Скандал го тресе МВР по информациите на Европол дека е откриен заговор за атентат врз претседателот на Србија, Александар Вучиќ, од страна на Радоје Звицер, велат од ВМРО-ДПМНЕ.

Скандалозно, како што посочија од партијата, е тоа што атентаторот на Вучиќ, Радоје Звицер е на списокот мафијаши и криминалци кому министерот Оливер Спасовски им издал легален македонски пасош, но под друго име во аферата „мафија“.

„Поминува една година, и виновни за оваа афера каде со македонски пасош се стекнале регионални и светски мафијаши, нема. Освен симболична казна за неколку службеници во МВР кои треба да бидат колатерална штета нема одговорност за вистинските организатори на ваквата мрежа за издавање на македонски пасоши. Нема криминалец кој не оперира со пасошите на Спасовски со македонско знаме. Ова покажува дека покрај срамот за Македонија кој го приредува Спасовски, тој е отворен заштитник на криминалот“, велат од ВМРО-ДПМНЕ.

Звицер е еден од водачите на кавачкиот клан, кој се товари за организирање и нарачување на повеќе убиства на територијата на Црна Гора и други земји.

ВМРО-ДПМНЕ ужива најголема доверба помеѓу граѓаните, затоа администраторот на владата водена од ДУИ, Ковачевски, бега од избори, велат од ВМРО-ДПМНЕ преку соопштение.

„Според анкетите ВМРО-ДПМНЕ води со 22.5% пред СДСМ со 17.9%. Довербата на граѓаните во ВМРО-ДПМНЕ константно расте, додека за СДСМ паѓа.

Претседателот на ВМРО-ДПМНЕ Христијан Мицкоски има најголема поддршка кај граѓаните споредено со сите политичари во Македонија.

Претседателот на ВМРО ДПМНЕ Мицкоски ја ужива довербата на 17.7% од граѓаните, наспроти Димитар Ковачевски кој го поддржуваат само 5.5%.

Ковачевски ги знае анкетите и тенденциите на јавноста, дека поддршката за СДСМ е во константен пад и затоа бега од избори.

Ковачевски нема легитимитет, а нема ниту СДСМ, затоа треба да има нови предвремени парламентарни избори час поскоро.

ВМРО-ДПМНЕ во таа насока идната недела ќе предложи до собранието измени на Изборниот законик, што ќе значи укинување на техничката влада пред избори, со цел да се скратат роковите и да можеме да одиме што побргу на избори, од 45 до 60 дена како што е уставно пропишано. Воедно ВМРО ДПМНЕ е подготвено да разговара и за барањето за една изборна единица“, се наведува во соопштението на ВМРО-ДПМНЕ.

Со конструкции за ЈП Градски Паркинг не може да се сокрие неспособноста на Арсовска, таа не знае да менаџира со парите на граѓаните, велат од СДСМ преку соопштение.

„ВМРО-ДПМНЕ создава конструкции околу ЈП Градски Паркинг во обид да ја сокрие неспособноста на градоначалничката Данела Арсовска нешто да сработи за граѓаните. Додека Град Скопје обезбедува финансиска поддршка од пет милиони денари или над 80.000 евра за ЈП Градски Паркинг, Арсовска ги намалува цените за паркирање кои се главен извор на приход на ова Јавно градско претпријатие.

Толку од менаџерските способности на Арсовска, таа како и другите градоначалници од ВМРО-ДПМНЕ не знае да менаџира со парите на граѓаните. Арсовска и градоначалниците на ВМРО-ДПМНЕ бараат пари од владата, а општинските буџети ги трошат на непродуктивни цели и партизација на администрацијата.

Граѓаните и општините не заслужуваат градоначалници кои работат исклучиво за лични и партиски интереси“, се наведува во соопштението на СДСМ.