Министерството за внатрешни работи ги известува граѓаните на Скопје дека поради промена на терминот за одржување на манифестацијата “Вело Фиеста” изменет режим на сообраќај во главниот град на 19.09.2021 ќе има во периодот од 09 до 14.00 часот, а не од 18 до 23 часот како што стоеше во претходното соопштение.

„Посебниот режим на сообраќај ќе биде на истите улици кои претходно ги наведовме“, велат од МВР.

Односно на дел од ул.„Димитрие Чуповски“, на потегот од крстосницата со ул.„Даме Груев“ до крстосница со ул.„11 Октомври“ во Скопје, Одделението за безбедност на патниот сообраќај ќе преземе мерки за посебен режим на сообраќај по наведените улици, а сообраќајот ќе се пренасочува по околните сообраќајници.

Утре претпладне времето ќе биде променливо облачно со локален пороен дожд и грмежи претежно во планинските региони. Попладне ќе биде умерено облачно со сончеви периоди. Ќе дува слаб до умерен северен ветер. Во југозападните делови ветерот ќе е западен и повремено со засилен интензитет.

Минималната температура ќе биде во интервал од 9 до 17, а максималната ќе достигне од 27 до 34 степени.

Во Скопје, претпладне ќе биде сончево со умерена променлива облачност, а попладне облачноста ќе се намалува. Минималната температура ќе се спушти до 13, а максималната ќе достигне 30 степени.

Од УХМР најавуваат дека услови за краткотраен пороен дожд со ретки грмежи ќе има утре претежно во планинските региони. Од понеделник ќе биде претежно стабилно со повремено зголемена облачност и нешто пониски дневни температури. Особено посвежо ќе биде од среда.

Министерот за надворешни работи Бујар Османи, на неговиот Фејсбук профил информира дека формирал работна група во рамки на Министерството за надворешни работи што ќе има за задача да работи на укинување на визи за државјани на Македонија за влез во САД.

„Процесот за укинување визи за нашите државјани за влез во САД е долгорочен и комплексен процес, но со оглед на нашите заложби за зајакнување на постоечкото сојузништво, создадени се условите да го започнеме овој процес. Најголема потврда за тоа е приклучувањето на нашата земја кон НАТО Алијансата, но и напредокот постигнат на полето на безбедноста, како надополнување на нашето стратешко партнерство со САД“, пишува Османи.

Според него, успешното завршување на овој процес налага како што вели, долгорочна и посветена работа, а постигнувањето на оваа цел ќе биде од бенефит за државјаните на двете пријателски земји. Дополнително, додава Османи, тоа ќе создаде значителен позитивен ефект на економската соработка, демократскиот просперитет и развој, но смета дека и генерално ќе има позитивно влијание врз целиот регион.
Ваквиот чекор, како што оценува првиот човек во дипломатијата, е уште една потврда за посветеноста на Република Северна Македонија за градење стабилни билатерални односи со САД и зајакнување на нашето стратешко партнерство.