Македонија
МВР со детали за акцијата во која беше приведен Миле Јанакиески и уште 9 лица
Одделот за сузбивање организиран и сериозен криминал при МВР во координација со Јавното обвинителство за гонење организиран криминал и корупција до надлежното обвинителство поднесе кривична пријава против 11 лица.
Станува збор за М. Ј. (40) од Скопје, поранешен министер за транспорт и врски, Д. Д. (44) од Скопје, Б. Д. Д. (41) од Скопје, В. С. (51) од Скопје, А. Ј. (36) од Велес, Д. М. (32) од Скопје, вработени во Министерството за транспорт и врски, Е. Р. (53) од Скопје, државен правобранител за подрачјето на град Скопје од 23 јули 2007 до 30 октомври 2018, поради сомнение за сторено кривично дело злоупотреба на службената положба и овластувањето, С. К. (54) од Скопје, вработена во Агенција за катастар на недвижностите – Скопје, поради постоење основано сомнение за сторено кривично дело несовесно работење во службата, Р. П. (64) од Скопје, нотар за подрачјето на основните судови на градот Скопје, поради постоење основано сомнение за сторено кривично дело злоупотреба на службената положба и овластувањето, и неговиот колега, нотарот Л. С. (59) од Скопје, кој е осомнилен за злоупотреба на службената положба и овластувањето, како и за М. Ј. (51) од Скопје, сопственик и управител на фирма од Скопје.
Во денешната акција на полицијата приведени се 10 осомничени.
„Надлежниот јавен обвинител донесе наредба за спроведување истражна постапка против 11 лица за кои постои основано сомнение дека сториле кривично дело злоупотреба на службената положба и овластувањето од чл. 353, ст. 5, а едно од лицата несовесно работење во службата од чл. 353-в, ст. 3 во врска со ст. 1 од Кривичниот законик, при што со своите дејства му предизвикале штета на буџетот во вкупен износ од 162.644.745,00 денари или 2.647.802 милиони евра.
Во предистражната постапка е утврдено дека во временскиот период од 21.12.2010 година до 8.8.2018 година првоосомничениот заедно со петмина административни службеници со неизвршување на своите службени должности постапиле спротивно на чл. 17, ст.4 од Законот за изменувањето и дополнувањето на Законот за градежното земјиште што се однесува на чл. 74, ст. 1, т. 7 од Законот за градежното земјиште. Имено, во наведениот период осомничените подготвиле и потпишале четири договори за отуѓување градежно земјиште во сопственост на државата.
За два од договорите, кои се однесуваат за земјиште во вкупна површина од 4.090 м2, наменето за изградба на хотелски комплекси, со вкупна вредност од 20.450.000,00 денари и за земјиште наменето за изградба на објект со комерцијални и деловни намени со вкупна површина од 1.046 м2, во вредност од 97.382.600,00 денари, осомничените не ја следеле реализацијата на наведените договори и анекс-договори.
Наместо поради неисполнување на договорните обврски еднострано да ги раскинат договорите и да го вратат градежното земјиште во сопственост на државата, како и да извршат наплата на договорната казна од купувачот за целиот период од денот на истекот на рокот за обезбедување на одобрението за градење, тие постапиле спротивно на своите овластувања и овозможиле купувачите да стекнат противправна имотна корист на штета на буџетот на државата во вкупен износ од 25.000.127,00 денари, односно 113.840.268,00 денари за вториот договор.
Другите два договори се склучени со осомничено лице, кое во првиот случај се јавува како физичко лице купувач, а во вториот како сопственик на правно лице. Договорите се однесуваат за земјиште во вкупна површина од 8.745м2, со цена постигната со електронско јавно наддавање во износ од 2.500,00 денари за 1 м2 или вкупна вредност од 21.862.500,00 денари и за земјиште во вкупна површина од 13.675 м2, наменето за изградба на хотелски комплекси, со цена во износ од 71 денар за 1 м2, односно вкупна вредност од 970.925,00 денари постигната со електронско јавно наддавање.
Неводејќи сметка за имотните права и интереси на државата и неизвршувајќи ја својата службена должност, едно од осомничените лица во својство на службено лице, покрај тоа што првично констатирало правни пречки за склучување анекс на договорот и побарало тие да се отстранат, ја злоупотребило својата службена положба и овластувањето и подготвило мислење без да обезбеди дополнителни докази и без да констатира правни пречки за солемнизација на предложениот текст на еден од анекс-договорите. Со своите дејства осомниченото лице постапило спротивно на чл. 2 од Законот за државното правобранителство.
Со неизвршување на својата службена должност двајца осомничени како службени лица што вршат работи од јавен интерес постапиле спротивно на законот. Едниот, иако приложената документација не била комплетна, извршил потврдување на приватната исправа и притоа го изменил текстот на еден од договорите за отуѓување градежно земјиште и анексот на договорот во делот што се однесува на реалниот товар над земјиштето.
Наместо да констатира еднострано раскинување на договорите и враќање на градежното земјиште во сопственост на државата, во случај на неисполнување на договорните обврски дефинирал отуѓувачот да може да наплати само договорна казна, без прецизирање како државата ќе го наплати своето побарување доколку купувачот не располага со друг имот.
Второто осомничено службено лице со умисла помогнато од осомничениот сопственик и управител на правното лице постапило спротивно на одредбите од договорот за отуѓување, како и спротивно на чл. 43 и чл. 46 од Законот за нотаријатот. Иако било запознаено, не потврдило и не го евидентирало постоењето право на реален товар во корист на отуѓувачот – РМ.
Постапувајќи спротивно на своите службени овластувања, осомниченото лице извршило и солемнизација на нов договор – договор за дар на недвижен имот за едно од предметните земјишта, кој бил заверен и во кој е констатирано дека дародавецот – осомничениот бил сопственик на недвижноста што ја подарува и дека на неа немало воспоставено никаков правен товар. Со своите дејства осомниченото лице овозможило предметното земјиште да се пренесе во сопственост на трети лица.
Осомничениот сопственик на правно лице, иако знаел дека не ги исполнил обврските од договорот за отуѓување градежно земјиште, го известил Министерството за транспорт и врски за почнување со градежни активности, а кои ги прекинал со невистинито образложение и во два наврата доставил и вештачења изготвени по негово барање со прикажана состојба на земјиштето спротивно од констатираното од страна на Општина Центар. При солемнизацијата на договорот за дар на недвижен имот осомничениот дал лажна изјава дека градежното земјиште што е предмет на подарок, не е оптоварено со никаков правен товар.
Со пропуштање должен надзор – без да утврди дека во приватната исправа договорот за отуѓување градежно земјиште било предвидено прибележување реален товар над земјиштето во корист на отуѓувачот, осомничено службено лице несовесно постапило во вршењето на своите овластувања и не ги почитувало одредбите од чл. 171 од Законот за катастар на недвижностите по кои било должно да постапува. Без да прибележи товар над земјиштето, осомниченото службено лице извршило промена на сопственоста над земјиштето и во јавните книги на катастарот во корист на осомничениот сопственик на правното лице.
Со извршените дејства шестмина од осомничените сториле по едно кривично дело злоупотреба на службената положба и овластувањето од чл. 353, ст. 5 во врска со ст. 1, двајца осомничени сториле по едно кривично дело злоупотреба на службената положба и овластувањето од чл. 353, ст. 5 во врска со ст. 4 в.в. со ст. 1, еден осомничен сторил кривично дело злоупотреба на службената положба и овластувањето од чл. 353, ст. 5 во врска со ст. 1 во врска со чл. 24 од Кривичниот законик и едно лице е осомничено дека сторило кривично дело несовесно работење во службата од чл. 353-в, ст.3 во врска со ст. 1 од Кривичниот законик.
Ценејќи дека се исполнети условите, надлежен јавен обвинител до судијата на претходна постапка при Основниот кривичен суд Скопје достави предлог за определување на мерката притвор за сите осомничени. Истовремено обвинителот во согласност со член 118 и член 120 од Законот за кривичната постапка достави и предлог за определување мерки за обезбедување имотно-правно побарување во висина на штетата“, информираат од МВР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ѓорѓиева: Со измените на Кривичниот закон се враќа правдата во државата
Весна Ѓорѓиева, пратеничка од редовите на ВМРО-ДПМНЕ, се обрати денес на 80-та седница во Собранието на која се расправаше и Предлог на Законот за изменување и дополнување на Кривичниот законик, при што истакна дека измените се однесуваат на суштинското прашање, а тоа е да ја вратат правдата и функционалноста на системот преку појасни одредби. Според неа, без функционален и праведен систем не може да постои ниту стабилна држава, ниту сигурност за граѓаните.
,,Нашите граѓани ќе ја гледаат сигурноста кога ќе биде сигурен правниот систем во државата“, рече Ѓорѓиева.
Таа се осврна на членот 353 од предлог законот, со кој како што посочи, се враќа суштината на кривичното дело злоупотреба на службена положба.
,,Се враќа суштината на злоупотреба на службена положба, пречекорување на овластувањата или неизвршување на службена положба. Со овој закон се распушта претходниот закон во 2023 година кој беше донесен од СДС и ДУИ, каде што беше разводенет, односно каде што казните беа намалени, дејствијата беа потешко докажливи, а роковите за застареност беа скратени“, истакна Ѓорѓиева.
Според неа, законот не е наосочен против оние кои работат чесно, туку против корупцијата и злоупотребата на службената положба.
,,Држава без кривичен закон е како држава без рбтет. А држава без рбет секој може да ја скрши. Почитувани граѓани, овој закон е порака до секој што мисли дека државата е приватен бизнис, овој закон е порака дека времето на неказнивост завршува и да, можеби на некому тоа не му одговора, но на народот тоа му одговара, и тоа го бара од нас“, вели Ѓорѓиева.
Македонија
Ангелова: Измените на Кривичниот законик се клучни за посилна заштита на жените од насилство и зголемување на сообраќајната безбедност
На денешната собраниска седница се обрати пратеничката од редовите на ВМРО-ДПМНЕ, Емилија Ангелова која истакна дека измените во Кривичниот законик претставуваат суштински чекор за враќање на довербата на граѓаните за правна држава каде криминалот и корупцијата нема да бидат толерирани, туку ќе бидат соодветно санкционирани.
„Овој предлог-закон за изменување и дополнување на Кривичниот законик претставува неопходен и одговорен чекор кон враќање на правната сигурност, владеењето на правото и довербата на граѓаните во институциите. Со него државата јасно ја испраќа пораката дека корупцијата, злоупотребата на службената положба, организираниот криминал и насилството нема да бидат толерирани, ниту релативизирани преку законски празнини и непропорционално благи санкции“, рече Ангелова.
Пратеничката посочи дека ќе се постигне подобра заштита на приватноста на граѓаните, безбедност во сообраќајот, посилна заштита на жените од семејно насилство како и јасна правна рамка за гонење на злоупотреби во јавните набавки.
„Со предложеното решение ќе се постигне враќање на превентивната и репресивната функција на казненото право особено кај делата злоупотреба на службена положба, организиран криминал и корупција. Јасна и ефикасна правна рамка за гонење на злоупотреби во јавните набавки, подобра заштита на приватноста и достоинството на граѓаните, посилна заштита на жената од насилство,семејно насилство со гонење по службена должност во согласност со Истанбулската конвенција, подигнување на безбедноста во сообраќајот преку поостри санкции. Се зголемува и јавната безбедност на патиштата“, вели Ангелова.
Пратеничката Ангеловска се осврна на клучните поенти за жените истакнувајќи дека со овој предлог-закон жената е заштитена од дигитално насилство, од семејно насилство, а со тоа постигнување на реална заштита и сигурност на жената во државата.
„Посилна институционална заштита од насилство врз жените и семејно насилство со гонење по службена должност државата ја трга одговорноста од жртвата и јасно застанува на страната на жената. Заштита на приватноста и телесниот интегритет на жените, инкриминирање на злоупотребата на интимни снимки директно ги штити жените од уцени дигитално насилство и јавно понижување. Европски стандарди, европска заштита за жените законот директно ги имплементира европските и меѓународните обврски и ја позиционира како партнер во борбата за еднакви можности и човекови права“, рече Ангелова.
Македонија
Утре променливо облачно време со температура до 7 степени
Времето утре ќе биде променливо облачно со сончеви периоди. Во западните делови ќе дува умерен западен ветер, информира УХМР.
Минималната температура ќе биде во интервал од -12 до -3, а максималната ќе достигне од 0 до 7 степени.
Во Скопје, променливо облачно и студено со сончеви периоди. Ќе дува слаб ветер од променлив правец.
Минималната температура ќе се спушти до -9, а максималната ќе достигне до 3 степени.
До крајот на седмицата ќе се задржи стабилно и суво време. Од среда по котлините ќе има услови за појава на магла, а температурата ќе биде во благ пораст.

