Македонија
Конференција за унапредување на правата на ЛГБТИ-заедницата

Социјалната заштита, здравството, образованието, вработувањето, пристапот до правда, домувањето, спортот и медиумите за ЛГБТИ-лицата се темите за кои се носат конкретни заклучоци на дводневната регионална конференција за унапредување на правата на ЛГБТИ-заедницата во земјата.
Конференцијата е во организација на Министерството за труд и социјална политика во соработка со Советот на Европа, а на неа денеска говореа министрите за труд и социјална политика, за внатрешни работи и за здравство, Мила Царовска, Оливер Спасовски и Венко Филипче, како и претставничката од Советот на Европа, Елени Цецеку, и Билјана Гинова, копретседавач на ЕРА.
Министерката за труд и социјална политика, Мила Царовска, истакна дека годинава е направен историски чекор напред со носењето на новиот Закон за спречување и заштита од дискриминацијата, кој се темели на Уставот на Република Северна Македонија, во кој се утврдени основните слободи и правата на човекот и граѓанинот. Ја ратификувавме Истанбулската конвенција за спречување на сите форми на насилство и отворивме шелтер-центар за заштита на жртви од насилство.
„Свесни сме дека сè уште се потребни значителни напори за спротивставување на нетолеранцијата кон ЛГБТИ-заедницата. Позитивните промени можеме да ги донесеме само заедно бидејќи секој од нас има улога и општествена одговорност. Токму како резултат на оваа конференција ќе имаме акциски план за унапредување на правата на ЛГБТИ и на национално и регионално ниво, кој ќе можеме понатаму да го користиме за носење стратегија за надминување на хомофобијата и трансфобијата. Остануваме посветени на зајакнување на владеењето на правото и унапредување на квалитетот на животот за сите“, рече Царовска.
Министерот за внатрешни работи, Оливер Спасовски, рече дека кога се говори за еднаквиот пристап до правдата, нема никаква дилема – секогаш се тргнува од фундаменталното уставно-правно начело на еднаквост пред законите. Дополнително, со дефинирањето на кривичното дело омраза како кривично-правно дејство, насочено, меѓу другото, и кон припадници на ЛГБТ-заедницата, во Кривичниот закон на РСМ од крајот на минатата година, се овозможи натамошно продлабочување и прецизирање на постапките и процедурите на полициското работење во таквите случаи.
„Убеден сум дека од огромна важност е да се допре до секој поединец во преиспитување на предрасудите, на штетните застарени практики и поведенија, на дискриминацијата по кој било основ, вклучително и по основ на сексуалната ориентација на луѓето. Искрено, очекувам оваа конференција да даде своја квалитетна контрибуција во таквите наши напори за градење правично, просперитетно општество за сите“, истакна министерот Спасовски.
Министерот за здравство, Венко Филипче, во обраќањето истакна дека здравствените работници треба да осигурат оти секое лице во секое време ќе добие соодветна здравствената заштита, без никаква дискриминација.
„Сакам да нагласам дека со новиот Закон за спречување и заштита од дискриминацијата основите на сексуална ориентација и родов идентитет се експлицитно наведени, при што се забранува секаква дискриминација на трансродовите лица во повеќе области наведени во законот, меѓу кои и областа на здравството, работните области, образованието и други области. Имено, со усвојување на овој закон сите министерства се задолжени во рок од две години да ја хармонизираат својата легислатива со новиот концепт на недискриминација, кој е хармонизиран со ЕУ-директивите и меѓународните стандарди“, рече министерот Филипче.
Претставничката од Советот на Европа, Елени Цецеку, истакна дека со унапредувањата на правата на ЛГБТИ, невидливите ги правиме видливи, а тоа може да се нашите деца, соседи, пријатели…
„Во изминатите 5 години како дел од Советот на Европа можев да видам позитивен напредок во сите 25 земји членки, но овој напредок е кревок и не сметаме дека сме ја добиле битката. Со самото тоа што имаме тројца министри на конференцијата, кои работат на промоција на правата на ЛГБТИ, сме постигнале многу, но општеството дава отпор и исто така и верските лидери, кои се обидуваат да ги наметнат верските убедувања. Овие убедувања не мора секогаш да се прифатат. Советот на Европа е ваш партнер и ваш поддржувач во унапредувањата на правата на ЛГБТИ-лицата“, рече Цецеку.
Билјана Гинова, копретседавач на ЕРА, ја нарече конференцијата историска бидејќи кај земјите од регионот се забележува напредок во унапредувањето на правата на ЛГБТИ-лицата.
„Во времето кога ја основавме ЕРА како мрежа, кога разговаравме дека вмрежувањето на НВО мора да оди паралелно со вмрежувањто на владите при унапредувањето на пристапот до права за ЛГБТИ-луѓето, во земјата владееше трансфобичен период, а видете каде сме денес“, рече Гинова.
Гинова ги повика присутните, граѓаните и поддржувачите в сабота гордо да маршираат, со што ќе ѝ се спротивстават на дискриминацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Димитријевиќ: За партиски и бизнис интереси Стефковски и ВМРО-ДПМНЕ ја задолжија Гази Баба со пет милиони евра

Од една од најбогатите општини во државата, градоначалникот Бобан Стефковски и ВМРО-ДПМНЕ, за помалку од година и пол направија задолжена општина, без визија за развој, без проекти и решенија за граѓаните. Вчера, Стефковски и Советот предводен од ВМРО-ДПМНЕ ја задолжија Гази Баба за пет милиони евра, преку таканаречена општинска обврзница, истакна Александар Саша Димитријевиќ, координатор на советничка група на СДСМ во Советот на Општина Гази Баба.
Стефковски, додаде тој, наследи полна општинска каса со 3,2 милиони евра, како и низа на започнати проекти за кои не требаше да потроши денар, затоа што тие веќе беа финансирани од претходно.
„Стефковски да одговори каде во рок од само една година ја потрошил оваа заштеда, за денес да мора да ги задолжува жителите на Гази Баба. Градоначалникот и советниците од ВМРО-ДПМНЕ вчера ја задолжија општината без да ги наведат проектите што ќе се финансираат од задолжувањето, без да го наведат рокот на отплата, без да ја објавата каматната стапка. Едноставно, Стефковски има дискреционо право како сака да ја задолжува општината“, нагласи Димитријевиќ.
Оценува дека со издавањето на оваа обврзница, која може да ја купи секој, се отвора простор одредени компании и бизнис групи преку финансирањето на обврзницата да вршат притисок врз работата на градоначалникот и Советот.
„За пет милиони евра, Гази Баба лесно може да стане заложник на нечии бизнис интереси, на одредени групи кои потоа може да диктираат носење урбанистички планови и тенедерски постапки. Освен задолжување, масовна партизација и трошење на парите на граѓаните за непродуктивни цели, Стефковски и ВМРО-ДПМНЕ не сработеа ништо во Гази Баба. Играјќи по нотите на Христијан Мицкоски, ВМРО-ДПМНЕ ја турна Гази Баба во безидејност и бесперспективност, потенцира координаторот на советничката група на СДСМ во Советот на Општина Гази Баба.
Македонија
ИНТЕГРА: Случајот со претепаниот Пендиков е само вовед во провокациите што ќе следуваат

„Случајот со претепаниот Христијан Пендиков е само вовед во провокациите што ќе следуваат како што се доближуваат 4 февруари и прославата за нашиот апостол на македонската револуционерна борба, Гоце Делчев. ИНТЕГРА – Македонска конзервативна партија ги алармира безбедносните служби да преземат законски мерки во сите правци, особено во делот на инфилтрација на моќна странска служба, која работи на спречување на евро-атлантската траекторија на Македонија преку држење во состојба на порозност на јужното крило на НАТО и попречување на ЕУ-членството на Македонија“, се вели во партиското соопштение на ИНТЕГРА.
Од таму велат „за едно од можните радикални сценарија постои сериозно сомневање дека е во корелација со скорешните закани од поставени бомби во училиштата. Сомневањата водат до препоставена процена за висока безбедносна закана во таа насока, особено на релација албански екстремизам – македонски радикален национализам, обата поттикнати од истиот центар на политичка моќ“.
„На ова сценарио подолго време предупредува Љупчо Ристовски, а времето и условите се идеални за сурова радикализација на тоа. Следете ги мотивот и бенефитот од исходот при една таква разврска и ќе дојдете до целите и извршителите на такво радикализирано сценарио. Патем, да си прашаме јавно, дали ВМРО-ДПМНЕ се огради од сценаријата на радикализирање на внатрешните односи со последици врз ЕУ-перспективите на Македонија, преку случајот на деликвентот Пендиков, кој патем е нивен истакнат член?“, се вели во соопштението.
Македонија
(Видео) Стоилковски: Затворите се решето во кое останува само оној што нема конекции со СДС

„Затворите се решето во кое останува само оној што нема конекции со СДС. Одговорни за тоа се затворските управи и служби поставени од СДС, во чија хиерархија доминираат луѓе од таканареченото обезбедување на партиските собири на СДС. Во само еден месец најмалку три бегства се случија на територијата на Скопје. Се посочува на врски меѓу избеганите и СДС, а молкот и немањето санкции упатува на сомнеж за намерни системски пропусти“, рече денеска на прес-конференција портпаролот на ВМРП-ДПМНЕ, Наум Стоилковски.
Тој напомена дека „Македонија е во еден многу тежок период, во кој СДС ја втурна, и период во кој и од најмал инцидент единствен бенефит ќе има токму СДС на сметка на длабоките сериозни последици за државата. Оттука, од јавен интерес е СДС и Владата да одговорат дали станува збор за смислено сценарио во кое побегнатите се пуштени да предизвикаат инциденти во државата?“
„Дали бегствата на човек, член на СДС, со фотоалбум со половина Влада, претседател на држава и цело раководство на СДС, како и на поранешен полицаец – насилник и наркодилер, двајцата од затворот во Шуто Оризари, што мина без никаква јавна одговорност или санкција, не се намерни пропусти за теснопартиски интереси на СДС, дали не се побегнати за можеби да предизвикаат, инсценираат или организираат инцидент на 4 февруари? Дали бегството без последици за затворската служба и администрација, без одговорност, со можност за организирање инцидент, значи награда и за избеганите и за затворските службеници?“, праша Стоилковски.