Македонија
Општина Гостивар ќе обезбеди уште 40 проекти од Владата, Лимани го пречека Меџити на средба

Денеска градоначалникот на Општина Гостивар, Валбон Лимани, го пречека на средба првиот заменик-претседател на Владата на Северна Македонија, Изет Меџити.
На средбата се дискутираше за проектите кои се распределени за Општина Гостивар од страна на Владата, како и за проектите што ги обезбедува Министерството за животна средина и просторно планирање, како што е доделувањето средства за Општина Гостивар за изградба на фекална и атмосферска канализација за Урбаниот блок 21 во износ од 87 милиони денари, како и обезбедувањето средства од Европската инвестициска банка за реализација на проектот за резервоар во селото Чегране во вредност од 30 милиони денари и новата линија на водоводот од Форинo до Чегране во износ од 28 милиони денари, како и изградбата на канализацијата во ова село.
Исто така, со поддршка од Европската банка за обнова и развој, се обезбедуваат средства за Гостивар да го спроведе селектирањето на отпадот од домаќинствата, што вклучува канти, контејнери и камиони за транспорт на отпадот.
Од Програмата за користење средства за капитални дотации за единиците на локалната самоуправа за инфраструктурни проекти за 2024 година од Владата, Гостивар добива средства во износ од над 161 милион денари за подобрување на патната инфраструктура.
Дополнително, во рамките на вториот владин повик за оваа година, се очекува Општина Гостивар да добие уште 40 инфраструктурни проекти, покрај 13-те проекти кои веќе се одобрени и ќе започнат со реализација во наредниот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утрово најстудено на Попова Шапка

Утрово најстудено било на Попова Шапка каде што се измерени -12 степени, -9 било во Маврови Анови, -8 во Крушево, -6 во Берово, -5 во Крива Паланка, -4 во Прилеп, -3 во Штип и Виница, -2 во Тетово, Охрид, Претор и Битола, -1 во Скопје-Петровец, во Скопје-Зајчев Рид, 0 во Велес, Кавадарци и Струмица, 1 во Демир Капија, 2 во Гевгелија.
Висината на снежната покривка во 7 часот утрово изнесувала 32 сантиметри на Попова Шапка и 7 во Маврови Анови.
Времето денеска
Наутро променливо облачно, а преку денот времето ќе биде сончево со мала до умерена облачност поголема во западниот дел. Ќе дува умерен до засилен северен ветер, наместа долж Повардарието со брзина над 60 km/h. Максималната температура ќе биде во интервал од 0 до 8 степени.
Во Скопје наутро претежно облачно, во текот на денот облачноста ќе се намалува. Ќе дува умерен, во делови од котлината и особено на повисоко повремено засилен северен ветер. Максималната температура ќе достигне до 6 степени.
Македонија
Заменик-министерот за транспорт на 4-та глобална министерска конференција за безбедност на патиштата во Мароко

Заменик-министерот за транспорт, Калтрина Зеколи Шаќири, учествува на 4-та глобална министерска конференција за безбедност на патиштата, која се одржува во Мароко, каде ја претставува Република Северна Македонија. Оваа настан има посебно значење за оценување на напредокот во спроведувањето на Глобалниот план за 2021-2030 и за зајакнување на ангажманот за безбеден и одржлив мобилитет.
Во рамките на конференцијата, потпишан е договор за имплементација на овој план, потврдувајќи ја посветеноста за подобрување на безбедноста на патиштата и намалување на несреќите на патиштата на Северна Македонија.
Конференцијата продолжува и во следните денови, каде Заменик-министерот Зеколи Шаќири има можност да се сретне со министри од целиот свет за да дискутираат за предизвиците и решенијата за побезбеден патен систем. Таа е посветена на искористување на најдобрите практики и искуства за да ги спроведе во подобрувањето на безбедноста на патиштата во земјата, соопшти Министерството за транспорт.
Македонија
Утрото променливо облачно и студено, преку денот сончево

Времето денеска, утрото променливо облачно и студено, а преку денот времето ќе биде сончево со мала до умерена облачност. Ќе дува умерен до засилен северен ветер, наместа долж Повардарието со брзина над 60 km/h. Минималната температура ќе биде во интервал од -8 до 0, а максималната ќе достигне од 0 до 8 степени.
Во Скопје утрото претежно облачно, во текот на денот облачноста ќе се намалува. Ќе дува умерен, во делови од котлината повремено засилен ветер од северен правец. Минималната температура ќе се спушти до -3, а максималната ќе достигне до 6 степени.
Во наредните денови, следува период на стабилно и студено време со ниски утрински температури кои насекаде ќе бидат негативни, а наместа ќе се спуштат и под -10 степени.