БОЖЕ, БОЖЕ, ЗАР БОКИ 13 ГО УПРАВУВА СЈО?
Тој рече дека предмет на рекет бил и сега неговиот покоен другар, ексдиректорот на „Телеком“ Жарко Луковски, кој лично му кажал дека платил околу 450 илјади евра за да не биде осомничен.
„И ‘Тинекс’ и Дејан Пелистерка, сите платија, ама не се одважија да кажат. Јас решив дека морам да ја прифатам играта и да платам. Немав на кого да пријавам рекет. На кого? На обвинителката? На истражната судијка? Сите беа вмешани, како хиени околу вас“, рече тој.
Камчев рече дека првично му биле барани 8 милиони евра, доколку Катица Јанева го работи предметот против него, а 5 милиони евра доколку го работи Вилма Русковска. Кога прашал зошто толкава разлика во цената, му било кажано дека „ако го работи Вилма, ќе гледаат да уништат некои докази“.
„Тогаш си реков, Боже, Боже, зар Боки 13 го управува СЈО?!“, рече Камчев пред судот.
Тој директно ја посочи Јанева, дека во просториите на СЈО, додека тој бил со својот адвокат Антонио Апостолски, во собата за сведоци му се обратила со зборовите – „она што го договараш со Бојан, да го завршиш“.
Камчев вели дека тогаш одлучил да им даде 1,5 милиони евра. Ги спакувал во чанта „Луј Витон“ и го викнал Бојан Јовановски.
„Тој па беше и лут зашто сум ставал и банкноти по 50 евра, немал што да им прави. Му реков дека ставав по 50 евра за да не му се нагмечи чантата, да биде пополна“, иронично рече Камчев.
Во тој период, тој веќе одлучил да снима сè и за истото бил известен директорот на УБК.
КОГА МУ КАЖАВ НА ЗАЕВ, ТОЈ БЕШЕ ВЧУДОВИДЕН
Откако му ги дал парите на Боки 13, Камчев, според сведочењето, му се јавил на премиерот Зоран Заев и отишол на средба, со сите снимки што ги поседува.
„Морав да пријавам. Му се јавив на Заев, човекот беше вчудовиден. Ми рече, дај ми неколку дена. Потоа имавме уште една средба и ми рече сè што имам да однесам кај обвинителката Вилма Русковска“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Обилните врнежи од дожд во источниот регион предизвикаа поплави
Обилните врнежи од дожд кои деновиве го зафатија источниот регион од земјава, утрово предизвикаа поплавување на простории и дворови во повеќе објекти на различни локации во општина Чешиново – Облешево и околните села, соопшти директорот на Центарот за управување со кризи (ЦУК), Мухамед Али.
Според податоците добиени од градоначалникот на Општината, Далибор Ангелов, директорот на ЦУК информира дека локалната самоуправа е активно ангажирана на терен со сите расположливи ресурси.
– Во интервенциите учествуваат и ТППЕ Кочани, Водостопанство „Брегалница“ и РЦУК – Кочани. Побарана е и дополнителна материјално-техничка поддршка, особено за испумпување вода од поплавените објекти, вели директорот на ЦУК.
Али додава дека реките Брегалница и Кочанска река имаат значително зголемен водостој, додека на одредени локации во општините Штип и Чешиново – Облешево е забележано нивно излевање од коритата.
– Како последица на врнежите, утрово се појавија свлечишта на експресниот пат Радовиш – Штип и на патниот правец Злетово – брана Кнежево. За настаните од страна на ЦУК веднаш беше информирано ЈП Македонија пат, чии екипи излегоа на терен и интервенираа соодветно, наведува Али.
Тој додава дека е забележано лизгање на земјиште во село Липково, кај место викано Кисела Вода. За овој случај, вели, Општина Липково веќе информирала дека располага со ограничени ресурси за интервенции од ваков тип, поради што, побарала да се вклучат државните институции во санирање на свлечиштето.
Македонија
Пензионерите во во понеделник на протест пред Уставниот суд
Пенизонерите кои се за линеарно зголемување на пензиите денеска од Штип порачаа дека во понеделник на 1 декември пензионерите од државата ќе протестираат пред Уставен Суд во Скопје, со цел како што велат да продолжи линеарното пресметување на пензиите. Тие на денешната прес-конференција повикаа на масовност, со цел заеднички да се изборат за нивните права.
-Во понеделник во 11 часот пред Уставен Суд во Скопје ќе протестираме, од цела Македонија, изјави пензионерот Зоран Трајков. Трајче Станојков пензионер од Свети Николе најави ако во понеделник протестот не вроди со плод, веќе на 10 декември продолжуваат со протести, бидејќи не се откажуваат од нивните барања. Тој додаде дека освен линеарното усогласување на пензиите ќе бараат и К-15, покачување на посмртнината, како и воведување на пензионерска картичка. Пензионерот од Штип, Трајче Митев вели дека имаат и конкретни барања.
-Ќе се бориме за покачување на посмртннина од 35.000 на 50.000 денари. Ќе создадеме фронт да се воведе пензионерската картичка, вели Митев.
Во Штип денеска се собраа пензионерите од Штип, Свети Николе, Скопје, Куманово.
-Сите ќе се залагаме да дојдеме во Скопје, за да и кажеме дека е доста дискриминација. Ние бараме да земеме линеарно покажување на пензиите, вели пензиионерката Вера Јовановска.
Пензионерите најпрво добија пет илјади денари линеаро покачување на пензиите, во септември на картичка добија уште илјада денари, а во март наредната година треба да има ново линеарно усогласување за илјада денари.
Македонија
Анализите покажаа дека нема тешки метали во водата што ја пиеле затруените деца од ОУ „Димо Хаџи Димов“
Институтот за јавно здравје (ИЈЗ) денеска информира дека целосно се завршени анализите на мострите од вода земени од ОУ „Димо Хаџи Димов“ и оти физичко-хемиската анализа и микробиолошката анализа на водата се во рамките на реферетните вредности. Тешки метали во мострите од вода не се пронајдени.
– Како што претходно известивме за резултатите од мостри од храна и работни површини од истоименото училиште, најдени се фекални бактерии Enterobacteriaceа во мусаката и на неколку површини од кујната и училиштето кои укажуваат на нехигиена во училиштето и кујната. Од добиените седум примероци на биолошки материјал кои ги имаме примено во Институтот за јавно здравје од деца кои јавиле симптоми, шест се позитивни на Norovirus, се посочува во соопштението од ИЈЗ.
Во текот на викендот, приправни и дежурни екипи од ИЈЗ се на работа и ги анализираат добиените мостри, како и биолошки материјали добиени претходните денови од училиштата, се со цел брзо,точно и ефикасно справување со ситуацијата.
За дополнително пристигнатите мостри од другите девет училишта, ИЈЗ ќе информира во понеделник.
-ИЈЗ е во постојана комуникација со другите надлежни институтиции и за сите дополнителни инфромацвии ќе ја информира јавноста, се наведува во соопштението од ИЈЗ.

