Полицијата вчера казни 173 возачи во Скопје, од кои 48 за брзо возење, соопшти Министерството за внатрешни работи.

„На територијата на град Скопје изречени се вкупно 173 мерки, меѓу кои за возење повеќе од дозволената брзина 48 санкции, 12 за возење без возачка дозвола, три за возење под дејство на алкохол, десет за технички неисправни и нерегистрирани возила“, велат од МВР.

Изречени се 12 мерки за користење мобилен телефон, шест за некористење сигурносен појас, 5 прекршоци што ги чинат возачите на мотоцикли, седум за непрописно престигнување и обиколување, 54 за непрописно паркирање.

Од МВР најавија дека засилените акциски сообраќајни контроли продолжуваат и апелираат до граѓаните да ги почитуваат сообраќајните правила и прописи.

Времето денеска ќе биде сончево и натпросечно топло со мала до умерена облачност. Ќе дува слаб до умерен, а во западните делови засилен ветер од западен правец (на места со брзина над 70 км/час).

Во текот на ноќта во северозападните делови ќе има услови за локален пороен дожд. Минималната температура ќе биде во интервал од 8 до 16, а максималната ќе достигне од 29 до 37 степени.

Во Скопје сончево со мала до умерена облачност и со слаб до умерен југозападен ветер. Минималната температура ќе се спушти до 14, а максималната ќе достигне 34 степени.

Утре ќе има локален развој на нестабилна облачност проследена со пороен дожд, грмежи и засилен ветер, а температурата, особено во северните делови, ќе се намали за неколку степени. Услови за краткотраен пороен дожд ќе има и в недела претпладне. Потоа продолжува стабилно време со нешто пониски дневни температури.

Министерот за надворешни работи, Бујар Османи, и министерката за надворешни работи и дијаспора на Косово, Доника Гeрвала-Шварц, денеска потпишаа Договор за соработка во областа на дијаспората.

Договорот се потпиша во рамки на заедничкатa седница на Владите на Македонија и Косово во Скопје. Со овој договор се овозможува размена на искуства и активности, имајќи го предвид значајниот број граѓани од двете држави кои живеат во странство.

Денеска се потпишаа 11 договори и меморандуми за соработка, со кои постојниот број од 42 потпишани документи се зголеми на 53.