Македонија
Мицкоски: Ако Заев не поднесе оставка утре до 14.30 часот, ќе ја поднесеме иницијативата за гласање недоверба

Претседателот на ВМРО-ДПМНЕ, Христијан Мицкоски не очекува премиерот Зоран Заев да поднесе оставка. Мицкоски посочи дека ако утре до 14:30 часот тоа не биде направено, ќе ја поднесат иницијативата за гласање на недоверба.
„Вратата за секој оној кој што мисли дека оваа Влада на Зоран Заев не е добра, е отворена. Секој кој ја поддржува, нема да биде дел од оние пратеници кои ќе гласаат за недоверба. Тука не постои политичка партија, туку 120 пратеници. 61 застанаа, 59 ги оставам да размислат. Да ја завршиме прво првата работа, потоа има Устав, закони, кој треба да се почитуваат. Мандат се дава на мнозинство и така натаму. Да почекаме да се случи прво првата работа. Лично, не очекувам дека Заев ќе даде оставка, тоа го темелам на претходно искуство. Ќе го доставиме тоа до претседателот на Собранието. 14:30 ќе ја отпочнеме процедурата за гласање на доверба на оваа Влада на Зоран Заев ако не даде неотповиклив оставка“, додаде Мицкоски.
Мицкоски негира дека пратеникот Скендер Реџепи од „Алтернатива“ бил измамен и не му било кажано дека Левица ќе е дел од мнозинството за гласањето на недоверба на Владата на СДСМ и ДУИ. Тој кажа дека немал чуено изјава од пратеникот дека ја повлекува веќе дадената изјава и потпис, туку дека, како што рече, криминалната влада на Зоран Заев треба да замине.
„Информацијата е без да биде цитирана изјава на Скендер Реџепи, без потврда, а потоа беше дистрибуирана во јавноста. Јас во животот не мамам. Најмалку имам потреба да се служам со методи кои мене како човек ми доликуваат. Најдобар демант на сето ова ќе биде иницијативата која ќе биде поднесена утре до Собранието. Немам чуено дека пратеникот Скендер го рекол тоа. Имав можност да чујам друга негова изјава дека оваа криминална влада треба да замине, предводена од Зоран Заев. Верувам во неговата чесност и честитост“, кажа Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.
Македонија
Отежнато се одвива сообраќајот на патниот правец Валандово – Струмица поради одрони

На патниот правец Валандово – Струмица, кај Костурино поради одрони сообраќајот е одвива отежнато и забавено.
Патниот правец Крушево-с.Долно Дивјаци -с.Кочиша е небезбеден за сообраќај и претсавува опасност за нормално одвивање на сообраќајот и поради таа причина истиот од 15.00 часот на 04.04.2025 година до негово санирање истиот ќе биде затворен за секаков вид на сообраќај, а граѓаните од населените места ќе користат регионален пат с.Пуста Река -Крушево.
Сообраќајот на државните патишта се одвивa непречено, по претежно влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.