Претседателката Гордана Сиљановска-Давкова денеска ја прими раководителката на Сеизмолошката опсерваторија при Природно-математичкиот факултет во Скопје, Катерина Дрогрешка, која ја информираше за работата, активностите и проблемите на најстарата сеизмолошка опсерваторија во државава, основана во 1957 година.

Дрогрешка укажа дека опсерваторијата се наоѓа во драматична состојба заради недостиг на сеизмолошки инструменти и кадар, соочена со опасност од затворање на сеизмолошките станици добиени и користени во рамките на апликативен проект.

Со оглед на националното значење на Сеизмолошката опсерваторија, соговорничките ги разгледаа можностите за надминување на енормните проблеми.

За претседателката, стабилната и научно базирана сеизмолошка мрежа има стратешка важност во превенција, навременото информирање и заштита на населението од земјотреси. Таа ја истакна важноста за македонскиот образовен систем на едукативните програми и работилници организирани од опсерваторијата.

Двете се заложија за континуирано подигање на свеста за ризикот од земјотреси и за нужноста од институционална поддршка на научно-истражувачката и апликативната дејност во сеизмологијата.

Владата на денешната седница донесе предлог за измени на законот за пензиско и инвалидско осигурување и одлуки за набавка на пченица и оризова арпа за стоковите резерви.

Го усвои предлог законот за изменување на Законот за пензиско и инвалидско осигурување, со што следи покачување на пензиите.

Дополнително, Владата согласно последните измени на Законот за стокови резерви, денес донесе 2 одлуки за набавка на пченица и оризова арпа од домашното производство.

Одлука за набавка на 9000 тони меркантилна пченица од реколта 2025 година по цена од 13 денари без ддв.

Количината ќе може да се откупи од секој регистриран производител поединечно од минимум 5 до максимум 30 тона.

Одлука за набавка на 2400 тони оризова арпа од реколта 2024 по цена од 37 денари без пресметан ддв.

Набавката ќе се врши од сите регистрирани производители и количината која ќе се откупи од секој регистриран производител поединечно ќе биде минимум 3 до максимум 20 тони.

„Како Влада го штитиме домашното производство.

Оваа година имаме зголемени површини под пченица, од кој очекуваме просекот да биде многу поголем од предходни години.

Согласно евиденцијата на министерство за земјоделство, шумарство и водостопанство, оваа година жетвата ќе се изврши на 70 000 хектари што би значело дека се очекува да ги задоволиме потребите од нашето производство“, соопштија владините служби.

Имајќи го предвид кумулативниот ефект на продолжениот топлотен бран, владата ја усвои информацијата и издаде препораки до работодавачите кои важат од 23.07 до 26.07, со кои се препорачува ослободување од работни обврски за бремени жени и лица постари од 60 години, како и овозможување работа од далечина, флексибилно и двократно работно време каде што е изводливо.

Министерството за здравство информира дека согласно најновата прогноза од Управата за хидрометеоролошки работи (УХМР), топлотниот бран со температури над 40°C ќе продолжи до 26 јули 2025 година.

„Имајќи го предвид кумулативниот ефект на продолжената изложеност на високи температури врз здравјето на ранливите категории на население, Владата, на предлог на Министерството за здравство усвои дополнителни препораки за работодавачите, кои ќе важат во периодот од 23 до 26 јули 2025 година:
-Се препорачува ослободување од работни обврски за бремени жени и лица постари од 60 години.
-Каде што е можно, да се овозможи работа од далечина, флексибилно или двократно работно време.
-Овие препораки не важат за вработените во критичната инфраструктура, како што се здравството, полицијата, армијата, транспортот, енергетиката и јавните комунални претпријатија.

Дополнително, Владата потсетува на веќе важечките мерки од акцискиот план:
• Одложување на работниот процес од 11:00 до 17:00 часот за работници изложени на директна топлина.
• Обврска за обезбедување микроклиматски услови за работа – простории со температура до 25°C, освен каде што природата на работата не дозволува поинаку.
• Континуирано информирање на јавноста преку институциите.
• Активирање на интерните протоколи за работа во вонредни услови во сите здравствени установи, домови за стари лица и образовни институции.

Сите останати институции опфатени со Акцискиот план се повикуваат да продолжат со спроведување на своите обврски и активности. Истовремено Министерството за здравство апелира населението да се придржува до постоечките препораки за самозаштита:
• Престојувајте во разладени простории, особено од 11:00 до 17:00 часот.
• Внесувајте доволно течности, избегнувајќи алкохол и засладени пијалоци.
• Носете лесна и светла облека, користете заштита за глава и очи.
• Избегнувајте физичка активност во најтоплите часови.
• Посветете внимание на деца, стари лица, хронично болни и бремени жени – тие се особено ранливи.
• При симптоми како вртоглавица, главоболка, гадење или забрзан пулс – веднаш побарајте медицинска помош.
• Одложете активности на отворено во критичниот дел од денот.
• Обезбедете разладени простории (до 25°C) на работното место и во домот“.

Министерството за здравство, како што соопштуваат од оваа институција, продолжува со дневен мониторинг на состојбата и ќе постапува соодветно согласно проценките и потребите.

Фото: принтскрин