Ријасетот на Исламската верска заедница на денешната седница донел одлука да се разреши Сулејман ефенди Реџепи од позицијата реис-ул-улема, претседател на Исламската верска заедница.

Одлуката била донесена со двотретинско мнозинство.

„Врз основа на записникот на вонредната седница на мнозинството на Ријасетот на ИВЗ на Република Северна Македнија, одржана на 27.5.2020 година, со почеток во 10 часот, ние, долупотпишаните, врз основа на член 36 и 58 на Уставот на ИВЗ, кои го сочинуваат повеќе од двотретинското мнозинство на Ријасетот на Република Северна Македонија, едногласно донесовме одлука за разрешување на господин Сумејман ефенди Реџепи од позицијата претседател на ИВЗ“, рече ефенди Шаќир Фетаху, кој истовремено е поставен за вршител на должноста претседател на ИВЗ до подготвување на новите избори за избор на претседател на ИВЗ.

Одлуката стапува во сила од денеска. На неа се потпишани самиот Фетаи, скопскиот муфтија Ќенан Исмаили, тетовскиот муфтија Ќани Несими, муфтијата на Куманово, Абедин Имери, и на Струга, Салим Сулејмани.

Истовремено, на оваа одлука се потпишани и Мустафа Даути, претседател на хуманитарната организација која функционира во склоп на ИВЗ, „Хилал“, професор Шабан Сулејмани, декан на Факултетот за исламски науки, директорот за дијаспората, Селвер Џемаили, членот на Ријасетот, Фадил Рамадани и други.

Претседателот на ВМРО-ДПМНЕ, Христијан Мицкоски, смета дека третата вонредна состојба била прогласена за да се донесе нова уредба, која треба на лидерот на СДСМ, Зоран Заев, да му послужи за да ги поткупи граѓаните за поддршка за следните избори.

Тој го повтори ставот дека вонредната состојба треба да се прогласи по консултација со политичките партии.

Во однос на изборите, Мицкоски и натаму бара датумот да биде одреден со консензус од сите политичари.

„Нашиот принцип е јасен дека датата за следните парламентарни избори треба да биде донесена со консензус на сите политички партии што седеа на таа маса уште на првата лидерска средба што ја организира претседателот Пендаровски, без разлика што во меѓувреме се видоизмени содржината на масата и некои од тие што беа на таа маса се во коалиција, ние стоиме на тој принцип и не бегаме од тој принцип. Исто така, стоиме на тој принцип дека секоја вонредна состојба треба да се носи во консултација со политичките партии иако за време на втората вонредна состојба тој принцип беше напуштен од страна на Владата и претседателот Пендаровски. За втората состојба, ние исто така имавме спротивен став бидејќи ако зборуваме за состојба кога сме ја победиле пандемијата и сме лидери во регионот, не ја гледавме причината за прогласување трета вонредна состојба. Но, очигледно беше јасно дека треба да се донесе нова уредба, која треба на Зоран Заев да му послужи за да ги поткупи граѓаните и да ја добие нивната поддршка за следните предвремени парламентарни избори. Тоа нема да му успее бидејќи граѓаните знаат и никогаш нема да го заборават тоа што го правеше оваа пандемија наречена Зоран Заев и СДСМ во претходните три години, а и овие дополнителни 1.500 евра долг за секое семејство нема да ги заборават граѓаните и жестоко ќе го казнат на следните избори кога и да се одржат“, рече Мицкоски.

Тој рече дека комуникација за одредување на датумот на избори постои, но не сакаше да коментира ништо во врска со неа тврдејќи дека ако има договор меѓу партиите, тоа ќе се соопшти јавно.

„Нашите позиции поврзани со предвремените парламентарни избори ги знае македонската јавност. Нашата позиција дека компромис треба да се постигне во интерес на граѓаните, во интерес на државата, но тоа не треба да биде по цена на здравјето на граѓаните. Канална комуникација постои. Јас не би сакал денеска да изнесувам дополнителни коментари поврзани со тој канал за комуникација што постои бидејќи не сме сите исти и не се занимаваме сите со ваков тип брифинзи. Доколку има договор и кога ќе има договор, ќе ѝ го соопштиме тоа на јавноста. Но, повторно ќе кажам, здравјето на граѓаните треба да биде водилка за сите нас“, додаде Мицкоски.

Тројца починати и 25 новозаболени се регистрирани денеска во државата.

Министерството за здравство информира дека денеска Институтот за јавно здравје регистрира 17 оздравени пациенти, и тоа во: Скопје – 11, Куманово – 4, Тетово – 1 и Велес – 1.

На Клиниката за инфективни болести и фебрилни состојби почина пациент од Струга (58) и пациент од Скопје (47) и двајцата долго време поставени на механичка вентилација. Во ГОБ „8 Септември“ почина пациент од Тетово (41), хоспитализиран на 19 мај.

Во последните 24 часа направени се 622 тестирања, а регистрирани се 25 нови случаи на Ковид-19, и тоа во: Скопје – 14, Куманово – 2, Штип – 4, Прилеп – 1, Тетово – 2, Струга – 1, Велес – 1.

Вкупната бројка на ковид-дијагностицирани во нашата земја од почетокот на епидемијата изнесува 2.039, бројката на оздравени пациенти е 1.470, на починати е 119, а во моментот бројот на активни случаи во земјата изнесува 450. Последната дистрибуција по градови е:
• Скопје – 747, активни 210
• Куманово – 438, активни 33
• Дебар – 51, активни 0
• Штип – 50, активни 15
• Прилеп – 211, активни 47
• Тетово – 179, активни 70
• Струга – 77, активни 9
• Велес – 128, активни 40
• Битола – 28, активни 7
• Охрид – 23, активни 8
• Кавадарци – 5, активни 0
• Гостивар – 22, активни 4
• Гевгелија – 4, активни 0
• Струмица – 3, активен 1
• Крива Паланка – 6, активни 0
• Радовиш – 4, активни 0
• Крушево – 3, активни 0
• Кочани – 31, активни 0
• Пробиштип – 2, активни 0
• Кичево – 2, активни 0
• Неготино – 10, активни 3 (7 заболени лица од ПЕ Неготино се жители на Демир Капија)
• Демир Хисар – 1, активни 0
• Македонски Брод – 2, активни 0
• Пехчево – 3, активни 0
• Делчево – 1, активни 0
• Валандово – 1, активни 0
• Виница – 3, активен 1
• Кратово – 2, активен 1
• Берово – 1, активни 0
• Свети Николе – 1, активен 1

Направените 622 теста се преку: ИЈЗ – 278, Ветеринарниот факултет – 24, „Авицена“ – 20, „Биотек“ – 48, „Филип Втори“ („Жан Митрев“) – 79, „Систина“ со PCR-метода – 54 и МАНУ – 119. Досега во земјата се направени вкупно 26.463 тестирања на Ковид -19.

Од вкупниот број направени тестови во изминатото деноноќие, 251 тест се во рамките на скринингот во градинките и геронтолошките установи. Тестирањата се направени преку центрите за јавно здравје во Кочани, Куманово и во Скопје, а регистриран е еден позитивен случај во геронтолошка установа во Скопје. Досега преку скринингот направени се 2.680 тестирања на Ковид-19, а регистрирани се вкупно три позитивни случаи на вирусот.

На Клиниката за инфективни болести и фебрилни состојби во изминатите 24 часа нема нови приеми, хоспитализирани се вкупно 50 пациенти. На кислородна поддршка се 25, на механичка вентилација е 1 пациент.

Во ГОБ „8 Септември“ примени се 7 нови, а вкупно хоспитализирани 26 пациенти. На респиратор се 6, a со потешка клиничка слика се уште 8 пациенти.

Во болницата во Битола хоспитализирани се 4 пациенти, а на домашно лекување се следат уште 4 пациенти. Во болницата во Штип хоспитализирани се 7, а на домашно лекување се следат 2 пациенти. На инфективните одделенија во Велес, Куманово, Прилеп и во Охрид хоспитализирани се 40 пациенти позитивни и сомнителни на Ковид-19.
—