Македонија
Наследникот на Ципрас во СИРИЗА: Зошто Мицотакис моли да се почитува преспанскиот, а претходно велеше дека е предавнички
![](https://makfax.com.mk/wp-content/uploads/2024/05/гр.jpg)
Стефанос Каселакис – претседателот на грчката опозициска партија СИРИЗА, кој дојде на местото на Алексис Ципрас реагираше откако претседателката Гордана Силјановска-Давкова ја нарече земјата Македонија, за време на свечената заклетва.
Каселакис по тој повод повика на почитување на договорот.
„Ние, како партија која скапо го плати својот патриотизам, го повикуваме новото раководство на Северна Македонија да се вразуми и да размисли за своите одговорности кон историјата и иднината на нејзиниот народ“, порача Каселакис, пренесе „Прототема“.
Истовремено тој го искритикува грчкиот премиер, Киријакос Мицотакис, зошто сега вели дека Договорот од Преспа треба да се почитува, а претходно тврдеше дека е предавнички.
„Зошто грчката амбасадорка ја напушти салата на заклетвата на новата претседателка на Северна Македонија, која ја нарече својата земја со уставното име што го имаше пред Договорот од Преспа? Зошто Кирјакос Мицотакис моли за почитување на Договорот од Преспа? На крајот на краиштата, нели беше предавнички? Премиерот вели дека не му се допаднал Договорот, но државата има континуитет и затоа мора да се почитува“ Не, господине Мицотакис. Никогаш не молите ништо што е негативно за вашата земја да се почитува. Или го сметате за корисен договор за Грција и се држите до него, или го сметате за лош договор и одите кај вашите истомисленици и го поништувате“, рече тој.
Како што додаде, историската вистина понекогаш бавно се појавува, но секогаш ги оправдува храбрите и вистински патриоти.
Грчката влада предводена од СИРИЗА заедно со Владата предводена од СДСМ во 2018 година го потпиша Преспанскиот договор. Двете партии во тоа време ги предводеа Алексис Ципрас и Зоран Заев. Потоа СИРИЗА ги загуби изборите во Грција, а по кампањата на Мицотакис дека договорот со новото име е штетен за Грција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Скопје
Општина Илинден: Зголемен интересот за проширување на индустриските капацитети
![](https://makfax.com.mk/wp-content/uploads/2024/07/kamen-temelnik-5.jpg)
Општина Илинден останува во фокусот на инвеститорите. Во локалните економски зоки секојдневно се отвораат нови стопански објекти, а постоечките ги прошируваат своите капацитети. Проширување на капацитетот направија две компании, Елмед, со доградба на индустрискиот објект за производство, сервисирање и складирање на индустриска опрема, како и компанијата JCS Bard Logistik со изградба на производствен погон со магацини на површина од околу 8000м2, соопштуваат од општината.
Градоначалникот на Општина Илинден, Александар Георгиевски денеска присуствуваше на поставувањето камен темелник во двете компании, кој им посака успешно понатамошно работење. Меѓу другото тој додаде дека Општина Илинден има одлични услови за поволна бизнис клима, како за домашни така и за странски инвеститори. Интензивниот развој на економската инфраструктура, во делот на изградба на транспортна, комунална и енергетска инфраструктура во локалните економски зони во изминатиот период придонесе многу стопански субјекти да го почнат својот бизнис во општина Илинден, но и многу постоечки компании во општината да ги прошират своите капацитети.
И понатаму Општина Илинден останува отворена за сите домашни и странски компании, со цел отворање на нови работни места и поквалитетен живот на граѓаните, се додава во соопштението од општината.
Македонија
Клековски и Аџигогов ги презедоа новите директорски функции во Фондот за здравство
![](https://makfax.com.mk/wp-content/uploads/2024/07/Screenshot-2024-07-03-143932.jpg)
Денеска, се изврши примопредавање на должноста директор на ФЗОРСМ. Досегашните директори м-р Магдалена Филиповска-Грашкоска и д-р Асаф Абдурамани како в.д. директор им ја предадоа должноста на новите в.д. директори Сашо Клековски и Бранко Аџигогов, назначени од Владата на РСМ.
Клековски завршил Медицински факултет на Универзитетот „Св. Кирил и Методиј“ во Скопје и е со 30-годишно искуство како менаџер, аналитичар, консултант во граѓанскиот, јавниот и со приватниот сектор.
Аџигогов доаѓа од редот на вработените и има повеќегодишно искуство во делот на менаџментот на Фондот. Новите директори функцијата ја преземаат од денеска.
Македонија
Македонија ја потпишала изјавата за повлекување на законот за странско влијание во Грузија
![](https://makfax.com.mk/wp-content/uploads/2022/11/mnr-1.jpg)
Министерството за надворешни работи ја потврди позицијата за заедничката изјава од Литванија во Советот за човекови права на Обединетите нации.
„Во врска со објавите на медиумите во однос на заедничката изјава во Советот за човекови права на Обединетите нации, иницирана од Литванија, со која се повикува Грузија да го укине законот за транспарентност на странско влијание, Министерството за надворешни работи и надворешна трговија уште еднаш ја повторува позицијата, која и во текот на вчерашниот ден беше доставена како одговор на новинарско прашање, дека Северна Македонија ја дели загриженоста на ЕУ, којa се однесува на споменатиот закон, што е впрочем наша принципиелна позиција и за слични закони во други држави“, велат од МНР.
Соодветно, додава Министерството, ја поддржуваме и заедничката изјава на Литванија дадена во име на група земји, на која се придруживме и која e објавена на официјалната страница на Советот за човекови права, што е вообичаена пракса.
Законот бара медиумите и невладините организации и другите непрофитни организации да се регистрираат како „ги извршуваат интересите на странска сила“ доколку добијат повеќе од 20 отсто од своето финансирање од странство. Владата во Грузија вели дека предлог-законот е неопходен за да се запре, како што смета, штетното странско влијание врз политиката на земјата и да се спречат неодредени странски актери да се обидат да ја дестабилизираат.
Опозицијата во таа земја го осуди предлог-законот споредувајќи го со руски закон бидејќи Москва користи слична легислатива за сузбивање на независните медиуми, непрофитните организации и активистите што го критикуваат Кремљ.
Земјите потписнички, освен отповикување на законот, ја повикаа владата во Тбилиси да ги запре процесите против новинарите, граѓанските активисти и другите граѓани што протестираа против донесувањето на законот и да се истражат сите случаи на насилство што беа применети против овие граѓани.
Во Грузија се регистрирани речиси 31.000 невладини организации.