Министерот за здравство, Венко Филипче, вели дека 70 отсто од новозаболените од Ковид-19 од Скопје се од веќе познати општини и познати кластери, пред сè од Чаир и Сарај.

„Во Сарај веќе почна да се намалува бројката на заболени. Останува Чаир и таму работат тимовите за јавно здравје. Понатаму е Студеничани, каде денес се анкетираат лица. Во Штип новодијагностицираните се од неколку конфекции. Денеска екипа од Министерството за здравство и Државниот здравствен инспекторат беа таму и донесена е одлука да се затворат пет конфекции до наредниот понеделник, а 600 луѓе ќе бидат истестирани во тој период“, рече Филипче.

Тој додаде дека очигледно е дека и покрај високите бројки, нема пациенти што се јавуваат во болници, што значи дека тие се со полесна клиничка слика или се асимптоматски.

По направениот детален увид направен во Центарот за јавно здравје, дојдено е до заклучок дека новодијагностицираните пациентите остануваат дома да се лечат, што, според Филипче, значи дека здравствениот систем може да се справи со овој бран.

Уште на првиот работен ден илјадници животи на вработените во јавниот сектор се доведени во ризик, обвини дополнителниот заменик-министер за информатичко општество и администрација, Невенка Стаменковска-Стојковски.

Таа вели дека не постојат протоколи за работа и соодветна заштита на работно место согласно препораките на СЗО.

„Упатувам апел до Владата веднаш да се прекине со негрижата кон вработените во јавниот сектор, да преовладува разумот и да се овозможат мерки за нивна заштита. Упатувам апел сите вработени кои се распределени и патуваат надвор од местото на живеење да бидат вратени во матичната институција или веднаш да бидат ослободени од патување за да се заштитат нивните животи и нивните семејства. Хронично болните, бремените жени, лицата кои се самохрани родители…. веднаш да бидат ослободени од работа, а функционерите на СДСМ за кои добив известување дека не ги почитуваат мерките и препораките веднаш да бидат санкционирани и повикани на одговорност“, кажа Стамнковска-Стојковски.

Таа апелира да се ослободат сите вработени кои немаат безбеден и редовен превоз до нивното работно место и назад, да се преземат мерки за соодветна организација на работните единици/простории во инистуциите за да има соодветен простор/растојание помеѓу вработените и апелира на работа од дома освен за институциите каде навистина се има потреба од физичко присуство на вработените.

Денеска Македонија го живее црниот понеделник, што значи огромна бројка на новозаразени луѓе со Ковид-19 и луѓе кои ги загубија своите животи. Во ваква една тешка ситуација претставува лудост да се зборува за избори, и колку и Заев да вели дека имаме нормалност, имаме фатална ненормалност во општеството, изјави потпретседателот на ВМРО-ДПМНЕ, Владо Мисајловски.

Тој обвини дека Заев не само што е главен фактор за кризата поради неспособноста на неговата влада да ја менаџира, туку тој со неговите изборни активности станува и извор на кризата со корона.

„На човекот пола партија му е во изолација, а тој говори за предизборни активности“, рече Мисајловски.

За датумот 5 јули што го наведе Заев, Мисајловски кажа дека не е време да нафрлаат бројки за избори.

„Како што знае и јавноста ние имавме канал за комуникација, но реалноста е сосема поинаква сега, кога пола партија на СДСМ е во изолација, јас им посакувам навистина добро здравје на сите и на нив и на нивните семејства, не е време за ваква работа. Не е време да нафрламе бројки кога ќе има избори или слично, сега време е сплотено сите заедно во државава да се посветиме кон здравјето на граѓаните и ништо повеќе“, рече тој.