Македонија
Најголем дел од заболените изминатата недела се лица над 60 години
![](https://makfax.com.mk/wp-content/uploads/2020/05/95668793_277710569923521_5001281501120167936_n.jpg)
Минатата недела, односно за седум дена, регистрирани се вкупно 1.073 нови позитивни случаи на коронавирус од вкупно направени 9.995 тестови. Тоа значи дека 10,73 проценти од тестираните биле заразени.
Повеќе од половина од нив во епидемиолошката анкета не пријавиле дека имале контакт со веќе заразено лице, ниту, пак, дека патувале во странство.
Останатите, 423 заболени имале контакт со потврден случај, а регистрирани се и 22 лица со историја на патување во последни 14 дена.
Најголем дел од случаите или 42 проценти се од Скопје.
Центарот за јавно здравје регистрира заболени од сите возрасни групи, но најзастапени се граѓаните над 60 години со 245 позитивни, а потоа и лица на возраст од 30 до 39 години, кои се вкупно 20 проценти, па следуваат заразените на возраст од 50 до 59 години со 19 проценти и од 40 до 49 години со 18 проценти. Најмал број на заболени е регистриран кај деца од 0 до 9 години и од 10 до 19 години.
Според извештајот на Центарот за јавно здравје, од заразените регистрирани изминатата недела 542 се женски лица, а 531 се машки лица. Од случаите кои се епидемиолошки истражени, регистрирани се 114 хоспитализирани, а кај 270 лица е регистрирано присуство на коморбидитети.
Од пријавените 36 смртни случаи во седум градови за една недела, најголемиот дел или 17 лица се од Скопје, а потоа, шест од Тетово, четири од Гостивар, две лица од Штип, четири од Струга, два од Куманово, еден од Дебар.
Како оздравени, се водат 1.017 лица кои биле хоспитализирани или на домашно лекување, откако добиле два негативни теста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Поминаа три години од пожарот во модуларната болница во кој изгореа 14 луѓе
![](https://makfax.com.mk/wp-content/uploads/2023/08/modularna-bolnica-tetovo-pozar.jpg)
До денес изминаа точно три години од пожарот во модуларната болница во Тетово во кој животот го загубија 14 луѓе, а десетина беа повредени.
Од жртвите кои починаа поради пожарот, 12 беа на болничко лекување таму како заболени од ковид-19, додека двајца беа членови на семејствата на болните.
Основен суд Тетово спроведе судски процес во текот на 2022 и 2023 година, а со решение на Апелациски суд годинава требаше да почне и повторено судење за дел од обвинетите.
По пожарот на 8 септември 2021 година, почна истрага, која резултираше со обвинителен предлог до Основен суд Тетово на 27 јули 2022. Првиот судско рочиште беше закажано за 6 септември 2022 година, но по неколку одложување процесот почна на 4 декември 2022 година.
По шест месеци, на 5 јуни 2023 година Основен суд Тетово одреди условна осуда за Флорин Бесими и Артан Етеми, директори на Клиничка болница Тетово за кривично дело „тешки дела против општата сигурност“, додека правното лице ЈЗУ Клиничка болница беше прогласено за виновно за делото „предизвикување општа опасност“ во судскиот процес по пожарот во модуларната болница во Тетово во 2021 година кога животите ги загубија 14 луѓе.
Судот тогаш одлучи да има ослободителна пресуда за докторот Бобан Вучевски и Клиничка болница за делото „непостапување по здравствени прописи“.
Основното јавно обвинителство Тетово на 10 јули 2023 година поднесе жалба на изречената првостепена пресуда.
По оваа жалба расправаше Апелацискиот суд во април 2024 година, а при тоа донесе решение со кое наложи да има повторно судење за поранешните директори на тетовската болница Флорин Бесими и Артан Етеми, како и Јавната здравствена установа Клиничка болница Тетово како правен субјект. За докторот Бобан Вучевски, Апелацискиот суд ја одби жалбата на Обвинителството и ја потврди првостепената ослободителна пресуда за него.
На 26 јуни 2024 година беше закажано првото рочиште за повторното судење за двајцата директори, но беше одложено за 25 септември 2024 година поради отсуство на претставници на Клиничка болница Тетово.
Во првичната пресуда од 5 јуни 2023 година на обвинетите Флорин Бесими и Артан Етеми им беше утврдена казна затвор од по една година и шест месеци, условна осуда и утврдената казна затвор нема да се изврши доколку обвинетите секој за себе во време од по три години не сторат ново кривично дело. Правно лице требаше да плати парична казна во висина од еден милион денари, 30 дена по правосилност на пресудата.
На 8 септември 2023 година на двегодишнината беше одржан јавен марш и протест пред судот во Тетово во организација на семејствата на 14 луѓе кои ги изгубија животите во пожарот во тетовската модуларна. Семејствата организираа јавен марш и протест и на 15 септември 2023 година и во Скопје. Протестниот марш почна на плоштадот Скендербег и заврши пред зградата на Јавното обвинителство.
Македонија
Агелер по повод 8 Септември: Денес и секогаш, ја почитуваме вашата историја
![](https://makfax.com.mk/wp-content/uploads/2023/07/ageler-2.jpg)
Амбасадорката на Соединетите Американски Држави, Анџела Агелер упати честитка по повод Денот на независноста на земјава – 8 Септември.
Во видео обраќањето кое го објави Амбасадата на САД во Скопје, Агелер вели „на овој посебен ден се придружуваме на Северна Македонија и на сите вас во прославата на вашата независност и вашите динамични и разновидни заедници“.
Како и нашата независност, вашата беше тешко здобиена, со безброј жртви направени од оние кои верувале во моќта на слободата и демократијата. Денес и секогаш, ја почитуваме вашата историја, вашата сегашност и светла иднина, рече Агелер.
Македонија
Филипче за 8 Септември: Во овие три децении, Македонија ги зајакна своите институции
![](https://makfax.com.mk/wp-content/uploads/2024/08/Venko-Filipce.jpg)
Денешниот 8 Септември и 33 години независност на нашата Македонија нѐ потсетуваат на силата, единството и храброста што ја имавме кога го избравме патот на суверенитет и самостојност, наведува во постот на Фејсбук лидерот на СДСМ, Венко Филипче.
Во изминатите 33 години, нашата татковина се изгради како независна, суверена држава, одлучна да го заземе своето место на европската и на светската сцена, потенцира тој.
-Овој пат не беше лесен и беше исполнет со предизвици, но и со многу достигнувања. Патот што го избравме пред три децении е потврда на нашата колективна волја за достоинство и просперитет. Во овие три децении, Македонија ги зајакна своите институции, ја обезбеди својата меѓународна позиција и создаде услови за економски и социјален напредок, вели Филипче.
Претседателот на СДСМ потенцира дека нашата држава денес се наоѓа пред многу искушенија, кои бараат од нас да покажеме уште поголема зрелост, сплотеност и одлучност.
-Во ова време на нови предизвици поврзани со понатамошниот пат по кој ќе се движи Македонија, време е нашата сила и способноста на нашите граѓани да ја искористиме за да ја надминеме секоја препрека што стои на патот кон подобро утре. Пред нас е одговорноста да ја продолжиме изградбата на општество каде што секој граѓанин ќе има еднакви можности, а нашата земја ќе биде пример за стабилност, толеранција и напредок. Честит 8 Септември!, стои во честитката на претседателот на СДСМ, Венко Филипче.