Македонија
Мицевски: Поднесените 3.000 амандмани се само крик на опозицијата
„3.000 амандмани поднесени од страна на опозициските партии се само крик на опозицијата во однос на она што власта сака да го демонстрира во Собранието, а тоа е непочитување на опозицијата, неразговарање, избегнувањето на дијалог со сите политички партии, изјави Никола Мицевски, координатор на Пратеничката група на ВМРО-ДПМНЕ.Опозицискиот блок вчера ги поднесе амандманите со што пропадна обидот да почне расправата за измена на собранискиот Деловник со кој треба да се отвори можноста за онлајн работа и дискусии на пратениците коишто се заразени или се во изолација поради Ковид-19, коишто ги предложи собранскиот спикер Талат Џафери.
„Јас очекував да седнеме и да поразговараме за оваа онлајн идеја којашто ја турка владејачкото мнозинство имајќи предвид дека Собранието е функционално. Ние во парламентот имаме минимум 115 пратеници кои се секогаш присутни на седница, коишто може да разговараат и дискутираат за сè. Единствената причина поради којашто се бара ова онлајн Собрание е малиот број пратеници од владејачкото мнозинство. 62 пратеници е далеку од функционално мнозинство коешто би можело да работи без да се усогласува по однос на законите и она што доаѓа како материјал во Собранието со опозицијата. Да не заборавиме дека 58 пратеници од опозицијата претставуваат повеќе од пола милион граѓани на оваа држава и тие пола милион граѓани коишто го дале гласот за опозицијата очекуваат нешто од таа опозиција и се на ставовите заедно со опозициските партии.
За жал, немаше слух од страна на владејачкото мнозинство, се поднесе овој предлог-деловник без консензус. Инаку, знаете дека Жан Моне процесот е процес во којшто консензуално се договараат одредени измени по основ на Деловникот и ние постигнавме некој напредок и се надевам дека на следниот Жан Моне и оние мали несогласувања ќе ги усогласиме за да можеме да имаме еден деловник што ќе одговара и на власта и на опозицијата“, изјави Мицевски.
„Ние уште на самиот старт кажавме дека формирање Влада со поддршка од 62 пратеници не е некоја добра одлука, меѓутоа така решија да работат и ние сме тука за да ги освестиме и да ги разбудиме од сето она што го прават во изминатиот период. Морам да потсетам дека секое она законско решение поврзано со одредени бенефиции на граѓаните, помагање на економијата, помагање на стопанството, на здравствената криза, од страна на ВМРО-ДПМНЕ не беа закочени во изминатиов период, напротив даваме целосна поддршка и со наши амандмани пробуваме да ги подобриме тие законски решенија. Меѓутоа, сè она што не е поврзано со кризата, сè она за што нема консултации и дијалог, од страна на опозицијата ќе биде оспорувано. Имавме примери во минатото дека и двотретински реформски закони коишто беа важни за државата, беа поддржани од ВМРО-ДПМНЕ како опозиција, исто ќе биде и во наредниот период, меѓутоа само за закони коишто се поврзани со оваа криза и за подобрување на состојбата, како економската така и здравствената на граѓаните во Република Македонија“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски-Јанош Лазар: Изградба на брза пруга и квалитетно поврзување со земјите од Централна Европа е приоритет
Заменик претседателот на Владата и министер за транспорт Александар Николоски, денеска во Охрид оствари билатерална средба со министерот за градежништво и инвестиции на Унгарија, Јанош Лазар.
Средбата е дел од работната посета на Македонија од страна на делегацијата на Владата на Унгарија која ја предводи премиерот Виктор Орбан.
Во фокусот на средбата беше изградба на брза пруга на Коридор 10 и квалитетно поврзување на Скопје со Будимпешта, односно поврзување на Македонија преку брза пруга со пристаништата во Грција и со земјите од Централна Европа.
“Ова е проект што ќе донесе големи придобивки за сите земји од регионот, ќе го зајакне економскиот развој и соработка меѓу земјите и ќе овозможи сигурен и брз транспорт на патници и производи. Го фаќаме последниот чекор Македонија да се приклучи на напредните технолошки достигнувања во железницата во регионот и затоа овој проект е приоритетен, не само за нас туку за сите земји долж Коридор 10”- истакна заменик претседателот на Владата и министер за транспорт Александар Николоски.
Министерот Николоски ја потенцира важноста на поддршката на земјите од Европската Унија за реализација на еден ваков проект бидејќи како што нагласи, брзата пруга е услов за економски развој и подобра комуникација за сите земји од регионот.
На средбата се разговараше и за искустава и практики што се применуваат во двете земји во различни сегменти на транспортот, градежништвото и инвестициите.
Министерот исто така информираше и за забрзаните активности за реализација на крупните капитални проекти во Македонија. Тој изрази благодарност за економската поддршка од Унгарија кон нашата земја, потенцирајќи дека средствата од заемот веќе се насочени кон општините за реализација на инфраструктурни проекти.
“Билатералните односи со Унгарија ни се на одлично ниво. Унгарија како дел од Европската Унија е стратешки партнер на Македонија и голем подржувач во реализација на стратешките цели на земјата и во делот на политичките и во делот на економските развојни политики” – истакна Николоски по средбата.
Двајцата министри се согласија на интензивирање на соработката и унапредување на политиките кои се однесуваат на регионалното поврзување.
Македонија
Билатерална средба на министерот Панче Тошковски со унгарскиот колега Шандор Пинтер
Министерот за внатрешни работи Панче Тошковски, денеска во Охрид оствари билатерална средба со министерот за внатрешни работи на Република Унгарија, Шандор Пинтер.
На средбата беше разговарано за повеќе прашања од заеднички интерес на двете држави, особено за соработката во борбата против илегалната миграција и криминалот со криумчарење на лица.
Беше потенцирана потребата за продлабочување на соработката помеѓу Центарот за обука на МВР и унгарското полициско училиште за спроведување на законот во делот на спроведување на заеднички обуки.
Исто така, министерот Пинтер упати покана до министерот Тошковски да уќествува на претстојната конференција на министри за внатрешни работи во рамки на Будимпештанскиот процес, која ќе се одржи во Будимпешта во ноември оваа година.
Скопје
Стефковски: Ова е време на дела за Гази Баба
Градоначалникот на општина Гази Баба Бобан Стефковски утрово беше во посета на Стајковци каде што направи увид на градежните активности за асфалтирање на улица 3.
За посетата, градоначалникот Стефковски информираше на својата официјална страна на фејсбук на која напиша:
„Денешниот работен ден го започнавме со увид на градежните работи за асфалтирање на улица 3 во Стајковци. Жителите од оваа улица повеќе од 60 години газеле кал и земја. Дадениот збор пред граѓаните се исполнува! Ветив дека оваа улица ќе се асфалтира и денес тоа станува реалност! Реализираме инвестиции во патната инфраструктура како никогаш досега! Асфалтирани се повеќе од 70 локални улици во изминатите скоро три години од мојот мандат. Тука нема да застанеме! Продолжуваме понатаму! Ова е време на дела за Гази Баба! – напиша Стефковски.