Македонија
МОН: Се воведува систем за кариерно следење на матурантите од средните стручни училишта по дипломирањето

Во насока на подигнување на степенот на вработување кај младите, Министерството за образование и наука почнува процес на воспоставување систем за следење на кариерите на матурантите по дипломирањето во средните стручни училишта како активност дефинирана во Стратегијата за образование 2018-2025 година.
Ова го истакна министерот за образование и наука Јетон Шаќири на денешната средба со претставници на средните стручни училишта во државата, на која беше презентиран системот за кариерно следење на матурантите, што ќе се воведе со поддршка од фондовите на ЕУ, кои, како што рече, го поддржуваат реформирањето на нашиот национален образовен систем.
„Системот е веќе креиран и поставен на посебен портал anketi.mon.gov.mk. Ќе функционира со прибирање податоци директно од учениците по дипломирањето, како и од работодавците. Секој ученик од завршната година на образованието ќе може да пристапи едноставно со најава, да наведе воведни податоци за себе и своето средно стручно образование и потоа треба да пополни три прашалници. Еден на почетокот по регистрирањето и два во рок од 6 месеци. Компаниите пак, исто така може да се регистрираат и да пополнат прашалник во врска со нивните потреби и очекувања за вештини што учениците треба да ги поседуваат“, информира Шаќири.
Тој додаде дека оваа постапка на дипломираните ученици и на компаниите ќе им одземе малку време, а прибраните податоци ќе бидат од големо значење за Министерството затоа што ќе претставуваат база за креирање идни политики, но и од значење за училиштата за тоа како и каде напредуваат нивните ученици, што исто така може да иницира промени во интерните политики.
„Она што во моментот најмногу ни е потребно е поддршката од вас, од средните стручни училишта, во делот на промоцијата на оваа алатка, да ги запознаете матурантите што побргу со системот за следење на нивните кариери пренесувајќи им ја клучната порака дека заложбата е за обезбедување подобра иднина за нив, токму тука во сопствената земја“, рече министерот додавајќи дека очекува училиштата да постапат во согласност со насоките што ќе ги добијат и дека кај учениците ќе се развие интерес за учество во целиот процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Администрацијата на јавните обвинителства штрајкува за повисоки плати

Администрацијата на јавните обвинителства штрајкува за повисоки плати.
Бараат зголемување на месечните примања за 78 проценти и враќање на додатоците на плата во висина од 35 отсто.
Штрајкот, како што е објавено, ќе се спроведува во сите 28 обвинителства на територијата на државата и ќе трае се до исполнување на нивните барања. За време на штрајкот ќе се извршуваат единствено итни и неодложни работи.
Премиерот Димитар Ковачевски истакна дека вработените во јавните обвинителства се дел од правосудната фела, и делот на управување не е во надлежност на Владата. Во рамки на она што е можно со Буџетот, рече Ковачевски, Владата ќе излезе во пресрет на сите делови од управувањето со државата, со цел тие да имаат соодветни буџети.
„За распределувањето на буџетот, ако на некои обвинители им се зголемени платите, а на други не, тоа е одлука која се носи од правосудната власт, не се носи во делот на државата. Меѓутоа, 10 проценти зголемување на платите ќе има и дополнително 10.000 денари К-15“, рече Ковачевски.
Македонија
Во Македонија најден Французин кој бил пријавен за исчезнат

Полицијата и припадниците на ФРОНТЕКС пронајдоа 21-годишен Французин кој бил пријавен во својата држава за исчезнат.
Според информациите од МВР, момчето било затекнато при илегален влез на територија на земјава и дало лажен исказ за личните податоци. Сепак, по дополнителни проверки, како што информираат од полицијата, добиена е потврда од француските власти дека станува збор за С.И., француски државјанин, кој во својата земја се води како исчезнат од 11 март.
Лицето, согласно законските регулативи, ќе биде предадено на семејството.
Македонија
Спасовски ја посети езерската полиција во Охрид: ова лето спасени 10 лица

Министерот за внатрешни работи Оливер Спасовски ја посети Полициската станица за граничен надзор „Охридско Езеро“, односно т.н. езерска полиција при Регионалниот центар за гранични работи „Запад“, каде што оствари средба со раководството на оваа организациона единица при МВР, а на која беше брифиран за преземените мерки и активности во врска со оперативниот план „Безбедно лето 2023“ во периодот од почетокот на јули до средината на септември.
„Раководството на Полициската станица за граничен надзор ‘Охридско Езеро’ ме информираше за преземените мерки во текот на летната сезона од страна на полициските службеници, при што биле извршени прегледи на 51 лице, на 18 пловни објекти, на 22 моторни возила, а исто така преземени се и 9 заеднички патроли со инспектор за внатрешна пловидба. Воедно, изразив особено задоволство од спасувачките акции, што ги реализира оваа организациска единица, постапувајќи по 7 пријави пристигнати во СВР Охрид, при што во три настани биле спасени 10 лица и извлечени од водите на Охридското Езеро, кои поради лоши временски услови имале проблеми со пловните објекти, а на едно лице му била укажана прва помош. Во рамките на овие активности успешно биле пронајдени и еден глисер без екипаж, како потоната педалинка, секако без екипаж“, истакна министерот Спасовски.
Спасовски истакна дека планот „Безбедно лето“ носи високи резултати и ја постигнува својата цел – да се подигне свесноста кај граѓаните, да се превенираат ризиците што ги носи летната сезона во интерес на нивната лична безбедност и безбедноста на границата.
Во делот на преземените превентивни мерки реализирани се десетина тематски активности со фокус на високите температури, заштита од сончаница и топлотен удар, самостојно, но и заедно со волонтери од Црвениот крст во Охрид. Притоа остварена е непосредна комуникација со граѓаните што пловат со пловни објекти по езерото, со цел потсетување за тоа како треба да се однесува при топло време и подолга изложеност на сончевите зраци, на кои им беше поделен и едукативен материјал со практични совети на летни теми.
Спасовски потсети на модернизацијата на пловниот парк и зајакнувањето на капацитетите на езерската полиција, која по цели 20 години беше реализирана во 2020 година, со набавка на нови 5 пловни објекти, два од буџетот на МВР, а три како донација од Чешката Република. Пловните објекти се опремени со професионални уреди за навигација, радар и затворена кабина за екипажот, а патролниот чамец е погоден за брзи интервенции во разни инцидентни ситуации и контроли на водниот сообраќај, особено во летниот период во сите три езера.
„На овој начин постигнавме зголемена ефикасност на припадниците на граничната полиција во секакви временски услови како во делот на граничниот надзор и спречување на секаков вид прекуграничен криминал во езерата така и во услови кога е потребно да се даде помош и спасување во водите на езерата од разни причини“, истакна тој.
На крајот од средбата министерот Спасовски ѝ додели плакета на Полициската станица за граничен надзор „Охридско Езеро“ и благодарници на полициските службеници Седат Јашар, Ристо Буклиоски, Веџи Асани, Христијан Грозданоски и Ѓорѓи Целески за преземање навремени мерки и активности при успешно реализираните спасувачки операции во рамките на „Безбедно лето 2023“.