Македонија
Мисајловски: Чаирчани со години се изолирани во работата на општината
На денешниот собир во општина Чаир се обрати потпретседателот на ВМРО-ДПМНЕ и носител на листата на ИЕ2 Владо Мисајловски, кој се заблагодари на членовите на ВМРО-ДПМНЕ ОК Чаир за сета досегашна поддршка и за сиот ангажман сите години наназад во сите изборни кампањи и битки за Македонија.
„Теренските активности во општина Чаир укажуваат на тоа дека Македонците тука се чувствуваат како граѓани од втор ред, а тоа не смее да биде така. Тоа е појава која што се случува секогаш кога ВМРО-ДПМНЕ не е власт. Затоа по 15-ти јули оваа слика ќе мора да се промени. Граѓаните на Чаир долги години се изолирани во работата на општината и за нив административните работи не одат како за сите други жители. Документите за легализација на имотите се расфрлаат по општински канцеларии и работите не се завршуваат, само поради тоа што Македонците во Чаир не гласаат за ДУИ или за некоја друга партија. На сето тоа мора да дојде крај. Наместо да се реализираат огромен број на вработувања во општина Чаир и другите институции во оваа општина, треба да се вложува во безбедноста и сигурноста на граѓаните. Не смеат партиските агенди да се извршуваат врз грбот на граѓаните“, истакна Мисајловски.
Тој констатираше дека за жал на теренските активности се уверил во фактот дека Македонците се повеќе се иселуваат од Чаир и зградите се празни. Но, исто така порача дека Македонците колку и да се, овој пат ќе победат во Чаир и ќе се изборат за свои права, а не да бидат граѓани од втор ред во сопствена држава.
Мисајловски потенцираше дека на овие избори македонскиот народ треба да избере помеѓу вистински лидер како што е Христијан Мицкоски или да му ја даде довербата на човекот кој е предмет на потсмев на целиот свет, а последен пат објавен беше разговор со лажната Грета.
„Македонскиот народ треба да избере помеѓу Република Македонија или Зоран Заев. Албанскиот блок иако во недостиг на аргументи и проекти пропагира решение за премиер Албанец, сепак од тука, од Чаир порачувам дека ВМРО-ДПМНЕ е дециден дека премиер на Република ќе биде Христијан Мицкоски и никој друг“, рече потпретседателот на ВМРО-ДПМНЕ.
Мисајловски беше дециден дека на населението во Чаир мора да му се даде огромно значење и да бидат на пиедесталот, поради тоа што се борат да опстанат во сопствена држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Села: Не е во ред тоа што се потенцира ДУИ, коалицијата е Европски фронт, од 9 партии
Зијадин Села од Алијанса за Албанците во интервју за Трилинг по изборите и изборните резултати и случувања, вели дека се работи за изборен инжинеринг и закрупнување на неколку политички сили. Според Села, не е во ред тоа што се потенцира ДУИ, коалицијата е Европски фронт, од 9 партии.
„Тука се најглавните албански партии. А дали сме подготвени за во опозиција, по демократските правила, тоа не го кажувааат политичките чинители, тоа го кажува народот, кој гласаше на 8 мај за Европскиот фронт да презема одговорности и да биде дел од власта“, вели Села.
Тој смета дека „погрешна е дефиницијата за коалицирање победник со победник, треба да е мандатар со победник. Победникот од македонската страна е дефиниран со Устав. Демографската реалност е за да има стабилност и да одиме напред, треба да се испочитува волјата на втората етничка заедница која е 30%, наспроти 54% кои се Македонците, според последниот попис“.
Додава дека Владата треба „да се изјасни во врска со обидот за изборен инженеринг. Според Пржинскиот договор, на техничкиот премиер е да обезбеди фер и демократски избори. Тие не се надвор од одлуките кои се носат во ДИК и Управен суд. Техничката влада е договор на најголемите политички партии“.
За тоа како Европскиот фронт ќе се однесува како опозиција во Собранието, Села вели „треба да се почитува желбата на граѓаните, не на Мицкоски. Ние ќе се однесуваме сразмерно на тоа како ќе биде решено. Не сакам да коментирам желби. Од ДИК се уште не се објавени мандатите, кој колку има. Се уште Мицкоски не е мандатар“.
Македонија
Денес малку сонце, па облачно, попладне нестабилно со пороен дожд и грмежи
Времето денес ќе биде сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.