Окружното обвинителство на Софија го обвини докторот Ненад Цоневски за намерно сурово однесување кон животно, обвинение кое спаѓа под кривична одговорност предвидена во Кривичниот законик, јавија бугарските медиуми.

Денес, во 16:30 часот, пред централниот влез на Воено-медицинската академија во Софија ќе се одржи протест под слоганот „Правда за Маја“, насочен кон борба против суровоста кон животните и поддршка на построги законски санкции во вакви случаи.

Повод за организирање на протестот е инцидент во кој Цоневски прегази куче во Софија. Кучето, по име Маја, беше тешко повредено и последователно беше евтаназирано.

Името на Цоневски е поврзано со Воено-медицинската академија, каде што работел. Порано оваа недела, раководството на болницата објави дека докторот е привремено суспендиран од својата позиција додека случајот не се расветли.

Бугарските медиуми вчера објавија дека Цоневски се вратил во Македонија. „Специјалистот по торакална хирургија, д-р Ненад Цоневски, кој беше снимен на 9 ноември како го прегазува кучето Маја во населбата Разсадника во главниот град со својот ‘Фолксваген Пасат’, се врати кај своите родители во неговиот роден град Делчево, Северна Македонија“, објави Телеграф.

Пред да ја напушти Бугарија, докторот бил испрашуван во полициска станица, по што бил ослободен.

Случајот предизвика сериозна јавна реакција на социјалните медиуми и онлајн платформите. Петицијата со која се бара целосна и непристрасна истрага собра над 220.000 потписи. Луѓето бараат ефикасно спроведување на законот и воведување посериозни санкции за намерно насилство кое резултира со смрт или тешко страдање на животните.

„Сакаме да испратиме јасна порака дека ваквите дејствија нема да се толерираат и дека мора да има реални последици за сторителите“, коментираа организаторите на протестот, цитирани од Бугарското национално радио.

На социјалните мрежи се јавија и граѓани со поддршка за Цоневски.

„Ние, група на граѓани за поддршка на Д-р Ненад Цоневски и сакаме јавно да ја изразиме нашата морална поддршка за докторот Ненад Цоневски – наш сограѓанин кој е млад и перспективен човек, а кој неодамна ненамерно згазил улично куче во Бугарија — несреќен настан што може да му се случи на секој возач. Сметаме дека е неправедно овој несреќен случај да се користи за јавна осуда и навреди кон еден човек кој својата кариера и живот ги посветил на помагање на другите. Доктор Ненад Цоневски е првенец на својата генерација, завршил медицински факултет со исклучителен успех и моментално специјализира хирургија. Познат е по својата посветеност, хуманост и скромност“, се вели меѓу другото во писмото испратено од Група за поддршка на д-р Цоневски .

Од ЈП Водовод и Канализација известуваат дека утре поради изведување приклучок на улицата Александар Урдаревски бб за Полициска станица Бутел во населба Бутел, прекинато водоснабдување ќе имаат корисниците на две куќи од улицата Александар Урдаревски, во општина Бутел.

Водоснабдувањето ќе биде прекинато од 10:00 часот до санирање на дефектот.

Министерството за внатрешни работи заедно со Републичкиот совет за безбедност на сообраќајот на патиштата ја започнаа зимската кампања под мотото „Вози безбедно – стигни сигурно“, со превентивно-едукативна активност на наплатна станица „Петровец“, спроведена заеднички со полициски службеници од Секторот за сообраќајни работи при Бирото за јавна безбедност и полициски службеници од Мобилната единица за безбедност на сообраќајот на патиштата.

Во пресрет на зимските услови, кампањата има за цел да ги да потсети возачите дека од 15 ноември до 15 март задолжително е поседување на пропишана зимска опрема, како и да ги едуцира возачите за правилно користење на истата.

Под пропишана зимска опрема за моторни возила до 3.500 кг се подразбира зимски пневматици со минимална длабочина на шарите на слојот што гази по обем и широчина од 4 мм на сите четири тркала или летни пневматици со минимална длабочина на шарите на слојот што гази по обем и широчина од 4 мм на нагазен слој по ширина и должина и синџири за снег за погонските тркала. За возила со моторен погон на сите четири тркала (4×4) зимски пневматици на сите тркала со минимална длабочина на шарите на слојот што гази по обем и широчина од 6 мм или летни пневматици со минимална длабочина на шарите на слојот што гази по обем и широчина од 4 мм и синџири за снег, известува МВР.

Зимските услови носат повисок степен на ризик: лизгави коловози поради снег, мраз или „голомразица“, намалена видливост поради густа магла или врнежи, подолг пат на сопирање и нестабилност при нагли движења, како и зголемена заморливост кај возачите.

Министерството за внатрешни работи и РСБСП апелираат до сите учесници во сообраќајот да ги следат следниве препораки:

• следете ги информациите за временските услови на патиштата;
• прилагодете го возењето според условите на патот;
• почитувајте ги сообраќајните правила и прописи и патната сигнализација;
• носете зимска опрема во возилото и користете ја соодветно;
• направете зимска проверка на возилото;
• одржувајте безбедно растојание меѓу возилата;
• избегнувајте нагло сопирање и нагло намалување или зголемување на брзината на возилото.

„Со оваа кампања ја испраќаме пораката дека безбедноста на патиштата е заедничка обврска и само така може да се изгради култура на одговорно и безбедно однесување во сообраќајот“, додаваат од МВР.