Македонија
Најчевска: И Бугари и свети Бугари, и ветото да го тргнат, ако за секој чекор ни треба некој да нè мава по уши, нема да смениме ништо

Сега е моментот да запреме, да не прифаќаме уставни измени и да не одиме на вонредни избори, советува професорката Мирјана Најчевска во интервју за „Макфакс“.
Македонија, како што вели, треба да почека да се промени ситуацијата во ЕУ, каде што, како што вели, има силни струења, кои се насочени кон тоа да го променат начинот на гласање во ЕУ, односно ветото веќе да не биде нешто со кое една или две држави ќе може да спречат процеси што се одвиваат.
„Кај сме чекале толку години, можеме да почекаме уште 2-3 и да почнеме да работиме на самите себе“, истакнува Најчевска.
Појаснува дека не ни треба некој да нè мава по уши за да почнат да работат институциите и да почнеме да се бориме со корупцијата.
„И Бугари и свети Бугари, може и ветото да го тргнат, сè додека за секој чекор нам ни треба некој да нè мава по уши, не можеме да смениме ништо“, додава таа.
Според неа, и Мицкоски и Ковачевски се шарлатани и тие, како што оценува Најчевска, се случајни луѓе, кои во случаен момент дошле на позициите и многу е лошо што такви луѓе се на позиции на двете најголеми политички партии.
„Ковачевски вели дека овој предлог, најнегативниот можен предлог што го даде Франција, бил македонски. Колку треба да си голем шарлатан за да можеш такво нешто јавно да кажеш, дека ти самиот сакаш да бидеш понижен, дека сакаш да бидеш третиран како народ од втор ред“, прашува Најчевска.
Оценувајќи ја политиката на странските дипломати кон државата, Најчевска истакнува дека дури и оние што обично работат со ракавици, кај нас ги фрлаат и се чудат.
„Тоа е таков апсурд, што дури на дипломатите, кои обично работат со ракавици, ги симнаа ракавиците и викаат: луѓе, а бре, толку глупави да сте, не можеме ни да замислиме. Ајде ако лажете, но барем скријте, немојте отворено да го кажувате она што не смеете да го кажете. Тие отворено се гордеат дека се криминалци. Викаат – ние сме горди криминалци“, додава професорката.
Таа гледа злоупотреба на службената должност од страна на собранискиот спикер Талат Џафери за собраниската седница за уставните измени и оценува дека Џафери треба да биде и кривично гонет.
Кој има поголемо влијание во државата – ЕУ или Америка, до кога ќе трае ваквата неизвесност и какви импликации може да има врз граѓаните, за Османи и за изјавата на Скендер Реџепи и на Таравари и слично поопширно во интервјуто за „Макфакс“ со професорката Мирјана Најчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Утре дел од Скопје без вода

Поради дефект на цевка со пречник од 100 милиметри на улицата „1 Долно Лисиче“ бб. утре од 10:00 часот прекинато водоснабдување ќе имаат корисниците од населено место Долно Лисиче.
Како што информираат од ЈП „Водовод и канализација“ – Скопје, корисниците ќе бидат без водоснабдување се до завршување на интервенцијата.
Поради изведување, пак, на водоводен приклучок од 80 милиметри на улицата „Владимир Назор“ бр.8 во населбата Водно утре од 11:00 часот прекинато водоснабдување ќе имаат корисниците од таа улица и од дел од улицата „Кумровец“. Корисниците ќе бидат без вода се до завршување на интервенцијата.
Македонија
Спасовски: Со партнерството со Словенија успеавме да бидеме пример како може соработката да се одржува, негува и продлабочува

Министерот за внатрешни работи Оливер Спасовски за време на работниот престој во Љубљана, Република Словенија, се обрати на настан под покровителство на амбасадата на Република Северна Македонија, по повод одбележување 30. години од отворањето на првата амбасада во светот по независноста и осамостојувањето на државата, а на покана од домаќинот на настанот, амбасадорот Горан Милевски, во присуство на заменик Претседателката на Владата на Република Северна Македонија, Славица Грковска, министерот за внатрешни работи на Република Словенија, Боштјан Поклукар, претставници на Дипломатскиот кор, стопанственици и претставници на верските заедници, како и сонародници-иселеници од нашата држава.
„Можам да потврдам дека изминативе години со нашето партнерство и соработка со Република Словенија ние успеавме да бидеме пример и да покажеме, не само на просторот на поранешната држава туку и пошироко – како може, кога постои добра волја и низа заеднички интереси, соработката меѓу две земји да се интензивира, одржува, негува и продлабочува примарно имајќи ги во предвид потребите на нашите граѓани, одржувајќи ги на високо ниво претходно воспоставените одлични релации. Дотолку повеќе што во сиве овие години наназад како држави и како институции споделувавме заеднички вредности”, истакна министерот Спасовски, изразувајќи посебна благодарност до Владата на Република Словенија и до словенечкиот народ бидејќи токму Република Словенија беше и остана доследен и лојален партнер на евроатлантски пат на Република Северна Македонија.
„Од аспект на работењето на министерствата за внатрешни работи на Република Северна Македонија и на Република Словенија, изминативе три децении се период на динамична и плодотворна тесна соработка крунисана со мноштво значајни билатерални договори и конкретни активности во кои што словенечката полиција е тесно инкорпорирана во речиси сите суштински реформски исчекори на македонското МВР во насока на имплементирање на сите важни европски полициски стандарди и критериуми”, рече министерот Спасовски, со уверување дека и во годините пред нас може веќе воспоставената билатерална и мултилатерална соработка преку разните иницијативи, форуми, меѓународни асоцијации, уште повеќе да се продлабочи, да се динамизира во интерес на националната, но и регионална безбедност.
Македонија
Грковска по повод 30 годишнината од дипломатските односи меѓу Македонија и Словенија: Солидарноста секогаш била и ќе остане белег на нашето цврсто пријателство

Заменичката на претседателот на Владата задолжена за политики за добро владеење, Славица Грковска, имаше обраќање на вечерашниот прием, организиран од амбасадата на Република Северна Македонија во Словенија, по повод 30 годишнината од воспоставувањето дипломатски односи меѓу двете земји и отворањето на првото дипломатско претставништво по прогласувањето на независноста на нашата држава.
„Велат пријатели требаат и во добро и во лошо. Овие три децении го потврдија нашето пријателство и покажаа дека навистина и во добро и во лошо бевме заедно и си пруживме поддршка во сите моменти кога тоа беше неопходно. Солидарноста секогаш била и секогаш ќе остане белег на нашите односи, на нашето цврсто пријателство“, истакна вицепремиерката Грковска и додаде дека токму амбасадата во Љубљана е симбол на независноста и симбол на тешкиот дипломатски пат кој го изоде нашата држава за денеска да биде полноправна членка на НАТО и да чекори по евроинтеграцискиот пат за да се придружи на големото европско семејство.
Таа се заблагодари за отвореноста на Словенија да им овозможи студирање на словенечките универзитети на голем број македонски студенти и изрази надеж дека младите кои се стекнуваат со искуство во европските земји, потоа ќе одлучат својата иднина да ја градат дома, во својата татковина, со своите семејства.
„Словенија беше и верувам секогаш ќе остане наш поддржувач и во рамките на евроинтеграцискиот процес на Северна Македонија, поддршка којашто е исклучително важна, особено во делот на спроведување на реформските процеси, со цел да ги достигнеме европските стандардни вредности. Вашето искуство за нас е непроценливо имајќи предвид дека делиме заедничко минато, а целиме и кон заедничка иднина во европското семејство“, заклучи вицепремиерката Грковска на приемот во амбасадата во Љубљана, на кој присуствуваше и министерот за внатрешни работи, Оливер Спасовски.