Македонија
Најголема битка е да ве задржиме дома, им порача Димитров на младите
Во организација на Американското катче – Битола, заменик-претседателот на Владата задолжен за европски прашања, Никола Димитров, денеска имаше виртуелна средба во форма на градско собрание (Youth Town Hall) со младите од регионот на Битола и Струга, наменета за воспоставување транспарентен разговор на теми поврзани со Европската Унија и пристапувањето на Северна Македонија.
Вицепремиерот Димитров им порача на младите луѓе дека тие се иднината на државата поради што треба да бидат активно вклучени во општествените процеси и креирањето политики во областите што се од нивен и општ интерес.
„Нашето будење како општество почна токму со вашето барање за подобро образование и иднина во нашата земја. Нашата најголема битка е да ве задржиме вас младите дома и затоа се определив да работам на тоа да ја направиме нашата земја европска, да овозможиме европски стил на живеење дома наместо нашите млади луѓе да заминуваат во странство. Тој процес е како градење куќа – со членството во НАТО ги осигуривме темелите, со пристапувањето кон ЕУ сакаме да си го уредиме домот внатре, да ги пренесеме европските вредности и стандарди и да створиме општество еднакво за сите“, рече Димитров.
Тој зборуваше за процесот на пристапување кон Европската Унија, придобивките и предизвиците што ги носи членството, а се осврна и на актуелните прашања поврзани со европската интеграција на Северна Македонија. На заинтересираните еврооптимисти им ги претстави програмите за млади и нагласи дека со членството во ЕУ се зголемуваат можностите за работа и образование за младите надвор од сопствената држава, но истакна дека со процесот на европеизација би се намалиле причините поради кои младите ја напуштаат државата.
„Мојата генерација има обврска да обезбеди подобар почеток за идните генерации, што подразбира мир и стабилност на државата, вработување засновано на способности и квалитети, правда во судниците, компетентно образование, опремени болници, чисти воздух и езера. Членството во ЕУ е двонасочна улица – ви овозможува многу повеќе можности за живот надвор, но нашата мисија низ тој процес е да имате повеќе причини да останете дома затоа што и тука ќе имате исти правила и квалитет на живот“, истакна тој.
Младите луѓе на настанот покажаа голем интерес за европското досие на Северна Македонија и начинот на функционирање на Европската Унија, но и желба за придонес кон овие процеси, информираат од кабинетот на Димитров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Перински: Рамномерниот регионален развој започнува од малите општини и таму инвестициите најмногу се чувствуваат
Во рамки на караванот „Каде што срцето е дома“, министерот за локална самоуправа, Златко Перински ја посети Општина Лозово. Во текот на посетата Перински оствари средба со градоначалникот Бошко Цветковски и членовите на Советот на општината, на која се разговараше за клучните активности на министерството, можностите што им стојат на располагање на општините, како и за конкретните потреби и развојни планови на Општина Лозово, насочени кон подобрување на квалитетот на живот на граѓаните.
Министерот нагласи дека неговата цел, како што се покажа и изминатиот период, е да биде присутен на терен и директно да ги слушне потребите на општините. На средбата стана збор и за воспоставениот Ресурсен центар, преку кој општините може да обезбедат поддршка за полесно и поефикасно водење на клучните процеси.
Во рамки на посетата беше извршен и увид на два проекти:
„Реконструкција и партерно уредување на КП бр. 2411 во населено место Лозово“ и „Реконструкција и партерно уредување на КП бр. 2055 во населено место Лозово“, кои се финансирани преку Програмата за намалување на диспаритетите и во рамките на планските региони и зголемување на регионалната конкурентност за 2025 година. Вкупната вредност на проектите изнесува 6.171.976 денари.
Преку овие проекти, граѓаните на Општина Лозово добија ново детско игралиште, современо осветлување, урбана опрема и партерно уреден јавен простор пред општинската зграда, со што се добива нов простор за дружење и секојдневни активности, велат од министерството.
Македонија
(Видео) Манасиевски: ССМ и Слободан Трендафилов одбиле 40% покачување на платите во следните 2 години на штета на работниците
Синдикалецот на батерии Слободан Трендафилов со плата 3-4 пати поголема од минималната која ја добива благодарејќи на работниците кои членуваат во неговите синдикати, им го сврте грбот и не прифати зголемување на платите во администрацијата за 40% во следните 2 години, обвини Валентин Манасиевски од ВМРО-ДПМНЕ.
„Слободан Трендафилов кој е многу гласен кога СДС е во опозиција, а тивок кога тие беа на власт, го одбил предлогот на Владата предводена од ВМРО-ДПМНЕ за зголемување на платите на административните службеници за 40% во следните две години. Зошто? Само затоа што не сакал да го потпише новиот колективен договор. Трендафилов ги остави работниците на цедило и без повисоки плати, затоа што е политички заробеник од страна на СДС. Договорот што тој лично заедно со минатата министерка за труд и социјална политика, а сегашна потпретседателка на СДС, Јованка Тренчевска го потпишал е истечен, а со тоа се отвора можност за нов колективен договор, за кој Владата предводена од ВМРО-ДПМНЕ предлага административните службеници да добијат 40% повисоки плати за 2 години. Ова ССМ и Слободан Трендафилов и УПОЗ на чело со Трпе Деаноски го одбиваат“, рече Манасиевски.
Според него, отворената поддршка која ССМ ја добива од Левица и од СДС, јасно говори кој седи позади овој организиран денешен протест.
Македонија
Зелен хуман град: Државата ни е заробена од недопирливи функционери што си носaт криминални закони
Актуелнава власт си донела нов закон за инспекциски надзор и тоа по скратена постапка кој почна да се применува од 1 јануари годинава. Нема повеќе дури ни про форма можност да се одземе овластување на инспектор од независна институција. Сега никој ништо не им може дури ни законски, реагираат од граѓанската иницијатива Зелен хуман град.
Како што истакнуваат, за одземање на овластувањата на инспектор е задолжено раководното лице на институцијата.
Според нив истото раководно лице од кое инспекторот добива насоки за работа.
„Што значи од една страна заштита и неказнивост за „подобните“, а од друга страна изложеност на „неподобните“ инспектори на политички реваншизам и мобинг.
Иако 18 пратеници гласале против, а 17 воопшто не гласале, никој не алармирал јавно за ова катастрофално уназадување во клучна сфера што има силно влијание врз нашите животи – одговорното и професионално спроведување независен инспекциски надзор“.
Да се потсетиме како изгледа инспекција во пракса: Случај Тораница,
директорката на ДИЖС јавно признава дека инспекторатот постапил незаконски со неземање мостри на денот на хаваријата зашто ,,се гледало дека има хаварија, не требало таа со мостри да се докажува”.
Случај Усје, истата директорка јавно убедува дека ниеден од најавените надзори во Усје не констатирал загадување над дозволеното.
Од Зелен хуман грда оценуваат дека неказнивоста, прикривањето криминал и крајната некомпетентност на лица на функции нè чинат животи.
„Моќта да се носат одлуки во име на колективот не смее да ја имаат функционери што се дел од мрежи што прикриваат криминал, релативизираат хаварии и ни продаваат „законитост“, а притоа трујат вода, воздух и луѓе преку систем што е наменски дизајниран за легално избегнување одговорност на лица на функции што ни ги загрозуваат животите на дневна основа“.

