Градоначалникот на општина Гевгелија, Андон Сарамандов, одржа отчет за реализираните проекти и постигнатите резултати во изминатите три години. Настанот се одржа во салата на Народниот театар во Гевгелија, каде што Сарамандов се заблагодари на поддршката која ја добива од граѓаните на општина Гевгелија.

„Нема поубаво чувство од тоа да застанам пред моите сограѓани и да го споделам транспарентно она што сработивме овие три години, проектите кои се реализираа, предизвиците и проблемите со кои се соочивме. Благодарност до сите граѓани на општина Гевгелија кои ми давате неизмерна поддршка овие три години“, изјави Сарамандов.

Сарамандов истакна дека со напорна работа и успешна соработка со јавните институции, Советот на општината и администрацијата, Гевгелија остварила значителни резултати во секој сегмент на општинскиот живот.

„Благодарение на успешната соработка со јавните инститиции, Советот на општина Гевгелија и општинската администрација, беа остварени високи резултати со значителен придонес во секој сегмент во нашата Гевгелија“, истакна Сарамандов.

Сарамандов додаде дека реализирани се бројни проекти во повеќе области. Меѓу најзначајни проекти се изградбата на обиколницата ,,Западен булевар“, модерен урбан парк на површина од 6000м2, доградба на детска градинка ,,Сончогледи“ за 130 деца, и реконструкција на спортска сала ,,ДТВ Партизан“.

,,Реализирани голем број на проекти од подземна и патна инфраструктура, проекти за зачувувување на животната средина, проекти во образовните институции, проекти во делот на социјалната заштита, проекти за подобрување на спортската инфраструктура, детски игралишта, изработена е и туристичка платформа, а целосно реконструирани се и 3 младински домови“, додаде Сарамандов.

Други капитални проекти вклучуваат изградба на атмосферска канализација во должина од 7000 метри, нови водоснабдителни системи за селата Негорци, Богородица и Прдејци, изградба на нов пазар во Мировци, и реконструкција на младински домови во Моин, Богородица и Негорци.

Сарамандов најави дека ќе продолжи со посветена работа за унапредување на животот на граѓаните и понатамошно подобрување на инфраструктурата и услугите во општина Гевгелија.

„Се обврзувам дека ќе продолжиме да работиме посветено и одговорно, Гевгелија мора да се развива во урбана и модерна општина по примерот на европските општини“, заклучи Сарамандов.

Сериозно загрижувачки се статистиките за смртноста на деца во изминатите шест месеци, кажа денеска на прес конференција Рената Младеновска, членка на ИО на СДСМ.

„Во втората половина на 2024 година, починале 19 доенчиња и едно петгодишно девојче. Овие трагични бројки отвораат многу прашања за кои јавноста заслужува одговори“, вели таа.

Младеновска праша зошто и како се направени пропустите, каде затајува системот, дали се штитат лекарски грешки?

„Особено алармантен е последниот случај со смртта на седуммесечно бебе на Клиниката за детски болести, кое било одбиено за хоспитализација, без да се издаде никакво образложение за причините. Ова е втор ваков случај за само два и пол месеци на Клиниката за детски болести, по трагичната смрт на 14-месечно бебе, кое исто така беше одбиено за болничко лекување. Понатаму, бебе старо само 8 дена донесено од Струмица во многу лоша здравствена состојба, почина од сепса и уште други трагични случаи“, вели Младеновска.

Според неа, овие бројки и случаи во здравствениот систем, особено случувањата на Клиниката за детски болести, не смеат да се игнорираат.

„СДСМ инсистира на темелна истрага, целосна транспарентност и превземање на сериозна одговорност. Потребни се подлабоки анализи и превентивни мерки. Не можеме да чекаме да умираат деца за потоа да реагираме! Ги повикуваме Министерството за здравство и сите надлежни институции итно да преземат мерки за превенција на ваквите трагедии. Здравјето и животот на најмалите мора да биде врвен приоритет во секој здравствен систем“, истакна Младеновска.

Таа нагласи дека СДСМ успеала значително да ја намали смртноста кај новороденчињата.

„Во 2016 година, смртноста изнесуваше 25%, а во 2023 година се намали на 5%. Неонаталната смртност СДСМ ја намали за 5 пати, во 2015 година изнесувала 6.8% а во 2022 година е намалена на само 1,4%о. Во 2015 година во времето на ДПМНЕ перинаталната смртност изнесувала 12.8%о а во 2022 година е намалена на 6.9%. СДСМ вложуваше во модерна опрема, инкубатори, респираторни машини, во стручен кадар и друго. Сега е крајно загрижувачки да гледаме како повторно расте ризикот за новороденчињата и децата. Ја повикуваме власта да не дозволи враќање на старите практики и бројки. Граѓаните заслужуваат здравствен систем кој функционира превентивно, одговорно и во интерес на здравјето на граѓаните и нивните деца. Здравјето на мајките и новороденчињата мора да биде императив!“, заклучи Младеновска на прес-конференцијата.

Институт за јавно здравје издаде препораки во насока за тоа кои чекори треба да се преземат одкако водата ќе биде пуштена.

„Имајќи предвид дека е најавен прекин на водоснабдувањето, населението треба да биде запознаено и информирано дека ризиците по здравјето на населението може да се јават не само за време на недостатокот на вода туку, дури и да се зголемат после пуштањето на водата за пиење во водоводната мрежа односно по отстранување на дефектот“, велат од ИЈЗ.

Оттаму, како превентивни јавно-здравствени мерки и мерки на внимателност препорачуваат:

– Граѓаните да не ја пијат веднаш водата по нејзиното пуштање во водоводната мрежа зашто контактното време на резидуалниот хлор и водата во мрежата (време потребно резидуалниот хлор да почне да делува врз микробиомот присутен во водата), во услови на пониски амбиентни температури може да потрае и до 1 час;

– Може да се очекува водата за пиење по пуштањето во водоводната мрежа да ја промени бојата, добие невообичаен мирис, да има видлива заматеност или евентуално страни тела (ситни зрнца песок или инсект и сл.). Во таков случај, повторно се препорачува истата да не се пие сè до момент на стабилизација на тие органолептички својства (боја, мирис, вкус, заматеност);

– Непосредно после доаѓањето на водата во водоводните цевки во домовите, потребно е да се испуштат СИТЕ чешми во домот да истечат неколку минути, па да се провери дали органолептичките својства се во ред, па дури потоа да се пие;

– По добро истекување на водата, потребно е почесто и добро да се исчистат мрежичките на чешмите (во средство за чистење бања или бел оцет);

– Како дополнителна мерка на внимателност се препорачува, доколку граѓаните сепак одлучат веднаш да ја пијат водата, истата да се преврие многу кратко (1 -2 минути), потоа да се разлади и консумира;

– Граѓаните треба да имаат предвид дека превриената вода го губи благопријатниот вкус. Истиот може да се подобри доколку водата се претура од една во друга чаша неколку пати, со цел да врзе повеќе кислород од воздухот (процес наречен аерација);

– Најдобро е во текот на првите часови после пуштањето на водата во водоводната мрежа, граѓаните сè уште да консумираат пакувана вода, сè до добивањето на известување од јавното претпријатие дека водата е исправна и безбедна за консумација;

– Во однос на водата за капење, препорачуваме после доаѓањето на водата во водоводната мрежа, задолжително да се зголеми температурата на водата во бојлерите (во кујна, бања и сл.), со цел дополнително превентивно термичко уништување на бактериите доколку потенцијално навлегле во водоводната мрежата;

– Најдобро е температурата на топлата вода во чешмите да биде над 55 степени, сепак потребна е мерка на внимателност да не дојде до изгореници особено кај мали деца или повозрасни лица.

Најважно од сè, велат од ИЗЈ, е да се почитуваат препораките објавени од Институтот за јавно здравје и другите релевантни институции вклучени во процесот, објавени на нивните веб страни или преку другите средства и платформи за информирање.