Македонија
Милошоски: Ако не се смени светото тројство МАЛМЕД, веледрогерија Пановски, Министерство за здравство, скандалот со Онкологија ќе ни се повтори

Прашање на месеци и на години е кога ќе ни се повтори скандалот со Онкологија доколку не се смени системот кој го изградиле МАЛМЕД, веледрогеријата Пановски и Министерството за здравство, предупреди денес пратеникот Антонијо Милошоски од ВМРО-ДПМНЕ. Тој, на денешната седница на Анкетната комисија за скандалот на Онкологија, ја праша актуелната директорка на Клиниката за радиотерапија и онкологија Виолета Клисаровска дали знаела дека докторката Снежана Смичкоска е во партнерска заедница со сопственикот на веледрогеријата Пановски која набавува најголем дел од лековите за Клиниката.
„Да секако дека знаев меѓутоа професорката работи години наназад. Целиот свој работен век била во Клиниката. Да, тој податок го имам, нема зошто да кријам“, одговори директорката Клисаровска.
По ваквиот нејзин одговор Милошоски рече дека токму Смичкоска била директорка во сенка на Клиниката и акционер на веледрогеријата Пановски.
„Веледрогеријата Пановски има свој акционер во Клиниката. Невенчаната сопруга на сопственикот на веледрогеријата Пановски која што и 2006 година и претходно беше директорка на оваа Клиника и за која што имаше кривична пријава по која што никогаш не се постапи била секогаш акционер на веледрогеријата Пановски внатре во Клиниката за онкологија. И кој е кругот? Почнува со МАЛМЕД. Во МАЛМЕД се утврдува кој има дозволи, кој има лиценци, кој смее да увезува и тука доминира веледрогеријата Пановски. Тука се создава структурата на неговата моќ и доминантност во понудата на лековите. Вториот дел е министерот за здравство. Министерот за здравство Венко Филипче досега бил најуслужливиот министер кон веледрогеријата Пановски пресметано и во бројки со милиони евра профит и добивки секоја година. Клиниката за онкологија и директорите се најмалиот дел и најневлијателниот играч кој мора да игра по правилата на МАЛМЕД и на министерот за здравство и да ја одржат доминацијата на веледрогеријата Пановски. Не може да ја сменат, во спротивно ќе бидат сменети“, рече Милошоски.
Тој смета дека на клиниката имало конфликт на интереси оти Смичкоска, како невенчана сопруга на сопственикот на веледрогеријата Пановски била дел од конзилиумот на Клиниката и од внатре одлучувала за набавките.
Директорката Клисаровска потврди дека Смичкоска била дел од конзилиумот, но извести дека веќе е во пензија.
„Во однос на учеството на професорката Снежана Смичкоска во конзилиумот, додека професорката беше во редовен работен однос во нашата Клиника како раководител на еден од клиничките оддели, беше член на конзилиумот, Тоа беше до 30 септември откога докторката е во пензија и не е повеќе член на онколошкиот конзилиум“, рече директорката Клисаровска.
Таквиот начин на функционирање, според Милошоски треба да се смени за да не се повтори скандалот со Онкологија.
„Моќта е толку голема што ние стануваме заложници на еден систем кој ќе го разрешиме за пет или десет дена 20 дена од денес со одредена политичка одговорност, ќе одговараат поединци со име и презиме, но доколку не се смени системот МАЛМЕД, веледрогерија Пановски, Министерство за здравство, тоа свето тројство кое во моментов заради профит создава канцер во здравството, мислам дека само прашање е на месеци и на години кога ваков скандал ќе ни се повтори“, рече Милошоски.
Директорката Клисаровска, која пред пратениците објаснуваше дека не може да ја смени веледрогеријата, рече дека конкуренција за набавка на лековите би била од директна корист за клиниката оти ќе значи и намалување на цената што за нив ќе значи многу оти секој ден се во трка за наоѓање лек повеќе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мухамед Елмази до Арсовска: Ќе барате ли од вашите партнери да се откажат од бесправните објекти, ќе побарате ли и тука дигалка или ќе свртите глава

Мухамед Елмази од „Влен“ на прес-конференција денеска, упати неколку прашања до градоначалничката на Град Скопје, Данела Арсовска.
„Денес сме тука да поставуваме неколку прашања за госпоѓата Арсовска. Госпоѓа Арсовска дали знаете кој е сопственик на оваа зграда? Дали објектот е де факто на вашите коалициони партнери во Градот и во бизнисот?
На какво земјиште е изграден, на државно или приватно?
На чие земјиште е изграден – државно, општинско или приватно? Дали имало располагање со државно земјиште без валидна јавна постапка?
Кој е вистински сопственик на оваа зграда?
Дали во документацијата се води на друго име за да се сокрие вистинскиот сопственик?
Ако да, зошто инспекциските служби не отвориле постапка за лажно пријавување? Дали овој објект го има во урбанистичките планови?
Дали деталниот урбанистички план (ДУП) воопшто предвидува ваков објект на оваа парцела? Ако не, кој и кога дал согласност за отстапување од планот? Дали вие сте учесник во тоа?
Дали е спроведен инспекциски надзор од Општина Сарај? Дали Градежниот инспекторат има издадено решение за уривање или забрана? Ако не – зошто бројните пријави од локалното население останале без одговор“, праша Мухамед Елмази на денешната прес-конференција.
„Г-ѓо Арсовска, пред да продолжите да зборувате за „дивоградби“ и „заштита на јавниот интерес“, одговорете: ќе барате ли од вашите партнери да се откажат од бесправните објекти? Ќе побарате ли и тука дигалка или ќе свртите глава затоа што станува збор за ваш пријател и коалициски партнер? Попатно, прашајте го и Димитар Апасиев?
ВЛЕН ќе инсистира на: Итно постапување на сите градежни инспекциски служби; Итно постапување на финансиската полиција за откривање на скриениот имот за политичарите од ДУИ; Отпочнување кривична постапка за злоупотреба на службена должност и урбанистички криминал против Арсовска; Јавна објава на сите локации во Скопје каде фирми или лица поврзани со кланот на ДУИ градат или поседуваат диви објекти.
Доколку градоначалничката и надлежните служби продолжат да молчат, ќе ги искористиме сите правни и демократски механизми за да го заштитиме интересот на граѓаните. Ќе го спречиме ширењето на бизнис империјата на кланот на ДУИ, во која припаѓа веќе и Арсовска“, изјави Мухамед Елмази.
Македонија
Арсовска до Мухамед Елмази: Дали си ти криминалец од ДУИ или од ВЛЕН?

„Таман мислиш не може да демонстрираат поголем очај за криминалот во кој се фатени, тие наоѓаат нов првенец од ДУИ! Мухамед Елмази беше член на Совет на град Скопје во овој мандат и истакнат член на ДУИ до септември 2024 година, кога претрпе магична трансформација и стана ВЛЕН за да го постават директор на државното НОМАГАС“, напиша градоначалничката на Град Скопје, Данела Арсовска на социјалните мрежи.
„Вчера барав на седница да се зборува за нелегални дивоградби во сите 10 скопски општини, ама Мухамед, иницијативата за дивоградбите од Сарај твоите коалициски партнери од ВМРО ја покренаа и сами си ја повлекоа.
Изгледа си пропуштил вчера на седница на совет кога побарав да се испитаат незаконските легализации на дивоградби во сите скопски општини вклучително Чаир и Сарај. Затоа што сакаш да глумиш политичар и на национална база да го сведеш ВАШИОТ криминал, читај тука: ЈАС ЗБОРУВАМ СО ФАКТИ И ЗА СЀ ИМАМ ДОКАЗИ.
Сега Мухамед да те прашам:
1. Дали си ти криминалец од ДУИ или од ВЛЕН?
2. Дали знаеш дека од 150 дивоградби од Чаир кои ги имаме фатено и сме известиле во изминативе 3 години, знаеме во која имаш ГРАТИС стан и живееш во истиот.
3. Дали знаеш дека следен тој предмет ќе го носам во јавното обвинителство бидејќи империјата на ТВОЈАТА УРБАНА МАФИЈА ќе ја срушам и воопшто не ми е гајле од која партија доаѓа!“, додаде Арсовска.
Македонија
Сиљановска-Давкова ги прими акредитивите на новоименуваниот амбасадор на Република Кореја, Ким Донгбае

Претседателката Гордана Сиљановска-Давкова ги прими акредитивните писма на новоименуваниот амбасадор на Република Кореја со седиште во Софија, Ким Донгбае.
Посакувајќи му добредојде на амбасадорот Донгбае, таа изрази задоволство од пријателските односи и од конструктивната соработка меѓу двете држави, по воспоставувањето на дипломатските односи во 2019 година. Оцени дека постои волја и посветеност за искористување на потенцијалите и интензивирање на соработката во сите сфери од заемен интерес.
Претседателката ја посочи важноста од развојот на соработката, потенцирајќи дека корејската економија нуди големи можности за партнерство во повеќе области, особено во информатичката технологија, дигитализацијата и обновливите извори на енергија, а од друга страна, нашата држава со стратегиската локација во срцето на Балканот, нуди поволни услови за корејските инвеститори и компании.
Таа изрази уверување и подготвеност за натамошен развој на соработката на мултилатерален план, особено во рамките на Обединетите нации. Малите и средни земји, според неа, треба да дејствуваат единствено, можат да понудат знаење и заслужуваат да имаат посилна улога во одлучувањето за глобалните прашања.
Обајцата ја истакнаа потребата заеднички да работат на отворање на резидентни амбасади во Скопје и во Сеул.
Сиљановска-Давкова, во духот на начелото на реципроцитет, побара да се укинат визите за македонските граѓани, со оглед на фактот на нивното непостоење за граѓаните на Република Кореја.
Амбасадорот Донгбае оцени дека по воспоставувањето на дипломатските односи пред шест години, двете држави станаа успешни партнери и изрази спремност за нивно продлабочување и проширување. Тој го посочи развојот на економската соработка како приоритет во неговата работа.
Претседателката Сиљановска-Давкова упати честитки по повод изборот на Ли Џе-Мјунг за нов претседател на Република Кореја на вчерашните вонредни претседателски избори.
На амбасадорот Ким Донгбае му посака успех во извршувањето на одговорната дипломатска мисија.