Македонија
Мицкоски: Граѓаните ќе одлучуваат на кои проекти ќе бидат трошени парите од буџетите на општините

Граѓаните ќе одлучуваат на кои проекти ќе бидат трошени парите од буџетите на општините, работиме транспарентно и отчетно, изјави претседателот на ВМРО-ДПМНЕ, Христијан Мицкоски од општина Бутел, на почетокот на приемот на граѓани во рамки на „Отворен ден во твојата општина“.
Првиот човек на партијата образложи дека градоначалниците почнуваат со поинаков пристап до креирањето на буџетот во општините, односно дел од средствата кои што ќе се трошат ќе бидат практично изворно добиено како предлог од страна на граѓаните.
„Транспарентно, отчетно, таков е пристапот на ВМРО-ДПМНЕ. Дарко кажа онаму каде што има општини со градоначалници од ВМРО-ДПМНЕ најпрво дадовме отчет пред граѓаните за тоа што се е сработено од минатогодишните локални избори до овој ноември, една година од мандатот во услови на тешка економска криза, во услови на голема опструкција од страна на централната власт, а сега веќе ги отвораме општините за да може граѓаните самите да дадат предлози кои што ќе ги реализираме во буџетот од следната година. Тука во Бутел од програмата која што ќе биде реализирана и која што е дел од кампањата и која што беше дел од кампањата на локалните избори се околу 30тина улици, нивно асфалтирање и реконструкција, потоа тука е спортскиот комплекс во Љуботенски пат кој што исто така ќе биде изработен во тековната година, мислам на 2023 година. Потоа има неколку делници на канализацијата и водовод, расчистување на коритото на река Серава, потоа ќе се замени уличното осветлување што претставува огромен трошок за општината, ќе има повеќе пари за капитални инвестиции, работиме, иновираме и тоа е разликата на ВМРО-ДПМНЕ да работи и да испорачува пред граѓаните, за разликата од власта која што има поинакви приоритети од тоа кое што би требало да го има. Така што да сумирам денеска сум во Бутел да дадам поддршка на Дарко, на администрацијата овде да продолжиме со истата динамика на реализирање на проекти, а граѓаните на следните предвремени парламентарни избори ќе знаат да ценат кој работи а кој не работи и краде“, рече Мицкоски.
Градоначалникот Дарко Костовски изјави дека е задоволен од денешнниот одзив.
„Она што би сакал да го истакнам е дека ВМРО-ДПМНЕ е народна партија и секогаш заедно со народот ги носи своите одлуки што не е нели момент кој што го почитуваат и другите останати политички партии, особено оние кои што се на власт“, рече Костовски.
Идеи и проекти се предлагаат денес и утре, а ќе продолжат и во текот на следниот викенд. Потоа се очекува општинските совети да ги усвојат буџетите и да почнат со нивна реализација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Македонците се најнесреќни на Балканот, според светскиот извештај за среќа

Граѓаните на Северна Македонија се најнесреќни во регионот, покажува најновиот Светски извештај за среќа за 2023 година.
Спoред медиумите во регионот, Северна Македонија е на 87 место меѓу 137 земји, на последно место на Балканот и меѓу најнесреќните земји во Европа.
Во регионот Словенија е најсреќна и се наоѓа на 22 место, Косово е на 34 место, Србија на 45, Хрватска на 48, Грција на 58 место, Црна Гора на 67, Босна и Херцеговина на 71, Бугарија на 77 и Албанија на 83 место на светскиот извештај за среќа.
Само Грузија (90 место), Украина (92) и Турција (106) се рангирани пониско од Северна Македонија, е наведено во извештајот.
Авганистан и Либан се најнесреќните земји во светот, Финците се најсреќни, а во првите пет се и Данска, Исланд, Израел и Холандија.
Ова е 11-та година од објавувањето на извештајот за 20 март – Меѓународниот ден на среќата, кој беше прогласен од Генералното собрание на Обединетите нации во 2012 година.
Извештајот секоја година го составуваат научници од Соединетите Американски Држави врз основа на анкети на Институтот Галуп, кој опфаќа 137 земји.
Македонија
Поради градежни активности времен прекин на сообраќајот на регионалниот пат Велес – Градско

Поради вградување на асфалтен слој (асфалтирање), од 20.03.2023 до 25.03.2023, регионалниот пат Велес – Градско односно делот од с. Ногаевци до с. Виничани ќе биде затворен за сообраќај од 08:00 до 16:00 часот, информираат од АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Тренчевска: Носењето на нов општ колективен договор е неопходно, ќе даде решение за состојбата на вработените во јавниот сектор

Економскиот социјален совет денеска ја оддржа седмата седница, на која се отвори дискусија за неопходноста од склучување на нов Општ колективен договор и за Предлог законот за систем на плати во јавниот сектор, како точки на оваа седница.
Министерката за труд и социјална политика, Јованка Тренчевска како претседавач на Економско социјалниот совет ја отвори дискусијата и притоа ја нагласи потребата од нов Општ колективен договор, земајќи предвид дека последниот Општ колективен договор е потпишан 2008 година, а во меѓувреме се настанати голем број на измени во законодавството.
Вицепремиерот за економски прашања Фатмир Битиќи посочи дека, Општиот колективен договор ќе даде решение за состојбата на работниците во јавен сектор, условите, правата и обврските на двете страни како производ на социјалниот дијалог.
На денешната седница социјалните партнери се договорија да се формира работна група која ќе работи на подобрување и уредување на предлог текстот на Општиот колективен договор, а така добиениот текст , уште еднаш ќе се разгледа на следна седница на ЕСС. Во работната група, ќе учествуваат претставници од Кабинетот на вицепремиерот Битиќи, Министерството за труд и социјална политика, Министерството за економија, Министерството за финансии, Министерство за информатичко општество и администрација, Организација на работодавачи и Бизнис конфедерацијата на РСМ и Синдикатите.
Од страна на експертот ангажиран за подготовка на предлог законот за систем на плати, беше презентиран предлог законот, по што се отвори дискусија за истиот. Притоа, беше истакнато дека, се работи за сложен и комплексен закон, кој бара посебно внимание, затоа сугестиите и мислењата на сите страни се од големо значење.
Како Влада продолжуваме заедно низ дијалог, да носиме системски решенија кои се правични и даваат резултати на долг рок, велат од кабинетото на Тренчевска.