Министерката за труд и социјална политика , Јагода Шахпаска заедно со градоначалникот на Општина Липково, Еркан Арифи, денеска потпишаа Договор за грант со кој се доделуваат финансиски средства за изградба на нова детска градинка во населеното место Матејче.

„Новата градинка ќе биде со капацитет за згрижување на 102 деца, на возраст до 6 години, за чија изградба и опремување Министерството за труд и социјална политика издвои 50 милиони денари“, изјави министерката за труд и социјална политика.

Градоначалникот на Општина Липково, Арифи, информираше дека според официјалните статистички податоци, на територијата на општина Липково живеат околу 2.200 деца на возраст до шест години, како и дека изградбата на оваа нова градинка е вистински потег во правец на решавање на предизвикот.

Досега, со средствата од проектот, кој ресорното министерство го спроведува со поддршка од Светска банка, реконструирани се градинки во Ресен и Боговиње, а во тек е изградбата и реконструкцијата на уште осум градинки во Кавадарци, Неготино, Кочани, Струмица, Пробиштип, Крива Паланка и во скопските општини Кисела Вода и Ѓорче Петров, во кои ќе се згрижат уште 1.349 деца.

Архитектката Јана Гугуловска-Ѓорѓевик смета дека никој не сака да го спречи градењето кај хотелот „Холидеј Ин“, каде што сега има паркинг. Таа при презентација на проектот рече дека беспредметно е да се прави муабет за онлајн петицијата. Досега, преку онлајн платформата се потпишани над 9.000 граѓани, кои велат: „Не за изградба на нехумано голем објект на паркингот пред хотелот ‘Холидеј Ин’“.

„ Што се однесува до петицијата, јас колку што знам таа гласи ‘Не за масовни чудовишта’, а не е за не градење или стопирање на градба. Имајќи во предвид дека таа макета изработена од наши колеги, не соодејствува со деталниот урбанистички план според кој е правен овој проект, мислам дека е беспредметно да правиме муабет за некаква петиција, која што е направена врз база на некакви си модели кои не се согласни со ДУП. Јавноста треба да види дали била изманипулирана или не“, рече архитектаката Јана Гугуловска-Ѓорѓевик.

Инаку, во петицијата стои дека проектот е предвидено да се реализира во три фази. Во првата фаза изградба на станбен објект со 20 ката и височина од 80 метри, на парцелата на МПЦ. Во втората фаза изградба на станбено-деловен објект со 22 ката и височина од 15 и 88 метри. Во третата фаза – изградба на трговски центар од затворен тип со височина од 15 метри и деловна зграда – кула со 16 ката и височина од 76,5 метри.

Преку отворено писмо до премиерот Зоран Заев, и неколку невладини организации и граѓани бараат да го спречи градењето на висококатници на паркингот кај Холидеј Ин. Според нив ова е ултимативна шанса за Скопје која мора да се искористи во име на граѓаните, а не во интерес на инвеститорите.

Државната комисија за спречување на корупцијата (ДКСК), по поднесената оставка од страна на владиниот секретар за мониторинг и поддршка на институциите, Драги Рашковски, информира дека неговото повлекување од функцијата нема да влијае во постапката по предметите кои се поврзани со него.

„Оставката на поранешниот генерален секретар на Владата не влијае на работата по споменатите предмети. Постапувањето ќе продолжи согласно надлежностите и процедурите на ДКСК“, стои во кусото соопштение.

Името на Рашковски во последниот период беше поврзано со низа обвинувања од опозицијата, со неколку случаи кои се под мониторинг на Антикорупсиската комисија, а дел се и предмет на истрага во Јавното обвинителство. Некои од нив се „Леонардо“, „Софтвер за МВР“, „Џип волво“…

Рашковски во оставката чиј текст утрово го објави на социјалните мрежи, наведува дека повлекувањето е поврзано со зачувување на достоинството и интегритетот.

„Вистината нека се провери преку институциите. Нема затскривање позади функции“, напиша тој.