Македонија
Ковачевски во УНЕСКО: Северна Македонија е мултикултурна реткост и придонесува во ефикасен мултилатерализам

Премиерот Димитар Ковачевски, во рамките на официјалната посета на УНЕСКО, се обрати на маргините на 42. генерална конференција на Организацијата, што се одржува во седиштето на УНЕСКО во Париз.
„Сакам да му се заблагодарам на УНЕСКО за поддршката на многубројни проекти, активности и ресурси важни за нашето мултикултурно општество, за нашето природно и културно наследство, за македонскиот јазик и за другите јазици што се зборуваат во Северна Македонија. Затоа што мојата земја е „срцето на балканскиот јазичен контакт. Би сакал да истакнам дека нашата соработка со УНЕСКО датира од 1979 и 1980 година кога нашиот бисер, Охридскиот Регион, влезе под закрилата на УНЕСКО. И денес со гордост го вбројуваме меѓу едно од вкупно 39-те културни и природни наследства во светот.
Наш императив, вели тој, е да ги одржиме интегритетот и автентичноста на Охридскиот Регион во соработка со Центарот за светско наследство на УНЕСКО.
„Заедно со Република Албанија да бидеме пример за добрососедска соработка и во заштитата на ова и заедничко и универзално добро. Од нашата натамошна засилена соработка ќе зависи имплементацијата на посочените мерки за рехабилитација на регионот. Темелите за неутрализирање на утврдените и потенцијалните закани се поставени, но потребите за заштита на ова добро бараат голема мобилизација за да ја зачува својата исклучителна универзална вредност, како и имплементација на итни мерки, кои ќе ги зближат сите засегнати страни и ќе се преземат веднаш. Од оваа говорница повикувам на сплотеност и одговорност во дејствувањето на секоја власт“, вели Ковачевски.
Според него, демократскиот систем на вредности е под сериозна закана.
„Ниту една држава, колку и да е моќна и силна, не може сама да се справи со глобалните предизвици на денешнината. Светот е поделен по разни основи. И, затоа, демократиите мора да ја зајакнат својата сплотеност и отпорност независно од географските, демографските, политичките, економските или културолошките разлики меѓу државите. Во интерес на мирот и стабилноста, неопходно е да се најде најмал заеднички именител. Тоа е единствено можно преку инструментите на ефективниот мултилатеризам“, вели Ковачевски.
Принципите на кои Северна Македонија ја води својата надворешна политика, според Ковачевски, се израз на внатрешната политика на земјата за градење и одржување мултикултурна демократија и постојана инклузивност на различностите во демократските процеси, заштита и унапредување на човековите права и правата на разните етнички заедници и ранливите групи. Културата на дијалог и компромиси, иако базирана на превенција на спорови, оди рака под рака со нашата приврзаност кон активниот и ефективен мултилатерализам.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Ден на огромна тага, бараме доживотна казна за убијците на Вања и Панче

Со огромна тага и неверување изразуваме сочувство за семејствата на Вања и Панче, двајцата невини луѓе чии животи беа одземени на грозоморен начин, велат од ЛДП.
Бараат да се изрече доживотна казна затвор за сторителите на овој чин.
„Надлежните институции, Министерството за внатрешни работи и Јавното обвинителство работеа интензивно и професионално во насока на целосно расветлување на случајот и ги пронајдоа сторителите на ова грозоморно злосторство, со што покажаа посветеност и професионалност на високо ниво.
Токму од тие причини, апелираме случаите да не се политизираат и преку нив да не се собираат политички поени, туку да се остават органите на прогон да ја вршат својата должност на висина на задачата.
Дополнително, апелираме и да не се шират дезинформации во врска со случаите, со цел да ги заштитиме фамилиите на починатите“, велат од партијата.
Македонија
Европскиот сојуз за промени ја напушти лидерската откако излегол и Џафери; „Веќе подготвуваат сценарио за фалсификување на изборите“, оценува Меџити

Лидерите на Европскиот сојуз за промени, Африм Гаши, Билал Касами и Изет Меџити ја напуштиле лидерската средба која беше свикана денеска а во фокусот се актуелни политички прашања од значење за претстојните редовни претседателски и парламентарни избори, како и од важност за европските перспективи за државата.
На состанокот опозицискиот албански блок ги изнел своите ставови пред присутните, но како што информираше Изет Меџити, кога стасале до точката за член на ДИК, собранискиот спикер Џафери ја напуштил средбата, па и тие оцениле дека треба да заминат, бидејќи како што рече Меџити, немало со кого да ги соочат аргументите.
14 и 28 април се посочуваат како датуми од овој опозициски сојуз за изборниот процес.
„14 и 28 април, значи на 28 да биде вториот круг на претседателски и парламанетарни избори, заедно за да се запазат роковите да не влеземе во ситуација каде што утре, задутре може некој да ги оспори изборите. Во однос на техничката влада, нашиот став е дека треба да има, но овој пат министрите треба да бидат од редовите на албанската опозиција, за еднаш, засекогаш да се отстрани режимот и да има услови за фер и демократски избори. Во однос на членот на ДИК цениме дека Џафери ова го одолговлекува и гледаме интенција да не се избере член“, истакна Меџити.
Упатуваат апел до Џафери да прекине со неговата пракса, оти како што велат, тоа ќе го оценат како обид за фалсификат на наредните парламентарни избори.
„Цениме дека збориме за наредните избори, збориме за европски вредности, а ако на првиот чекор има вакво сопнување, ова ни кажува дека веќе спремаат сценарио за фалсификување на изборите“, рече Меџити.
Тој изрази и сочувство до семејството на трагично загинатата Вања Ѓорчевска, и во врска со овој случај ценат дека Владата споро делувала.
Македонија
Павле Трајанов: Избори без техничка влада

Пратеникот Павле Трајанов од Демократскиот сојуз објави дека на денешната лидерска средба се залагал за избори без техничка влада, Македонија да биде една изборна единица, а вториот круг од претседателските и парламентарните избори да се одржат во исти ден.
„Прво, евроинтеграциските процеси на Македонија се во сериозен застој поради тоа што во изминатите седум години СДСМ и ДУИ не спроведоа темелни реформи во ниту една област, не воспоставија систем на владеење на правото, ја криминализираа државата, а ги партизираа сите институции, почнувајќи од Уставниот суд, па се до најниско ниво. Секојдневно медиумите, невладиниот сектор и политичките партии, објавуваат криминални афери, а надлежните институции ниту еден крупен случај не открија затоа што се блокирани од партиите на власт.
Со измените на Кривичниот законик, ДУИ и СДСМ, го урнисаа правниот систем и обезбедија амнестија за актуелните и поранешни носители на високи функции. Овде покрај партиските интереси, треба да се проучат и коруптивните елементи. Уставните измени со кои се предлага Бугарите да бидат внесени во Уставот, веќе година и шест месеци се користат за манипулација на јавноста и дискредитација на политичките опозициони партии пред меѓународниот фактор.
Во оваа насока без да се менува Преговарачката рамка, предлагам сите партии да побараме од Европската унија, со заклучок на Советот на Европската унија, Македонскиот јазик да биде официјален по приемот на Македонија во ЕУ, билатералните прашања вградени во Преговарачката рамка да не можат да бидат основа за блокада на евроинтеграциите на Македонија и да се задолжи Бугарија да ги имплементира одлуките на Меѓународниот суд за човекови права во Стразбур во врска со правата на Македонците во Бугарија на здружување и формирање на културни домови, здруженија и политички партии.
Само со вакви гаранции и реципроцитет можеме да ги заштитиме нашите национални и стратешки интереси. Мораме како народ да покажеме цврстина и единство.
Второ, потребни се коренити реформи на изборните правила и создавање на услови за рамноправен политички натпревар. Македонија да биде една изборна единица како темелна основа за промени и демократизација на државата. Измените на Изборниот законик со кој се предлага Македонија да биде една изборна единица, во јуни месец во првата фаза ги гласаа “за” сите партии, што значи има целосен консензус, но сега повторно овие измени се блокирани од ДУИ. Да ги изгласаме овие измени, како и измените предложени од ОБСЕ и ОДХР и да одиме на избори.
Трето, вториот круг од претседателските и парламентарните избори да се одржат во исти ден, сѐ со цел да не се создадат политички и безбедносни проблеми. Техничката (Пржинска) Влада е непотребна и само на власта ѝ одговара да ја релативизира одговорноста за катастрофалните состојби во државата, колапсот на институциите и секојдневниот грабеж на народот.
Инаку, со актуелниот состав на Владата, прекршен е Охридскиот рамковен договор и Уставот на Македонија, за соодветна и правична застапеност на сите етнички заедници и со технички премиер од редовите на ДУИ, дополнително ќе се наруши етничкиот баланс, што ќе се рефлектира и на меѓуетничките односи.
Мој предлог е оваа Влада, во овој состав, до продолжи со работа до парламентарните избори“, вели Трајанов.