Министерот за внатрешни работи, Оливер Спасовски вечерва на социјалните мрежи објави дека добил позитивен тест за Ковид-19.

„Би сакал да ве информирам дека и покрај строгото почитување на мерките коишто ги преземам за моја лична и заштита на луѓето околу мене од почетокот на пандемијата, вечерва добив позитивен резултат за Ковид-19“, напиша Спасовски на „Фејсбук“.

Министерот додава дека клиничката слика му е добра, само со благи симптоми и дека веќе е во домашна самоизолација.

Спасовски досега два пати беше во самоизолација поради контакти со лица позитивни на Ковид-19, но тогаш резултатите од тестирањата му беа негативни.

Тројца новинари се под судски прогон и притисок од власта затоа што објавуваат материјали од јавен интерес кои ги добиле од свиркачи, посочи членот на ВМРО-ДПМНЕ, Александар Николоски.

„Новинарите кои објавуваат материјали за криминалите на власта се под притисок и сметам дека најмалку што може да направиме како пратеници е да дадеме поддршка на новинарите коишто во моментов се или под судски прогон, или веќе имаат донесени судски пресуди за изнесување во јавност информации коишто до нив стигнале од укажувачи“. рече тој во своето обраќање.

Според Николоски, иако судот проценил дека материјалите се таканаречена државна тајна, новинарите одлучиле дека јавниот интерес е пред државната тајна и заради тоа решиле да ги публикуваат.

„Ова е лоша пракса, ниту една власт не издржала на сила“, додаде тој.

Владата на денешната седница донесе одлуки за именување директори, в.д. директори и членови на управни одбори на повеќе јавни претпријатија и акционерски друштва во државна сопственост.

Како што информираат од владината прес-служба одлуките се донесени врз основа на предлозите на владината Комисија за именувања.

„Согласно овие предлози, Владата ја прифати оставката на Борче Хаџиев и го разреши од должноста директор на Фонд за осигурување на депозити, на негово барање, а за в.д. директор го именуваше Амир Шабани.

Прифатена е оставката и на Армир Садики од должноста в.д. директор на Бирото за јавни набавки и за директор на Бирото е именуван Борче Хаџиев.

Владата заклучи да му препорача на Управниот одбор на Фондот на пензиското и инвалидското осигурување за в.д. директор на Фондот да ја избере Билјана Јовановска, а за в.д. заменик-директор да го избере Шаип Зенељи.

Прифатена е оставката на Орхан Рамадани од должноста директор на Фондот на здравствено осигурување и Фатон Ахмети е именуван за в.д. директор на Фондот, до именување на директор по распишан конкурс, но не подолго од шест месеци.

Владата го именуваше и Бесир Деари за в.д. заменик на директорот на Управата за финансиска полиција, а Блерим Идризи за в.д. заменик на директорот во Државниот завод за индустриска сопственост“, се наведува во соопштението.