Македонија
Министерот Спасовски на билатерални средби со високи европски претставници

На маргините на министерскиот форум ЕУ – Западен Балкан, што се одржува во Брдо кај Крањ во Република Словенија, министерот за внатрешни работи, Оливер Спасовски, оствари билатерални средби со координаторот на ЕУ за борба против тероризмот, Илка Салми, еврокомесарката за внатрешни работи, Илва Јохансон, и директорката на Европската канцеларија за поддршка во областа на азилот (ЕАСО), Нина Грегори.
„Постигнувањата на земјата во однос на исполнување на препораките од заедничкиот акциски план за борба против тероризмот се неспоредливо позитивни во изминатиот период. Особено значајни резултати постигнавме во 2020 кога беше сузбиена 11-члената терористичка организација, а во рамките на случајот беше запленета и поголема количина оружје, муниција и експлозив“, истакна министерот Спасовски на средбата со европскиот координатор за борба против тероризмот, Салми.
На средбата беа поздравени остварувањата во текот на 2020/2021 од аспект на 11 донесени правосилни пресуди од областа на борбата против тероризмот, со кои им е изречена казна затвор на 11 лица, како и преземената солидарна одговорност на Република Северна Македонија како земја членка на НАТО активно да се вклучи во заложбата на меѓународната заедница да ги заштити цивилите изложени на ризик во Авганистан, кои биле вклучени во демократските промени во земјата и работеле со меѓународни организации и агенции.
Билатералната средба со еврокомесарката Илва Јохансoн помина во знакот на повеќе прашања од аспект на внатрешните работи, а акцентот беше ставен на миграцијата и борбата против организираниот криминал. За време на разговорите беше нотиран значителниот напредок на државата во областа на правдата, слободата и безбедноста и вложените напори за исполнување на потребните критериуми, што резултира со препорака за отворање на пристапните преговори, без никакво одлагање во согласност со последниот извештај на Европската комисија.
Министерот Спасовски истакна дека формалниот почеток на пристапните преговори, вклучувајќи ги и поглавјата 23 и 24, ќе овозможи продлабочување на реформите и постигнување подобри резултати во воведувањето на ЕУ-стандардите, кои ќе им донесат добросостојба на сите граѓани.
„Продолжуваме со имплементацијата на ЕУ реформите во нашето општество. Во тој дух реформскиот план на Владата на РСМ – ‘Европа дома’ – беше усвоен за да се насочи реформската агенда во избраните приоритетни области вклучувајќи ги и темите што ги дискутиравме на овој министерски форум. Дополнително, Владата ја усвои Националната програма за усвојување на правото 2021-2025 како сеопфатен клучен стратешки документ што ги дефинира реформските приоритети, временската рамка и потребните ресурси за севкупниот процес на пристапување“, објасни министерот Спасовски во текот на средбата со еврокомесарката Јохансон.
Министерот Спасовски истакна дека определбата на РСМ да биде дел од глобалниот одговор за управување со миграциските текови се рефлектира и во изготвувањето на новата резолуција за миграциска политика, која во моментот е во фаза на усвојување од страна на Собранието, а со цел зајакнување на систематско регистрирање мигранти и заштита на профилирањето чувствителни податоци со поддршка на ФРОНТЕКС, со кој соработката се продлабочува во сите области, ќе се работи на подготовка на мастер-план за регистрација на мигранти, кој претставува основа за развивање таков ИТ-систем, кој ќе биде во можност да се приклучи кон ЕУРОДАК веднаш по пристапувањето на државата кон ЕУ. Притоа беше изразено задоволство од усогласеноста на законодавството на Северна Македонија во делот на азилот со законодавството на ЕУ.
На средбата беше дискутирано за почнување со онлајн-регистрација и спроведување главно интервју како одговор на предизвиците што ги наметна пандемијата, со цел континуирано да се обезбеди пристап до постапката за азил, што наиде на позитивен повратен одговор од страна на сите фактори во постапката. Министерот Спасовски објасни дека во изминатиот период се финализираа предвидените активности за обуки на основните модули на ЕАСО за вработените на секторот за азил, а за стандардните оперативни процедури, чија македонска верзија уште минатата година беше доставена до ЕАСО, е предвидено нивно дополнување како одговор на потребата за нивно приспособување со новонастаната состојба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Средба на Џафери со младите парламентарци од Босна и Херцеговина

Претседателот на Собранието на Република Северна Македонија, Талат Џафери, денеска се состана со група млади парламентарци од Босна и Херцеговина кои се дел од повеќе-партиска група од сите претставнички нивоа на власта во Босна и Херцеговина.
Претседателот Џафери, со особено задоволство сподели информации, искуства и пракса со младите пратеници кои пројавија интерес за тековните политички случувања во нашата земја, за евроинтеграцискиот пат и можностите за проширување и продлабочување на соработката меѓу пратениците на двете земји и секако можноста за соработка и на највисоко ниво на претседатели на парламенти и на ниво на Пратенички групи за соработка.
Младите соговорници од Босна и Херцеговина му се заблагодарија на претседателот Џафери за одвоеното време да се сретне со нив, знаејќи ја одговорноста на еден претседател на законодавен дом. Изразија висока почит за достигнувањата на Република Северна Македонија во контекст на евро-атлантската интеграција а особено ја истакнаа политиката стабилност и функционалноста на институциите во нашата земја. Дополнително, се заинтересираа и за нивото на вклучување на младите и жените во политичкиот живот во нашата земја правејќи паралела меѓу двете земји. А, изразија желба и за динамизирање на соработката помеѓу Република Северна Македонија и Босна Херцеговина, заради размена на искуства и заемна помош во процесот на интеграцијата на двете земји во Европската Унија.
Македонија
(Видео) Ахмети запеа пред вечерашниот спектакл, Груби објави снимка

Првиот заменик-премиер Артан Груби на социјалната мрежа „Фејсбук“ објави видео на кое заеднички пеат лидерот на ДУИ, Али Ахмети, и пејачот Илир Шаќири.
Претходно, првиот вицепремиер Артан Груби на својот фејсбук-профил го најави големиот митинг закажан за денеска во Чаир, на кој ќе присуствува и Али Ахмети. Премиерот Димитар Ковачевски ѝ посака успех на ДУИ на вечерашната трибина на партијата во Чаир запрашан за тоа како го коментира собирот.
Македонија
Османи ги запозна невладините организации со стратешкиот дијалог меѓу Македонија и САД

Во рамките на серијата средби на министерот за надворешни работи, Бујар Османи, со претставници од граѓанскиот сектор, на денешниот брифинг ги запозна невладините организации со значењето и придобивките од стратешкиот дијалог меѓу Северна Македонија и САД, лансиран во јуни минатата година во Вашингтон.
Во фокус на разговорите беа можностите за соработка со невладиниот сектор во делот на имплементацијата на планот за активности во рамките на стратешкиот дијалог, кој покрива многубројни области за соработка, како што се: борбата против корупцијата и владеењето на правото, одбрана и безбедност, трговија и инвестиции, енергетика и животна средина, но и други значајни прашања од регионален и глобален интерес.
Воедно, Османи истакна дека е предвидено споменатиот план да се имплементира од страна на разни институции во земјата во периодот од 2023 до 2033 година, при што Министерството за надворешни работи е координатор на целокупниот процес.
„Планот за активности во рамките на стратешкиот дијалог со САД содржи многубројни проекти и активности чија реализација ќе придонесе за понатамошно поттикнување на демократските и реформските процеси, како и зајакнување на институциите, а со тоа гарантирање на целокупниот напредок на државата. Отворени сме за соработка со граѓанскиот сектор и на ова поле, што е на линија на нашата досегашна транспарентност и заложби за зајакнување на улогата на невладините организации во креирањето на надворешната политика“, заклучи Османи.