Антонијо Милошоски, пратеник во Собранието и член на ИК на ВМРО-ДПМНЕ, во изјава при теренска посета на Битолско рече дека справувањето со корона-кризата од страна на министерот Филипче е неуспешно и затоа Македонија има најмалку имунизирано население во регионот.

Милошоски потенцира дека доколку министерот Филипче не трчал по провизии и посериозно се занимавал со справување со здравствената криза, Македонија немаше да има огромен број починати и сериозна економска штета.

„Сметам дека справувањето со корона-кризата е неуспешно бидејќи министерот за здравство, Венко Филипче, наместо да се заминава со набавка на вакцини и обука на персонал за подобра организираност во оваа пандемија, тој трчаше по провизии и Македонија остана, за жал, земја во регионот што има најмалку имунизирано население“, рече Милошоски.

Милошоски додаде дека за катастрофалната здравствена и економска криза и за огромниот број загубени животи и работни места министерот за здравство, Филипче, и премиерот Заев не носат само морална одговорност, туку и здравствена и законска одговорност за штетата што е направена.

„Колку време помина од декември кога Филипче ветуваше дека ќе почне вакцинацијата до денес и колку жртви човечки и жртви економски имаме како држава, покажува дека Филипче и Заев не носат само морална, туку носат и здравствена и законска одговорност за оваа штета што е направена. Прекумерната смртност за Македонија е катастрофална, а економските штети мислам дека се многу големи и затоа сметам дека тандемот Заев-Филипче со непреземање навремени дејства ѝ нанесе голема здравствена и економска штета на државата“, заклучи Милошоски.