Заменик-претседателот на Владата задолжен за европски прашања, Никола Димитров, попладнево учествуваше на работен видеоконференциски состанок со еврокомесарот за соседство и проширување, Оливер Вархеји, на кој со колегите министри за европски прашања од регионот разговараа за подготовката на Економскиот и инвестициски план наменет за земјите од Западен Балкан, најавен на Самитот во Загреб во мај оваа година.

Вицепремиерот Димитров истакна дека новиот економско-инвестициски план не е само значаен за побрзо надминување на јазот помеѓу економиите на Западниот Балкан и економиите на земјите членки на ЕУ, туку претставува и значајна алатка за поддршка на процесот на пристапување.

„Економскиот и инвестициски план за Западен Балкан е исклучителна можност заеднички да се фокусираме на проекти кои директно ќе создадат долгорочен раст, зголемување на бројот на работни места и дигитална, зелена и иновативна трансформација на економиите од Западниот Балкан, која сите земји ќе ги направи привлечни за сериозни инвестиции од Европската Унија. Немаме луксуз да ја испуштиме оваа шанса и Владата на Северна Македонија ќе направи сè за успешно искористување на можноста“, потенцираше Димитров, притоа нагласувајќи дека со овој економско-инвестициски план Унијата ја покажа својата непоколеблива поддршка за земјите од регионот и својата посветеност на меѓународната соработка и координација, во време кога и самата е соочена со голем број предизвици”, рече Димитров.

Министерот за правда, Бојан Маричиќ, денеска беше во посета на Државната комисија за спречување на корупцијата каде се сретна со претседателката и членовите на антикорупциската комисија.

Во фокусот на денешната средба беа препораките на ГРЕКО од Петтиот круг на евалуација, кој е на тема „Спречување на корупција и промовирање на интегритет кај централната власт (највисоките извршни функции) и органите за спроведување на законот“.

На состанокот се дискутираше и за потребата на зајакнување на антикорупциските политики и потребата од евентуална измена на законите во областа како што се Законот за заштита на укажувачи, Изборниот законик, а се дискутираше и околу потребата за носење закон за потекло на имот.

Воедно, на средбата се дискутираше и околу можностите за зајакнување на капацитетите на Државната комисија за спречување на корупцијата за поефикасна превенција и борба против корупцијата.

Времето утре ќе биде сончево со мала до умерена облачност поголема во западните делови каде што е можна појава на краткотраен локален дожд. Ќе дува слаб до умерен јужен ветер, кој ќе биде најизразен по должина на Повардарието. Минималната температура ќе биде во интервал од 3 до 12, а максималната ќе достигне од 21 до 27 степени.

Во Скопје, сончево со мала до умерена облачност и со слаб до умерен ветер од југоисточен правец. Минималната температура ќе се спушти до 9, а максималната ќе достигне до 25 степени.

До недела ќе преовладува претежно стабилно време. В недела ќе има услови за краткотрајна нестабилност, а потоа до среда ќе биде нестабилно со повремено пороен дожд и грмежи. Утринските температури до вторник ќе бидат во постепено покачување. Ќе дува умерен до засилен ветер претежно од јужен правец, што ќе предизвика дополнителен пораст и на дневните температури.