На показната вежба чие што сценарио беше замислено како разбојништво извршено од страна на тричлена група во јавна установа – музеј, од каде што се земени вредни артефакти, припадници на повеќе опрганизациони единици (Одделите за специјални полициски операции и за воздухопловни сили, како и припадници на СВР Скопје и Регионалниот центар за гранични работи Север) презентираа полициска операција на лоцирање и елиминирање на разбојниците.

„Ефикасно изведените вежбовни активности се плод на континуирана професионална и стручна едукација, тренинг и обука на полициските службеници, кои пак се јасен показател дека полицијата е подготвена да ги заштити јавниот ред и мир, сигурноста на граѓаните, безбедноста на државата во целина“, рече министерот за внатрешни работи Оливер Спасовски во обраќањето до припадниците на повеќе полициски единици при МВР, учесници на оперативно-тактичката вежба „Плен“, што се одржа во Полицискиот центар „Ѓорче Петров“ во Скопје.

Министерот Спасовски вежбата ја проследи заедно со неговиот косовски колега министерот за внатрешни работи Екрем Мустафа, кој ја предводеше делегацијата од соседната држава, со која денеска беше потпишан и Протоколот за соработка меѓу двете министeрства за создавање на работни тимови со цел решавање на прашањата кои се појавуваат во текот на меѓусебната соработка.

„Интенцијата е да се динамизира и продлабочи меѓусебната соработка во многу области на полициското делување од заеднички интерес за нашите две земји и нашите граѓани, како и размената на информации за конкретни случаи во соработката“, потенцираше министерот Спасовски.

Истакнувајќи ја важноста на припадниците на полицијата, министерот Спасовски пред учесниците на вежбата ја подвлече заложбата за што поквалитетни предуслови за работа: „Со задоволство можам да ве известам дека во наредниов период, а најдоцна до крајов на 2019, ќе следи целосна реконструкција на кошаркарските и одбојкарските игралишта, овде, во полицискиот центар, а на почетокот на 2020 се очекува тие да бидат ставени во функција. Планирано е на почетокот на ноември да ги промовираме и новите десет интервентни комбиња наменети за единиците ЕБР, ПЕП и ЕСЗ, а до првата половина на декември веќе е нарачана и ќе пристигне спортската опрема за сите припадници на единиците ЕБР, ЕСЗ и за ПЕП, како и 300 комплети опрема за интервенции при нарушен јавен ред и мир, кои до крајот на годината ќе бидат испорачани“.

Косовскиот министер за внатрешни работи, Екрем Мустафа изјави дека обвинетите во случајот „Монструм“ Алил Демири и Африм Исмаиловиќ ќе бидат екстрадирани кога ќе бидат завршени сите законски процедури во Косово.

По Алил Демири и Африм Исмаиловиќ, властите во Скопје распишаа меѓународна потерница и од Косово побараа да бидат екстрадирани во земјава.

Основниот кривичен суд Скопје ги одби барањата за укинување на мерката притвор на поранешната специјална јавна обвинителка Катица Јанева и на Бојан Јовановски – Боки 13, кои се осомничени во случајот „Рекет“.

„Кривичниот совет на одделението за организиран криминал и корупција при Основниот кривичен суд Скопје постапувајќи по предлози на обвинетите К.Ј. и Б.Ј., поднесени од нивните бранители, за укинување на мерката притвор определена со решенија на судии на претходна постапка, ценејќи ги фактите и околностите во предлозите донесе решенија со кои: -Предлогот на обвинетата К.Ј. за укинување на мерката притвор определена со решение на судија на претходна постапка, а продолжена со решнија на кривичен совет, поради постоење на причините предвидени во чл.165 ст.1 т.1 од ЗКП, со прифаќање на гаранција или определување на мерки на претпазливост – се одбива како неосновано. Предлогот на обвинетиот Б.Ј. за укинување на мерката притвор определена со решение на судија на претходна постапка, а продолжена со решенија на кривичен совет, и замена со поблаги мерки за претпазливост – се одбива како неосновано“, се наведува во соопштението од Кривичниот суд.

Против овие решенија, странките имаат право да поднесат жалба во рок од три дена до Апелацискиот суд – Скопје.