Македонија
Минчев: Реформата на јавната администрација е клучен приоритет за европската интеграција на Македонија

Министерот за јавна администрација, Горан Минчев, денеска се обрати на настанот посветен на презентацијата на Извештајот за мониторинг на СИГМА за 2024 година, нагласувајќи ја важноста на реформите во јавната администрација како еден од клучните приоритети во пристапниот процес кон Европската Унија.
„Модернизацијата и унапредувањето на јавната администрација се темел на функционален јавен сектор, кој е двигател на секое демократско општество. Формирањето на Министерството за јавна администрација е стратешки одговор на Владата за забрзување на реформите и подобрување на ефикасноста и транспарентноста на институциите“ – истакна министерот Минчев.
Тој додаде дека Извештајот на СИГМА претставува значајна алатка за оценка на досегашните резултати и идентификација на областите во кои е потребно унапредување. Министерството активно работи на имплементација на мерките од Стратегијата за реформа на јавната администрација, со посебен фокус на департизација, професионализација и воспоставување кохерентен систем на плати.
„Граѓаните мора да имаат доверба во институциите и да чувствуваат дека тие работат во нивен интерес. Затоа, реформите мора да бидат инклузивни, а процесот на креирање политики транспарентен.
Подготвивме нови законски решенија – Закон за административни службеници, Закон за вработени во јавниот сектор и Закон за стручно усовршување – кои наскоро ќе бидат предложени на Владата и Собранието“ – посочи министерот.
Дополнително, Минчев го најави и новиот Закон за инспекциски надзор, кој ќе воведе структурни промени за подобра координација на инспекциските служби и намалување на административните трошоци.
Во контекст на европските интеграции, истакна дека критиките од Европската комисија за политичката поддршка и координацијата на реформите ќе бидат земени предвид за унапредување на процесот.
„Благодарни сме на СИГМА за нивната континуирана поддршка. Ова партнерство е клучно за градење капацитети и приближување кон европските стандарди“ – заклучи министерот, изразувајќи уверување дека со заеднички напори ќе се постигнат поставените цели за модерна и ефикасна јавна администрација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лимани: Брзиот развој на индустријата, континуираниот напредок на технологијата и новите услови за работа, ја наметнуваат потребата од ревидирање на листата на опасни занимања

Денеска се одржа презентација на новата листа на опасни занимања/работни места подобни за предвремено пензионирање во согласност со нивото на ризик и предложениот степен на пензија, како дел од проектот Ревизија на листата на опасни занимања кои се квалификувани за предвремено пензионирање со бенефициран работен стаж (БРС).
Во последните години, со поддршка на Светската банка како доверлив партнер, Министерството за социјална политика, демографија и млади реализираше низа активности фокусирани на подобрување на управувањето со системот на социјално осигурување.
Овие активности имаат за цел оптимизација и рационализација на системот, поедноставување и скратување на процедурите за остварување на социјалните права, намалување на оперативните трошоци на системот, зголемување на вклученоста на ранливите категории, модернизација и дигитализација на бизнис процесите, како и создавање на правичен систем за сите граѓани.
Една од активностите на проектот реализиран од министерството, чии резултати беа презентирани денес од експертите во ова поле, е ревизија на листата на работни места со стаж на осигурување со зголемено траење, или позната меѓу нас како бенефициран стаж.
Министерот за социјална политика, демографија и млади, Фатмир Лимани обраќајќи се пред присутните се осврна на причините кои упатуваат на нужноста за ревидирање на оваа листа на опасни занимања. Во таа прилика истакна:
„Брзиот развој на индустријата и континуираниот напредок на технологијата, заедно со подобрувањето и модернизацијата на условите за работа, наметнуваат потреба од ревидирање на листата на работни места кои се вршат во тешки услови или во услови кои ја намалуваат работната способност на работникот.“
Лимани укажа на фактот дека оваа листа на глобално ниво се прегледува редовно, обично на секои пет години. Додека пак во Република Северна Македонија, се уште се користи иста листа на работни места од осамостојувањето на државата, наследена од поранешна Југославија.
„Ситуацијата во законодавството не ја прикажува реалната слика која ја имаме на терен, бидејќи од времето на утврдувањето на работните места со бенефициран стаж, настанати се значајни промени. Условите за работа се значително подобрени а мерките за безбедност и здравје при работа се многу унапредени. Дополнително, некои индустриски гранки веќе не постојат, што ја прави таа листа неточна за актуелната ситуација,“ рече Лимани.
Денешната презентација на ревидирани работни места со бенефициран стаж се заснова на неколку месечната теренска работа на експертите. Во таа насока, министерот обраќајќи се на присутните претставници на работодавачите и работниците, ги покани активно да учествуваат во дискусиите со експертите. Притоа, истакна дека сите нивни забелешки и сугестии ќе бидат земени во предвид пред листата да стане конечна.
„На крај, врз основа на цврстото убедување дека човечкиот капитал е највредниот ресурс во секој аспект на општеството и во процесот на работа, Ви се обраќам, како важни актери во овој процес, да продолжите постојано да вложувате во здравјето и безбедноста на работниците, во нивната благосостојба и професионален развој,“ порача Лимани.
Македонија
„Еколошки геноцид врз Охридското Езеро: Владата го жртвува јавниот интерес поради коруптивни бизнис-зделки“, велат од партијата Левица

„Левицата најостро ја осудува неодговорната, корумпирана и клиентелистичка политика на Владата предводена од ДПМНЕ и Министерството за земјоделство, шумарство и водостопанство, кои со доделувањето концесии за стопански риболов вршат директен еколошки геноцид врз Охридското Езеро“, велат од партијата Левица.
„Фактот што две од шесте концесионерски компании се основани во текот на самиот огласен рок претставува класичен пример на непотизам, незаконско фаворизирање и злоупотреба на јавните добра за остварување лични и партиски профити. Овој скандалозен потег уште еднаш покажува дека владејачката гарнитура нема никаков интерес за заштита на националното природно богатство, туку исклучиво се раководи од тесните бизнис-интереси на поединци блиски до власта.
Дополнително, доделувањето концесии е направено без сериозна научна основа, без темелна процена на состојбата на рибниот фонд и без одобрување од релевантните институции и експерти. Оваа непромислена и штетна политика директно го загрозува опстанокот на автохтоните видови, особено охридската пастрмка и белвицата – видови што се наоѓаат во критична состојба поради долгогодишната небрежност на властите.
Особено алармантен е фактот што Владата дозволува годишен улов од десет тони риба во услови кога вештачкиот мрест и порибувањето се прекинати веќе шест години. Оваа катастрофална одлука е директен напад врз екосистемот на Охридското Езеро, кое е под заштита на УНЕСКО и претставува светско природно наследство.
Владата свесно ги игнорира предупредувањата на еколошките здруженија, научната заедница и на граѓаните, кои со години алармираат за драстичното опаѓање на рибниот фонд и за деградацијата на екосистемот. Со ова не само што се уништува природното богатство на државата туку се доведуваат во директна егзистенцијална опасност традиционалните рибари и иднината на одржливиот риболов во регионот“, соопштуваат од партијата Левица.
Тие бараат итно поништување на концесиите за стопански риболов во Охридското Езеро, враќање на рибниот фонд под строг државен надзор и воведување трајна забрана за комерцијален улов додека не се обнови природната рамнотежа, спроведување итни мерки за ревитализација на езерскиот екосистем, вклучително и повторно активирање на вештачкиот мрест и контролиран процес на порибување и кривична одговорност за сите инволвирани во оваа еколошка катастрофа, како и ревизија на целиот процес на доделување на концесиите.
„Охридското Езеро не е приватен имот на корумпираните политички елити – неговата заштита е одговорност на сите нас“, додаваат од партијата Левица.
Македонија
„Влен“: Партијата на нон грати е фатена како лаже за Косово

„ДУИ уште еднаш се обиде да ги измами Албанците, но нивната пропаганда беше уништена со факти. Нивните неосновани обвинувања за честитање на независноста на Косово беа отфрлени од кабинетот на претседателката на државата, која потврди дека честитката е испратена на 16 февруари. Исто така, честитки упатија и вицепремиерите на ВЛЕН, Изет Меџити и Арбен Фетаи, кои уште еднаш ја покажаа институционалната посветеност кон Косово“, велат од ВЛЕН.
„Ваквата постапка на ДУИ не е ниту прва ниту последна во нивната позната стратегија за користење на дезинформациите како политичка алатка. Партијата која две децении ја узурпираше власта на штета на албанските граѓани и на сите граѓани на Северна Македонија, сега се обидува да создаде залудни конфликти и да го одвлече вниманието на јавноста од своите спектакуларни неуспеси во сите области. ДУИ докажа дека нема политичка култура и не може да понуди визија за иднината на државата. Секојдневно пред граѓаните се разобличуваат нивните лаги и манипулации кои го покажуваат вистинското лице на оваа истрошена партија“, посочуваат од ВЛЕН:
ВЛЕН ги повикува граѓаните да не станат плен на пропагандата на партијата која го изгубила целиот кредибилитет.
„Време е за чесно и одговорно владеење, далеку од измами и сценарија измислени за тесни политички интереси. Коалицијата ВЛЕН останува посветена на чиста, транспарентна политика фокусирана на доброто на граѓаните“