Министерката за образование и наука, Мила Царовска, го посети општинското основно училиште „Кирил и Методиј” во Тетово, каде наставата ќе се одвива со физичко присуство од прво до трето одделение, а во погорните одделенија со настава од далечина.

„Ако заедно се соочуваме со предизвиците, тие полесно се надминуваат. Ова се покажува и во училиштето ’Кирил и Методиј’ каде соработката на локалната самоуправа и училиштето, како и целосното вложување на наставниците резултираат со подготвеност за старт на училишната година на двата начини. Видовме дека се почитуваат мерките и протоколите за безбедно одвивање на наставата, направено е обележување на патеките, набавени се топломери а клупите се поставени на пропишаното растојание. Наставниците се вклучени во тестирањето на онлајн платформата“, изјави министерката Царовска.

Градоначалничката на Тетово, Теута Арифи, истакна дека соработката на сите нивоа ќе биде клучна за одвивањето на наставата во услови на пандемија.

„Сите сме свесни дека ова е чувствителен период, школска година што не личи на други. Сите мора да бидеме солидарни и со разбирање во целиот овој процес“, рече Арифи.

За итни набавки за заштита од коронавирусот, во првите шест месеци од кризата, биле потрошени 6,7 милиони евра, покажува извештајот од истражувањето на Центарот за граѓански комуникации.

Со 2,2 милиони евра, според износот на склучени договори води Министерството за внатрешни работи, на кое, како што покажуаат наодите од истражувањето, му отпаѓа една третина од вредноста на овие договори.

-43 % од вредноста на сите тендери им припаднала само на пет фирми, иако вкупно 186 фирми добиле тендер поврзан со коронавирусот.
-За 68 % од склучените договори институциите ја прекршиле законската обврска да ги објават договорите во рок од десет дена од потпишувањето.
-На секој трет склучен договор за итните јавни набавки поврзани со коронавирусот се преговарало само со еден понудувач.
-Постојат значајни разлики во цените на набавените маски, скафандери и ракавици.
-Дел од договорите не содржат прецизен опис на производите што се набавуваат, што остава простор за злоупотреби при реализација на договорите, се наведува во истражувањето на ЦГК.

ЈП Водовод и канализација – Скопје соопшти дека фекалниот колектор во Ѓорче Петров е ставен во функција со полн капацитет.

„Заради несовесно и неодговорно однесување на граѓаните, фекалниот колектор ф500 долж ул. Лука Ѓеров, во општина Ѓорче Петров долго време не функционираше со својот полн капацитет. За таа цел, беше откопан на длабочина од четири метри при што беа отстранети причинителите за неговото затнување. Од увидот на терен беше потврдено дека за долгогодишната нефункционалност на колекторот придонел човечки фактор“, соопштија од претпријатието.

Со ова повторно се воспостави нормален режим за одведување на отпадните води во овој дел од градот Скопје.

Директорот на ЈП Водовод и канализација – Скопје, Душко Весовски, ги повика граѓаните да бидат одговорни и да се однесуваат совесно со цел заштита не само на системот за водоснабдување, туку и на животната средина.