Градоначалникот на општина Берово, Звонко Пекевски, попладнево преку социјалните мрежи упати порака со која алармира за сериозноста на силниот пожар кој се шири од Пехчево.

„Ситуацијата со пожарот, кој избувна во атарот на општина Пехчево е исклучително сериозна и полека но сигурно се префрла и на територијата на општина Берово, кон најблиските села“, порача Пекевски и упати апел за масовно вклучување на населението во гасење на пожарот.

Сопоред информациите, пожарот доаѓа од високо, од шумските предели над селата, но се шири на голема површина.

На терен се противпожарните единици од Берово и Пехчево како и Шумското стопанство, Центарот за управување со кризи и ДЗС.

Се апелира и до месното население, за масовно вклучување во гаснењето на пожарот, со цел последиците и штетите да бидат помали.

Владата ја разреши директорката на Државниот инспекторат за животна средина, Ана Петровска, по барање на нејзината матична партија ДОМ.

Од Владата велат дека за в.д. директор веднаш е назначен Сретен Стојковски.

Петровска беше директорка десет месеци, а именувана во октомври минатата година. Нејзиното разрешување доаѓа откако таа имаше несогласувања со претседателката на ДОМ, Маја Морачанин, кога побара вонреден конгрес.

Морачанин вели дека барањето за разрешување е бидејќи смета дека има поплаки од граѓаните и негативни реакции од вработени во инспекторатот. Според претседателката на ДОМ, инспекторатот нема решено големи случаи поврзани со загадување и има мал број на казни.

Разрешената Петровска најави свој став откако ќе ја добие одлуката на Владата.

Во рамки на активностите за одбележување на 20-годишнината од Охридскиот Рамковен договор, првиот вицепремиер и министер за политички систем, Артан Груби заедно со директорот на Пошта, Јани Макрадули, промовираа нова поштенска марка.

Директорот Макрадули на настанот изрази задоволство што на 20-годишнината од Охридскиот договор успеале да направат поштенска марка која, како што кажа, е испечатена во 6.000 примероци и чини 72 денара.

Груби изрази благодарност што Пошта станува дел од манифестацијата која вклучува многу активности кои се организираат во рамките на одбележувањето на 20-годишнината од договорот.

„Благодарен сум кон оваа институција и кон сите оние кои стануваат дел од манифестациите за одбележување на Охридскиот договор кои ќе кулминираат на 13 август во Скопје со централната манифестација, со поканети од земјата и од меѓународната заедница како директни учесници во изработката и имплементацијата на договорот“, кажа вицепремиерот на заедничката прес-конференција.