Македонија
На оглас за Македонец(ка), Шаќири ја вработува Љуљиета Ќерими и вели дека изборот е целосно уреден

Министерството за образование ја вработува Љуљиета Ќерими на работно место раководител на сектор за средно образование, образование на возрасни и доживотно учење на оглас во кој е напоменато дека работното место, во согласност со годишниот план за вработување, е за Македонец/Македонка. Љуљиета Ќерими е поранешна директорка и заменик-директорка на основното училиште „Хасан Приштина“ во Чаир, која досега, според јавно достапните документи, се изјаснувала како Албанка.

Министерството за образование ја објави одлуката за избор на Љуљиета Ќерими минатата недела
Од Министерството за образование немаат конкретно објаснување како се случило на оглас за Македонец/Македонка да биде избрана Ќерими, но уверуваат дека изборот за кандидатката е целосно уреден.
„Постапката за вработување ја спроведува Агенцијата за администрација, а претставници на МОН членуваат во комисија за верификација на изборот. Во согласност со условите од јавниот конкурс избраниот кандидат е целосно уреден и има остварено најмногу поени во сите фази од процесот на селекција“, велат од кабинетот на министерот Јетон Шаќири за „Макфакс“.

Ќерими се изјаснувала како Албанка додека работела во училиштето „Хасан Приштина“
По тврдењето дека изборот на кандидатка е уреден, „Макфакс“ побара дообјаснување од кабинетот на министерот дали и во која фаза го смениле огласот, во кој стои дека бараат Македонец/Македонка и како кандидатката го исполнила условот, но прашањата останаа неодговорени.

Во огласот од 3 јануари годинава напоменато е дека се бара Македонец(ка)
Не одговорија на прашањата ниту од Агенцијата за администрација, која во согласност со истакнатите правила на нивната веб-страница националноста требало да ја утврди веднаш по аплицирањето. Од таму не кажаа ниту колку апликации за работното место им стигнале.
И избраната кандидатка Ќерими не одговори на прашањата од „Макфакс“ дали се изјаснила како Македонка или се смениле критериумите на оглас во однос на националноста.
Огласот за вработување раководител на секторот за средно образование е од 3 јануари годинава, а одлуката за избор на Љуљиета Ќерими е објавена минатата недела, на 8 февруари, по завршувањето на сите фази за селекција на кандидатите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Транспарент со натпис „Правда за Крешник“ поставен на автопатот Скопје – Гостивар

Транспарент на кој пишува „Правда за Крешник“ е испишан на македонски и албански јазик.
Тој е поставен на надвозник на автопатот Скопје-Тетово-Гостивар. Ова го објави пратеничката на ВМРО-ДПМНЕ, Дафина Стојаноска.
„Да ги оставиме институциите да си ја завршат работата. Обвинителството и судот да работат по словото на законот.Правда за Кочани мора да има“, напиша Стојановска.
Бектеши стана осомничен за пожарот во дискотеката „Пулс“ во Кочани, како поранешен министер за економија и му беше определен притвор од 30 дена.
Дискотеката во минтото работела со легална дозвола издадена од Економија, иако не исполнувала никакви услови.
Македонија
Во телефонот на Кешишев, Палевски бил запишан „царот“: „Го видов Палчо со пиштол и се слушна тап истрел“

По барање на одбраната на Влатко Кешишев, обвинетиот Љупчо Палевски-Палчо беше отстранет од судницата оти му било страв да зборува пред него.
Кешишев потоа одговараше на прашањата на одбраната и обвинителството за случаите со грабнувањата и убиствата на Вања и Панче, тврдејќи не бил свесен за она што се случува.
Палевски му бил мемориран во телефонот како „Царот“. Потврди дека присуствувал на копањето на дупката во Велес, каде што беше пронајдено телото на Панче. Палевски го испратил да му помогне на Велибор Манев, па заедно ја копале дупката без да разговараат и без изустен збор се вратиле назад. Вели дека копале во близина на Велес, но не знаел за што се работи и мислел дека бараат злато. По некое време го прашал Манев за што е дупката, по што дознал дека е за киднапирање.
Сведочеше и дека кога се зборувало за грабнувања, никогаш не станало збор за убиства. Не ги познавал убиените, ниту пак, таткото на Вања. Тврди дека во моментот на убиството на Вања чувал стража. Бил оддалечен. Кога се светел, Палчо држел пиштол во раката, по што следел истрел, тапо пукање. Го викнале за да го закопаат телото, а исто како што сведочеше Манев, и Кешишев потврди дека Палчо потоа криел траги бришејќи ги лопатата и копачот. Алатот го фрлиле покрај патот.
Кешишев тврди и дека не видел кој и како го убил Панче, а откако дознал дека е мртов, не пријавил оти бил збунет и Палевски му забранил да ги напушти просториите на партијата.
Судењето продолжува в петок.
Македонија
Давкова благодарна до сите земји кои ни помогнаа по трагедијата, објави листа на државите кои пружија помош

Претседателката Гордана Сиљановска-Давкова, во име на македонските граѓани и во свое лично име, изразува најискрена благодарност до сите пријателски држави што во моментите на национална трагедија и шок, предизвикани од кочанската апокалипса, пружија и сè уште пружаат навремена и несебична помош, водени од принципите на солидарност и хуманост.
„Ангажманот на нивните медицински тимови, подготвеноста на авионите и хеликоптерите за итна интервенција, отворањето на здравствените установи за повредените граѓани, како и активирањето на европскиот механизам за цивилна заштита, испратија недвосмислена и силна порака дека во најтешките моменти не сме сами. Тие ја делеа болката со нас, а нивната грижа стана наш заеднички лек“, вели Давкова.
Во нејзината порака со благодарност се наведува дека ја почувствувавме силата на вистинското пријателство преку нивната присутност и поддршка, којашто ќе остане врежана во колективната меморија на нашиот народ.
Тажно е, додава Давкова, што низ болката и ненадоместливата загуба ја спознавме суштинската поврзаност со светот и длабокото чувство на припадност, нешто што не требаше да биде плод на трагедија. Од срце сме им благодарни, никогаш нема да ја заборавиме помошта од:
Република Србија
Република Бугарија
Република Турција
Хеленската Република
Кралството Шпанија
Република Австрија
Унгарија
Република Хрватска
Кралството Белгија
Италијанската Република
Република Литванија
Република Словенија
Кралството Шведска
Република Полска
Државата Израел
Република Чешка
Обединетото Кралство
Сојузна Република Германија
Големото Војводство Луксембург
Кралството Норвешка
Романија
Република Албанија
Босна и Херцеговина
Кралството Холандија
Република Финска
Француската Република
ЕУ