Светска банка ќе продолжи да ги поддржува напорите на Владата и на Министерството за образование (МОН) за унапредување на квалитетот и конкурентноста на националниот образовен систем. Ова е заклучокот од денешниот состанок на министерката за образование и наука Мила Царовска и Масимилијано Паолучи, директор на канцеларијата на Светска банка во Северна Македонија и Косово, информираат од ресорното министерство.

„Со поддршка на нашите партнери, убедена сум дека Концепцијата за основното образование, ќе биде движечки фактор во реформирањето на сите сегменти на образовниот систем во нашата земја. Добро испланирани и координирани реформи во полето на образованието, ќе придонесат за развој не само на единката, туку и на целокупното општество“, рекла Царовска на средбата.

Директорот на канцеларијата на Светска банка, ја потврдил поддршката за предложените реформи во основното образование, за кои напоменал дека се во целосна согласност со препораките на Светска банка.

Според Банката, инвестирањето во основното образование е докажано дека дава поголеми резултати споредено со подоцнежните степени на образование и обука и има одлучувачки придонес во развојот на човечкиот потенцијал, објаснуваат од МОН.

По претставка на граѓани, Државниот инспекторат за животна средина врши интензивен надзор врз правни субјекти на територијата на Националниот парк Маврово. Досега се инспектирани 18 објекти и утврдено е дека девет не поседуваат Елаборат за заштита на животната средина.

Од ДИЖЗС наведуваат дека голем број угостителски објекти директно ги испуштаат отпадните води во Мавровско Езеро или реката Радика, како на пример хотелите „Радика”, „Бистра”, „Спорт”, „Лодге” и „Алпине”.

Помали погони, велат од Инспекторатот, како на пример „ЕуроЕдил”, „Новитет” и „Техно Блок”, сите лоцирани во село Скудриње, исто така, немаат Елаборати за заштита на животната средина и испуштаат отпадни води во реципиент без пречистување.

„Сите субјекти кај кои се најдени неправилности се задолжени, согласно закон, најпрво да ја обезбедат потребната документација, одобрени Елаборати за заштита на животната средина, дозволи за испуштање на вода во реципиент, проекти за изведба на пречистителни станици и слично, а потоа ќе добијат соодветни рокови за да ги применат сите неопходни мерки за спречување на загадувањето. До крајот на март ќе се изврши надзор врз сите правни субјекти и ќе се преземат мерки за корекција на сите неправилности“, соопшти Државниот инспекторат за животна средина.

Од таму најавија дека ќе продолжат со активности што ќе овозможат вистинска заштита на природното богатство во Националните паркови.

Полицијата вчера казнила 686 лица за неносење заштитна маска.

„Во текот на изминатото деноноќие (4/5.3.2021) на територијата на Република Северна Македонија во однос на мерката за носење лична заштита на лицето регистрирани се 686 прекршоци“, соопшти Министерството за внатрешни работи и апелира до граѓаните да ги почитуваат мерките и протоколите донесени од Владата со цел справување со Ковид-19.