Македонија
Министерот за здравство без магичен стап: Тоа нема да се случи преку ноќ, но се стремиме да ги изградиме болниците

Министерот за здравство, Фатмир Меџити, во ново јавно појавување одново се жалеше од состојбите во секторот со кој раководи. Пред јавноста зборуваше за лошите состојби, па упати барање: „Пак повикувам, дајте сите заедно да градиме едно здраво здравство“. Меџити ова го правеше и во претходни изјави, а откога беше цел на критики дека ништо не променува во секторот откако стана министер.
„Ова би го крстил како голем ден ‘национален форум за здравство’ заедно со претставничката колешка и докторка Ане Јохансен денес во овие простори да ги кажеме сите наши дефекти што јас како министер речиси веќе три месеци ги детектирав. Работиме заедно со Ане Јохансен и многу сме благодарни за поддршката и за соработката на СЗО што ја покажува за нашата држава и ние сме спремни и ќе се стремиме заедно. Јас цело време апелирам што не е во ред, какви проблеми има, како може да ги детектираме и како може најбргу да најдеме решение. Јас многу сум одлучен како министер, а исто и мојот кабинет, моите советници и сите здравствени работници ги повикувам, ние го знаеме нашето здравство, во многу лоша состојба е, дајте заедно да придонесеме за еднаш засекогаш да поставиме некои здрави основи постулати со цел нашите пациенти да добијат подобри здравствени услуги и да имаме поздраво население“, рече Меџити.
Тој додаде дека е намалена смртноста кај новороденчињата, што е големо достигнување.
„Но, не само со оваа проблематика, тука сме да се занимаваме и да ги решиме сите проблеми што ги има во здравството. Знаеме дека немаме магичен стап, тоа нема да се случи преку ноќ, но со сите наши пријатели, со сите здравствени меѓународни институции, особено со СЗО, која е тука за нас, да се стремиме заедно да поставиме добра здравствена основа, да ги изградиме болниците, кои се оставени, знаеме кичевската 30 години, штипската има правен проблем, го решаваме денеска, напорно работиме на тоа, работиме на ‘Мој термин’, работиме, не знам ни јас веќе кај сè не работиме. Работиме во сите правци во здравството, што навистина има многу проблеми, здравството е жива материја, пак повикувам – дајте сите заедно да градиме едно здраво здравство“, додаде Меџити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Започна „Бела ноќ“ во Скопје

Изложби, перформанси, инсталации, концерти, театарски претстави и филмски проекции ќе се одржуваат вечер во главниот град во рамки на 19. традиционалната културна манифестација „Бела ноќ 2023“.
Централната манифестација ќе се одржи пред порта „Македонија“. Скопјани ќе имаат можност да уживаат во композициите на маестро Кире Костов во изведба на Андријана Јаневска, Наде Талевска, Дани Димитровска и Ламбе Алабаковски, придружувани од Биг бенд оркестарот, под диригентската палка на Љупчо Мирковски, проследени со специјално визуелно шоу со 3Д-мапирање на портата. Ќе претходи рок-концерт на музичкото училиште „Ентерпрајз“.
Првото издание на „Октомвриски музички поход“ ќе биде кај „Школка“, во Градскиот парк, каде што ќе настапат: групата „Педро Хоризонте“, Стефан Петановски бенд, Занаду бенд, Димиш бенд и диџеите Раста Грл, Чарли и Јаска.
Во ГТЦ, пак, ќе може да се види изложбата „Игри и мечтаења“ на Друштвото на ликовните уметници, а на Факултетот за драмски уметности ќе може да се проследат повеќе театарски претстави, како и филмска и музичка програма. На плоштадот „Филип Втори“ повеќе културно-уметнички друштва ќе изведат традиционални македонски ора.
Во Кинотеката на Македонија ќе може да се проследат македонски филмски и музички достигнувања, а во галеријата „Остен“ ќе биде поставена изложбата „Право на јавни простори“ од Факултетот за архитектура и дизајн на Универзитет „Американ колеџ“. Во Капан ан ќе биде прикажан проектот „Никеја“ со Славе Димитров и Весна Ѓиновска-Илкова, а во Домот на културата „Кочо Рацин“ ќе биде поставена изложбата „Култура во кутија“ на културното јадро „Доминиум“.
Во ноќниот клуб „Пјур“ (Pure) ќе биде одржан „Скопски моден фестивал“ (Skopje Fashion festival), на кој ќе се претстават модните дизајнери Ивана Кнез, Џорџе Башаревиќ, како и Бошко и Цеце Т.
Програмата ќе ја збогатат и културните институции: Културно-информативен центар – Скопје, Детски културен центар „Карпош“, Музеј на Град Скопје, Музеј на современата уметност, Библиотека „Браќа Миладиновци“, НУ Национална галерија, НУ Музеј на македонската борба и самостојност и НУ Турски театар.
Сите настани се од отворен карактер и се бесплатни за посетителите. И оваа година е обезбеден бесплатен јавен превоз за сите граѓани за време на одржувањето на „Бела ноќ 2023“. Бесплатниот превоз ќе може да се користи од вечер, од 18 часот, до 5 часот во недела (1 октомври 2023).
Македонија
Откако протекоа документи за токсично млеко и јогурт, утре директорот на Агенцијата за храна и ветеринарство ќе има прес-конференција

Откако ВМРО-ДПМНЕ денеска објави документи за токсично млеко и јогурт во Македонија, и побараа одговорност од АХВ, попладнево од Агенцијата најавија дека директорот утре ќе го каже својот став.
„Директорот на Агенција за храна и ветеринарство Николче Бабовски, утре, во 11 часот ќе одржи прес конференција. На прес конференцијата директорот Бабовски ќе одговори за прозивките за работењето на Агенцијата“, стои во поканата.
Претходно, Цветан Трипуновски, претседател на комисија за земјоделство, шумарство и водостопанство на ВМРО-ДПМНЕ рече дека „се работи за протеински јогурт увезен од Република Србија, и од него се гледа зголемено ниво на амфлатоксин, вториот документ е лабораториски извештај за млеко од една млекарница од Република Македонија, која исто така покажува присуство на амфлатоксин над дозволената граница“.
Трипуновски праша дали протеинскиот јогурт од соседна Србија и млекото од млекарница во Македонија се пуштени во промет, или истото е преработено и се наоѓа на некој по рафтовите ширум маркетите во Република Македонија?
„Овие документи се уште еден показател дека контролата на млекото и млечните производи, како домашни, така и од увоз, АХВ не ги прави согласно потребите да ги заштити граѓаните од злоупотреби. Сакам да нотирам и дека Националниот систем за брзо известување не функционира, односно вакви известувања не се нотирано“, истакна Триупуновски
Македонија
Што го врти светот: Кои се зелени работни места во Македонија?

Во Македонија постојат зелени работни места, но многу од нас не сме свесни што всушност е зелено работно место и дали нашето спаѓа во таа категорија.
Втората епизода на поткастот “Што го врти светот?” беше базирана на темата Екологија и пари. Оваа тема беше дискутирана од страна на водителката Јована Аврамовска Николовска и Маја Марковска, еко активист и извршна директорка на една од најстарите еколошки организации во регионот.
Во поткастот беа споменати и зелените работни места во Македонија. Позитивна промена се гледа во нашата земја, бидејќи се инвестира во екологијата и се повеќе бизнисите се насочуваат кон зелени работни места. Според Маја, зелено работно место треба да е многу пристојна работа, која не треба да е ново отворена, туку може веќе и постоечка, која што помага за одржливост на животната средина и за намалување на емисии на стакленичките гасови. Маја вели дека зелени работни места во Македонија се сите работни места во хидроцентралите, градежништво со природни материјали, како на пример клесачи на камења, и сите индустрии кои се занимаваат со групен транспорт.
Проблемот во Македонија, Јована и Маја го гледаат во не водење на статистика за зелени работни места. Оваа статистика би придонела до инвестирање и подобрување на истите. Според Марковска, Македонски железници имаат потенцијал да бидат најеколошко јавни претпријатие кое ќе отвори многу и квалитетни зелени работни места.
Поткастот е реализиран од Здружението за истражувања и анализи ЗМАИ, а целиот поткаст можете да го следите на Youtube каналот или на Spotify.
(ПР)