Министерката за култура, Бисера Костадиновска-Стојчевска, засега нема да побара разрешување на државниот секретар во Министерството за култура, Валмир Азири, кој најави кршење на рацете и нозете на оние што ќе ги понижат Албанците. Пратеникот Антонио Милошоски, кој во избришаниот статус на Азири беше квалификуван како антиалбанец, ја праша министерката: „Дали Вие сметате дека е упатно да предложите разрешување на Валмир Азири поради употреба на говор на омраза“.

„Јас не го оправдувам насилството. Против него поднесовте пријава и доколку според извештајот од надлежните органи, кои треба да постапат по Вашата пријава, се утврди кривично дело, според тоа ќе биде донесено соодветно решение“, одговори Костадиновска-Стојчевска.

Од одговорот не беше задоволен пратеникот Милошоски. Тој посочи дека поради Азири, губи Министерството за култура.

„Кога државен секретар во Министерство за култура, каде што очекуваме луѓето да бидат поплеменити, јавно пишува за кршење раце и нозе на сите што тој смета дека не размислуваат како него или соодветно, сметам дека Министерството за култура губи репутација со еден таков човек во своите редови. Ако Вие предложите разрешување, кое може да не биде прифатено, ќе добиете повеќе репутација. Ако Вие штитите човек што јавно повикува на говор на омраза, Вие, Вашето министерство и Владата губат репутација. И наместо да се превенира поткупувањето на говорот на омраза, ќе станете пасивен поттикнувач. Овој човек нема да ви помогне во културата“, додаде Милошоски.

Пратеникот Антонио Милошоски од ВМРО-ДПМНЕ поднесе кривична пријава против државниот секретар во Министерството за култура, Валмир Азири. Ваквиот чекор доаѓа откога Азири на социјалните мрежи напиша, па избриша: „Антиалбанец како Милошоски заслужува и повеќе, времето на продавачите на магла заврши, новите генерации Албанци ќе им ги скршат рацете и нозете на сите што ќе се обидат да ги понижат Албанците“, и додаде емотикон тупаница.