Македонија
Општина Куманово во преговори за нови 2.000 вработувања во „Дрекслер Маер“

Градоначалникот на општина Куманово Максим Димитриевски и германската амбасадорка Анке Гизеле Холштајн денеска по работната средба го посетија производниот капацитет на компанијата од автомобилска индустрија „Дрекслер Маер груп“ во индустриската зона Новини и Речица.
Во изјава за медиуми, Димитриевски информираше дека како општина се во преговори со менаџментот на оваа компанија за отворање на дополнителен капацитет во којшто би имале можност во следниот период од две години да се вработат повеќе од 2000 сограѓани.
„Приоритет за општина Куманово, но и мене како градоначалник е да се развива локалната економија и да се дадат еднакви можности за инвестиција како на странските, така и на натамошните инвеститори. Со амбасадорката разговаравме на повеќе отворени теми. Напрвин, соработката на општина Куманово со амбасадата е на исклучително високо ниво. Ја користам оваа пригода да се заблагодарам и на амбасадорката, но и на претставници на амбасадата и секако на граѓаните на Германија за последната донација којашто ја добивме во време на корона-кризата на
нашата градска болница. Денеска потврдивме дека таа соработка ќе продолжи. Општина Куманово е секогаш отворена за соработка со сите амбасади, но особено ни е драго што со германската амбасада имаме едно високо ниво на разбирање и соработка. Разговаравме на поголем број теми и за нас приоритет е локалниот економски развој и развојот на
економијата во градот и нашата индустриска зона Новини и Речица“, рече Димитриевски.
Германската амбасадорка Холштајн му честиташе за новиот мандат на Димитриевски и му посака успех за наредните четири години во менаџирањето на општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Реновирани два оддела на Клиниката за токсикологија

Министерот за здравство,Фатмир Меџити, заедно со заменик министерката, Маја Манолева, денеска ја посетија Универзитетската клиника за токсикологија, каде се комплетно реновирани одделите за токсикологија и детоксикација.
Инвестицијата е во вредност од 9,5 милиони денари.
Станува збор за комплетно реновирање на болничките соби, опремување со нови кревети и мебел, 24-часовен централен надзор и мониторинг на сите витални параметри на сите хоспитализирани пациенти, како и комплетно реновирање на сите тоалети на овој кат.
Од Министерството за здравство велат дека оваа инвестиција значи унапредување на условите за третман и успешно лекување на пациентите.
Во претстојниот период е предвидено да се реновира и приземниот амбулантски простор, со што ќе се заокружи реновирањето на комплетниот амбулантско-стационарен дел на клиниката, а предвидена е и нова токсиколошка лабораторија, што ќе значи третман на акутните интоксикации по најсовремените светски протоколи.
Македонија
Петровска во Брисел: Одвојуваме повеќе од 30 отсто од буџетот на Министерството за модернизација на Армијата

Средба Петровска – Џоана: Северна Македонија и сојузниците во НАТО се обединети и јасни во целта – безбедност на територијата на НАТО и осуда на руската агресија врз Украина.
Министерката за одбрана Славјанка Петровска денеска во седиштето на НАТО во Брисел се сретна со Мирчеа Џоана заменик генералниот секретар на Алијансата.
На средбата Петровска и Џоана заклучија дека земјите – членки се обединети и посветени на безбедноста на Алијансата како никогаш досега и дека тоа е јасно видливо преку чекорите кои ги презема НАТО во зацврстување на процесите за трансформација.
Во контекст на трансформација на македонската одбрана, министерката Петровска подвлече дека Северна Македонија од самиот почеток јасно и недвосмислено се насочи кон исполнување на доделените Цели за способности преку соодветно одделување на финансиските средства. Напомена дека оваа година Министерството за одбрана одвојува повеќе од 30 отсто за модернизација што ја искажува и политичката волја за исполнување на нашите обврски.
Заменикот генерален секретар на НАТО, Џоана порача дека ставот на Северна Македонија е ист како и ставот на сите сојузници и изрази благодарност за улогата на земјата во зацврстувањето на колективната безбедност на НАТО.
Во седиштето на НАТО, министерката се сретна и со претседавачот на Воениот комитет на Алијансата, адмиралот Роберт Бауер со кого разговараше за придонесот на земјава во мултинационалните сили во рамките на Зајакнатото истурено присуство во источното крило на НАТО. Дополнително се запозна и со процесите на воената трансформација на Северноатлантската алијанса.
Македонија
Отчукува часовникот до застарување на делото на Мијлаков – остануваат 16 дена до слобода

Преостануваат 16 дена во кои Апелација треба да донесе одлука за предметот „Титаник 2“, а за на обвинетиот Сашо Мијалков да не му застари делото. Предметот што Кривичниот суд предвреме го прати до Апелација, па беше вратен назад и повторно пратен – сега е во Вишото јавно обвинителство. Таму обвинител треба да даде мислење во однос на жалбите.
„Предметот денеска ни стигна од Апелација. Го дадеме на обвинител да го проучи предметот. Мислам дека утре или задутре ќе има одлука од страна на Обвинителството“, вели Мустафа Хајрулахи за „Макфакс“.
Ако предметот биде вратен задутре со мислење, ќе останат уште 14 дена за закажување јавна седница. По нејзиното одржување, ќе може да се донесе и одлука.
За овој предмет двапати се изрекува пресуда. Првата беше укината од Апелација во декември 2019 година. Од тогаш до јануари 2023 година предметот се судеше во Кривичниот суд. Судиите Огнен Ставрев и Осман Шабани одново ги прогласија обвинетите за виновни. На повтореното судење ексдиректорот на УБК, Сашо Мијалков, е осуден на казна затвор од две години. Лидерот на ДПА, Мендух Тачи, исто така доби казна затвор од две години.