Во пријателска атмосфера и во искрен разговор вечерва во Брисел се одвиваше средбата меѓу премиерот, Зоран Заев и претседателот на Европскиот Совет, Доналд Туск, информираат од владината прес-служба.

Разговорот за време на средбата го одбележало заедничкото очекување дека лидерите на земјите членки на ЕУ на утрешното заседание ќе прават напори да дојдат до консензуално решение поврзано со почетокот на преговорите за Северна Македонија.

„На средбата беа уште еднаш признаени и потврдени сите успеси што Република Северна Македонија ги постигна во изминатите две и пол години и едногласно беше заклучено дека нашата земја и граѓаните ги исполнија сите услови за донесување одлука за почеток на преговори правејќи храбри чекори и сериозни реформи“, стои во владиното соопштение.

На средбата со Туск исто така учествувале и вицепремиерот Бујар Османи и министерот за надворешни работи, Никола Димитров.

По завршувањето на француско-германскиот совет на министри одржан во Тулуз, францускиот претседател Емануел Макрон и германската канцеларка Ангела Меркел одржаа заедничка прес-конфернеција на која главна тема беше брегзит.

На прес-конференцијата германската канцеларка рече дека врз основа на она што го слуша последниве денови, можно е да се очекува постигнување договор.

Францускиот претседател, во мал дел од своето обраќање, се задржа и на ставот на Франција кон проширувањето на Европската Унија, особено коментирајќи ја положбата на Албанија и Северна Македониjа.

Тој рече дека, според негово мислење, прерано е да се започнат преговори со двете земји, иако се согласува дека тие постигнале значаен напредок во домашните реформи, пренесе „Радио слободна Европа“.

„Ја споделувам истата геополитичка и стратешка визија со германската канцеларка. Сакам да испратам позитивен сигнал кон лидерите на двете земји, но сериозното набљудување на нештата ме наведува да им кажам дека овој пат ни треба малку повеќе време за да ја завршиме работата“, додал Макрон.

По однос на ова прашање Меркел рекла дека постојат некои разлики, а како што е познато, потребна е едногласна одлука за започнување преговори.

Премиерот Зоран Заев во рамките на неговата агенда во Брисел вечерва се сретна со претседателот на Европскиот парламент, Давид Мариа Сасоли.

Како што информираат од владината прес-служба, на средбата присуствувале и вицепремиерот за европски прашања, Бујар Османи, и министерот за надворешни работи, Никола Димитров.

За време на разговорот Заев нагласил дека сè уште е оптимист дека одлуката за старт на преговорите сепак ќе биде донесена на самитот на претседатели и шефови на влади на земјите членки на ЕУ во текот на утрешниот ден.

„Поинаков исход освен старт на преговори за Северна Македонија, како признание за остварените реформи и за сериозните политички одлуки на земјата, како исполнување на препораките на ЕУ, ќе биде поттик за регресивните сили во земјата и обесхрабрувачки сигнал за другите земји во регионот во однос на нивните евроинтеграциски процеси“, посочил македонскиот премиер.

Претседателот на Европскиот парламент го потврдил речиси консензуалното одобрување на европратениците за преговори со Северна Македонија и потврдил дека земјата е успешна приказна за Европската Унија.

Сасоли нагласил дека со овие пораки тој и утре ќе се обрати во Европскиот совет и ќе побара да биде исполнето ветувањето за позитивна одлука за старт за преговори на Северна Македонија.