Зелената партија ДОМ го поздравува предлогот на Градот Скопје за претворање на центарот во пешачка зона, што велат дека е и нивна долгогодишна програмска заложба. Тоа е пракса на многу европски градови, а најдобар пример е Виена, која од најпрометната трговска улица Марија-Хилфер Штрасе направи пешачка зона, со многу нови содржини и зеленило, за слободно движење и дружење на граѓаните.

„Сметаме дека овој предлог има сериозен недостаток: предвидува проширување на улицата „Даме Груев“ и претворање во прометен булевар, со уништување на дрворедот и тротоарот. Целата таа обиколница е и резиденцијален дел и со ова би се нанесла голема штета на квалитетот на живот на граѓаните. Укажуваме, дека ширењето на улици во старо градско јадро заради поголем и побрз сообраќај е застарен плански концепт.  Светот, а Европа посебно, силно го промовира и применува современиот концепт на одржлива урбана мобилност и паметен град. Суштината е да се обезбеди мултифункционалност на градот, кој постои заради граѓаните, а не заради возилата! Се препорачува намалување на бројот на возила преку користење јавен транспорт, велосипеди и пешачење. Се вложува во електромобилност, велосипедски патеки, тротоари, пешачки зони, зеленило. Ефектот е поефикасен транспорт, помалку гужва во сообраќајот, помалку емисии на штетни издувни гасови, поголема безбедност во сообраќајот и поголема социјална интеграција. Накусо, поквалитетен живот на граѓаните“, велат од ДОМ.

Градската власт предводена од СДСМ и градоначалникот Петре Шилегов продолжуваат со засилено темпо на реконструкција на клучните сообраќајници во општина Ѓорче Петров, изјави Александар Ѓорѓевски, советник од СДСМ во совет на општината Ѓорче Петров.

Тој рече дека целосно е реконструиран коловозот и поставена е нова хоризонтална сообраќајна сигнализација.

„Реконструкцијата на оваа улица продолжува се до бензинската пумпа Макпетрол, односно до излезот на Скопје, во вкупна должина од 1.500 метри. Со ова западниот влез во Скопје ќе биде целосно реконструиран. Истовремено, забрзано се работи на реконструкција на улицата Борис Сарафов во вкупна должина од 1.700 метри“, додаде Ѓорѓевски.

Основното јавно обвинителство за гонење на организиран криминал и корупција најостро го осудува објавувањето на нелегално добиени документи од истрагата за предметот „Рекет“ и најави дека ќе утврдува како тие протекле во јавноста.

Претдходно денеска, дел од медиумите објавија изјава за кој тврдат дека ја дал бизнисменот Орце Камчев покренувајќи кривична пријава за случајот „Рекет“, а се однесува на тоа кој сѐ бил замешан во рекетирањето. Од Обвинителството по тој повод велат дека освен како моментална сензација, ваквите објави не придонесуваат во остварување на каква и да е друга цел.

„Од започнување на истражната постапка, водејќи се од големиот интерес на јавноста, обвинителството секојдневно настојува во рамките на можностите да сподели детали што нема да наштетат на истрагата, а на јавноста ќе и овозможат да има реална слика за текот на постапката. Во таа насока, имајќи ја предвид сензитивноста на предметот, во неколку наврати укажуваме дека само официјално добиените информации од обвинителството се веродостојни“, велат од Обвинителството.

Тие не ги коментираат информациите изнесени во јавноста, но потенцираат дека откривањето на доверливи информации од страна на поединци претставува опасност и штета за севкупниот општествен систем и е кривично дело.

Со протекување на ваков вид документи, додаваат од Обвинителството, се повредува пресумпцијата на невиност, се загрозуваат животи на инволвираните лица и воопшто сe отежнува текот на постапката.

„Во интерес на понатамошното непречено спроведување на истражната постапка, Основното јавно обвинителство за гонење на организиран криминал и корупција ќе преземе дејствија за утврдување на фактите како овие документи се протечени во јавноста и ќе бара одговорност од сторителите“, додаваат од ОЈО.

Основното јавно обвинителство за гонење на организиран криминал и корупција и укажува на јавноста дека ваквите неодговорни извори на информации и медиуми со ограничена цел, нема да влијаат врз решеноста на обвинителството овој случај да добие комплетна завршница.