На 17 и 18 мај во Охрид се одржа четвртиот состанок на Заедничкиот интердисциплинарен комитет за историски, археолошки и образовни прашања, формиран согласно Преспанскиот договор, информираат од Министерството за надворешни работи.

Во соопштението се наведува дека делегациите од македонска и грчка страна во конструктивна и колегијална атмосфера извршиле детална и сеопфатна ревизија на наставните планови по историја, учебниците и учебните помагала по историја кои се во употреба во двете земји.

„Гореспоменатиот материјал треба во најкус можен рок да биде ослободен од какви и да било иредентистички и ревизионистички референци“, истакнуваат од надлежното министерство.

„Врз основа на Преспанскиот договор и во согласност со целите и принципите на УНЕСКО и на Советот на Европа, беше усвоена методологија, опишана во заклучоците, за ревизија на наставните планови и учебниците. Двете делегации се согласија да го поттикнуваат вклучувањето на повеќе содржини од областа на културата и уметноста во образованието со цел градење на позитивна слика за другиот“, стои во соопштението.

На состанокот воедно се постигнала согласност за временската рамка за примена на наодите на Заедничкиот интердисциплинарен комитет за историски, археолошки и образовни прашања и доставување на релевантните препораки до Советот за висока соработка.

Поразената ВМРО-ДПМНЕ си вергла по старо, едни исти невистини, лажна загриженост, ништо ново, далеку од јавниот интерес и интересите на граѓаните, реагира СДСМ по прес-конференцијата на Игор Николов од ВМРО ДПМНЕ.

„Епидемијата од морбили е резултат на падот на колективниот имунитет, поради криминалните, катастрофални политики токму на ВМРО-ДПМНЕ во изминатите 10 години, уништувањето на здравствениот систем и целосната негрижа за здравјето на граѓаните. Дури и прогласувањето на епидемијата ВМРО-ДПМНЕ го критикуваше, а ако не се случеше ситуацијата сега ќе беше алармантна. Министерството за здравство ги презема сите потребни мерки и чекори за заштите на здравјето на граѓаните. Меѓу другото се спроведува и акцијата за вакцинирање и ревакцинирање, со што веќе над 24 илјади вакцинирани дечиња од почетокот на епидемијата“, велат од СДСМ.

Владејачката партија тврди дека нема простор за паника, а граѓаните треба да ги следат препораките на Министерството и да не подлегнуваат на невистините што ги шири ВМРО-ДПМНЕ.

Што се однесува до јавните набавки во Министерството за здравство, од СДСМ велат дека јавното обвинителство за гонење организиран криминал јавно потврдило дека се кристално чисти и законски.

Љубителите на цвеќето денеска и утре ќе имаат можност да купат цвеќиња и цветни аранжмани, да добијат корисни совети, да се забавуваат и да се дружат на отворено во рамките на шестиот Скопски цветен фестивал што се одржува во вториот дел на Градскиот парк.

Фестивалот почна со цветно дефиле со деца од предучилишните установи и од основните училишта што тргна од паркингот пред бараките на Град Скопје и се движеше по патеките во паркот.

„Чест ми е и задоволство да Ве поздравам на овој шести по ред Фестивал на цвеќето кои се одржува под мотото „Скопје цвета“. Имаме ретка можност да присуствуваме на експонатите и изложувањата на повеќе од 30 цвеќари и фирми кои што се бават со хортикултура и цвеќе. Наша крајна цел е можеме преку зеленилото да внесеме естетика и во изгледот на Градот, меѓутоа и во изгледот на Вашите домови. Новина ни е годинава што за првпат ќе можете да добиете корисни совети за своите домашни миленичиња, како и да вдомат милениче“, рече градоначалникот Шилегов, на отворањето на фестивалот.

Шилегов додаде дека зазеленувањето останува на врвот на приоритетите на Град Скопје и дека влогот во здрава животна средина е трајна придобивка која најдиректно влијае врз здравјето на сите сегашни и идни генерации. На дечињата кои учествуваа во цветното дефиле им порача дека уште сега треба да градат здрави животни навики, бидејќи сите заедно треба да се грижиме за животната средина и дека од сите нас зависи колку овој град ќе биде убав и чист.

Во текот на двата фестивалски дена пред граѓаните ќе се промовира одгледувањето цвеќе, а најмладите ќе имаат можност да се вклучат во работилници, да ја покажат својата креативност и да научат нешто повеќе за цвеќињата и за заштитата на животната средина.

Посетителите ќе уживаат во настапите на повеќе музички и танцови изведувачи, ќе имаат можност да вежбаат јога и зумба на отворено и да учествуваат во најразновидни цветни перформанси и декорации.
Фестивалот на цвеќето се одржува под покровителство на Град Скопје, а во организација на ЈП „Паркови и зеленило“.