Владата на СДСМ направи целосен колапс на образовниот систем, националната платформа не издржа ни 30 минути, обвини Марија Митева од ВМРО-ДПМНЕ.

„Владата на СДСМ на само два дена пред и така одложениот старт на учебната година направи целосен колапс на образовниот систем. Денешното тестирање на Националната платформа на министерството за образование за одвивање на онлајн настава не издржа ни 30 минути. Ваквиот колапс предизвикува премногу конфузија кај наставниот кадар, но и кај самите родители и ученици. Откако учениците и наставниците ги добија своите насоки за работа на платформата, истата се покажа целосно нефункционална“, рече таа.

Најпрво, додаде Митева, учениците и наставниците не можеа да воспостават пристап до платформата, а потоа воопшто немаа можност за вклучување.

„Исто така, како една од главните причини поради нефункционалноста на платформата е и големата преоптовареност од корисници. Се поставува прашањето, како за два дена ќе се обезбеди непрекинат пристап и целосна достапност на платформата која како што ја најавија има за цел да обедини 270 илјади ученици?
Иако, министерството за образование и наука претходно ги информираше родителите какви спецификации треба да имаат компјутерите со кои учениците би ја следеле наставата, кои воедно ги оптовари родителите за дополнителни близу 20 илјади денари од семејниот буџет за обезбедување на соодветен компјутер, сепак националната платформа се покажа нефункционална“, рече Митева.

И покрај проблемите со користењето на националната платформа, кажа Митева, сепак над 40 илјади деца во државата нема да можат да следат онлајн настава бидејќи немаат компјутер со потребните спецификации.

„Владата имаше цели 8 месеци да подготви издржано решение, а ние денес на само неколку дена пред стартот на учебната година имаме огромен неуспех. Наместо институционални одговори и решенија имавме политички кампања“, изјави таа.

Министерот за надворешни работи, Бујар Османи, од Европскиот парламент ја почна интензивната агенда во Брисел на средби со влијателни европратеници, претставници на разни политички групи. Во рамките на посетата на Парламентот, Османи се сретна со Клара Добрев, потпретседател на Европскиот парламент од Социјалдемократската партија, Михаел Гахлер, германски европратеник и член на Европската народна партија, Ана Фотига, член на АФЕТ и координатор на европските конзервативци и реформатори, Рајнхард Бутихофер, член на АФЕТ и координатор на зелената партија.

Османи на средбите ги реафирмира заложбите на Република Северна Македонија за евроинтегративниот процес, но ги презентира и приоритетите на својата мандатна мисија како предводник на дипломатијата на Северна Македонија.

„Очекувам навремено усвојување на преговарачката рамка, притоа запазувајќи ги принципите на новата методологија во преговарачкиот процес. Ни претстои период на позитивна клима, многу работа, но и мотив за испорачување резултати од реформите на домашен план. Мојот фокус е продлабочување на добрососедските односи не само како наша автентична придобивка, туку и како активен придонес во регионалната соработка како клучна политика за одржување на европската идеја на Балканот“, истакна Османи.

Од пратениците беше истакната силната поддршка за европската перспектива на Северна Македонија, непречен тек на европската агенда на земјата, усвојување на преговарачката рамка и организација на првата меѓувладина конференција. Тие ја нагласија важноста за континуитет на реформите за создавање позитивна атмосфера за почнувањето преговори, при што беше најавено и продолжување на дијалогот „Жан Моне“ со цел интензивирање на соработката помеѓу политичките партии во насока на инклузивност на процесот на преговорите. Беше истакнато дека концептот на мултиетничка и мирољубива држава, посветена преку компромис и дијалог да доаѓа до решенија, се препознава како голем успех и претставува пример не само за регионот туку и пошироко. Нагласувајќи го геополитичкиот аспект за важноста на проширувањето на ЕУ со регионот, беше едногласно констатирано дека Западен Балкан е важен не само за безбедноста и стабилност на ЕУ туку и за севкупниот економски, политички и општествен напредок на континентот.

На средбите стана збор и за парламентарната соработка, подготовките за следниот мешовит парламентарен комитет меѓу Северна Македонија и Европскиот парламент, а воедно се разговараше и за плановите и временската рамка за подготовка на наредната резолуција на Европскиот парламент за земјата.

Османи во текот на денот ќе се сретне ѝ со високиот претставник за надворешна и безбедносна политика и потпретседател на Европската комисија, Жозеп Борел; а во агендата за денеска се наоѓа ѝ средбата со Мирослав Лајчак, посебен претставник на ЕУ за Западен Балкан и за дијалогот Белград – Приштина.

Во тек е изградбата на втората фаза од изградбата на булеварот АСНОМ, која вклучува изградба на нов мост преку Вардар, кој ќе ја поврзува општина Аеродром со соседните општини Гази Баба и Центар кај населбата Ќерамидница, на крстосницата со булеварот Гоце Делчев и улицата Беласица, изјави Даниела Николова од СДСМ Аеродром.

„Со изградбата на овој мост двојно се крати времето потребно за патување од Ново Лисиче до Центар, односно од Ново Лисиче до ‘Мавровка’ би се стигнувало за помалку од 5 минути“, рече таа.

Николова информира дека во завршна фаза е и реконструкцијата на булеварот Видое Смилевски – Бато, а минатата година целосно биле реконструирани булеварот Февруарски поход и уливата Владимир Комаров на потегот од железничка до булеварот Јане Сандански.

„Преку Општина Аеродром изградивме и реконструиравме голем број улици во сите делови на општината: нови краци на улицата Пандил Шишков, нова улица со јавно паркиралиште покрај улицата Фрањо Клуз, нова улица Новопроектирана 3 кај висококатниците, повеќе краци на улицата Венијамин Мачуковски во Мичурин, улиците Тодор Чангов 20, Тодор Чангов 41 и Ѓорги Крапчев 9, Божин Николов – Силни во Горно Лисиче и улицата 20 во Долно Лисиче. СДСМ продолжува да работи на изградба на нова и реконструкција на постојната патна инфраструктура во сите делови на општина Аеродром“, изјави Николова.