Илија Димовски и ВМРО-ДПМНЕ по секоја цена се обидуваат да ги блокираат реформите во медиумите. Димовски, кој е претседател на Комисијата за избори и именувања, упорно одбива да закаже седница на која ќе почне јавна и транспаретна постапка за избор на членови на Советот на Агенцијата за аудио и аудиовизуелните медиумски услуги и членови на Програмскиот совет на МРТ, обвини портпаролот на СДСМ, Костадин Костадинов.

„Со тоа ВМРО-ДПМНЕ свесно веќе неколку месеци го кочи изборот на членови на Советот на АВМУ и Програмскиот совет на МРТ и свесно ги кочи медиумските реформи.

Очигледно дека единствената цел за таквото однесување е зачувување на партиските кадри на ВМРО-ДПМНЕ во АВМУ и МРТ, кои доведоа до катастрофалната состојба со медиумите во која беше нашата држава.

За потсетување, состојбата во МРТ е единствена критика од извештајот на Европската комисија, а потребата од реформи во јавниот сервис е нотирана и во извештајот на „Репортери без граници“.

Од друга страна, директорот на АВМУ, кој патем е и некогашен советник од ВМРО-ДПМНЕ, јавно ширеше лажни вести, кои официјално беа демантирани од страна на Министерството за внатрешни работи.

Професионализацијата на Агенцијата и МРТ е од особено значење за реформата на медиумите и унапредување на демократските вредности во државата.

Од таа причина, Илија Димовски и ВМРО-ДПМНЕ мора да ги почитуваат законот и постапката за избор на членови на Советот на АВМУ и Програмскиот совет на МРТ и седницата да почне веднаш, да ја свика и да почне расправата.

Напредокот што го постигна нашата држава во делот на медиумските слободи јасно ја покажува нашата заложба за слободни, професионални и независни медиуми.

Реформите мора да продолжат во интерес и на државата и граѓаните“, порача Костадинов.

Зависниците од наркотици ќе можат да примаат терапија и во поликлините во Аеродром, Ченто и Психијатриската болница. Досега околу 520 пациенти примаа терапија во центарот во Кисела Вода и ГОБ „8 Септември“, а тенденција на Министерството за здравство е дисперзијата да продолжи и во поликлиниките во Ѓорче Петров, Чаир и Шуто Оризари.

Министерот за здравство, Венко Филипче, рече дека целта на дисперзијата е за МЗ да покаже дека секој има право на пристап до здравствена заштита и има право на добивање квалитетна здравствена заштита.

„Пациентите ќе ја примаат потребната терапија во центрите, пред медицинскиот персонал, така што на овој начин се елиминира можноста за евентуално препродавање на терапијата“, посочи министерот, потенцирајќи дека за дисперзијата е постигнат консензус со здруженијата од оваа област.

Министерот нагласи дека овие пациенти не треба да се гетоизираат и стигматизираат.

„Тие се наши соседи, пријатели, сограѓани, на кои треба да им овозможиме пристап до потребната терапија“, нагласи министерот Филипче и додаде дека следи подготвителен процес за обезбедување нови кадровски решенија, односно дека е планирано вработување на дополнителни 20 психијатри кои ќе бидат вклучени во овие пунктови.

Филипче најави дека следи набавка на сефови за чување на терапијата, а паралелно ќе се работи со населението во насока на разбивање на стигмата кон овие пациенти и начинот на кој се лекуваат.

„Решаваме проблем кој постои повеќе од 20 години“, истакна министерот, уште еднаш потенцирајќи дека нема потреба од загриженост на граѓаните кои живеат во овие реони, бидејќи давањето терапија на овие лица ќе се одвива во строго контролирани услови, во присуство на медицинскиот персонал, а воедно значително ќе се намали и бројот на корисници на терапија кои гравитираат кон еден центар.

Во развивање на овој модел, кој подразбира дисперзија на капацитетите од Кисела Вода на други 4 локации, ќе бидат вклучени здруженијата од оваа област, пациентите, нивните семејства, Министерството за внатрешни работи, здравствените работници, општините и други чинители.

Градот Скопје во соработка со општините Центар, Карпош, Чаир и Аеродром денеска почна акција за ослободување поголем број заробени дрвја од градежен материјал при нестручно изведени градежни активности на јавните површини. Акцијата почна на улицата Орце Николов во Дебар Маало, каде што има голем број заробени дрвја со бекатон-плочки и друг градежен материјал.

„Во јануари годинава со Шумарскиот факултет потпишавме меморандум за соработка за ослободување 841 дрво, дрвја кои се заробени со градежен материјал. Со задоволство можам да истакнам дека до крајот на оваа сезона сите 200 дрвја кои се во надлежност на Град Скопје ќе бидат ослободени. Им помагаме и на општините да влезат во засилен процес на ослободување на дрвјата. Најмногу заробени дрвја има на територија на општина Центар, особено овде, во Дебар Маало. Во лудата урбанизација на овој дел од нашиот град во целост беше заборавена животната средина. Големите и развиени дрвја се природен прочистувач на воздухот и ние ќе направиме сè што е во наша моќ да ги заштитиме тие дрвја“, рече градоначалникот на Град Скопје, Петре Шилегов, на почетокот на денешната акција.

Тој додаде дека е интересно што во општината Аеродром се мапирани само 20-тина заробени дрвја, па се очекува во таа општина акцијата да заврши во текот на денешниот ден.

„Управувајќи со системот на Град Скопје, при градежните работи што ги изведуваме водиме сметка повеќе ниту едно дрво да не биде заробено и годинава да успееме да ги ослободиме сите заробени дрвја кои беа мапирани“, нагласи Шилегов.