Македонија
Османи-Бердимухамедов: Центарот на ОБСЕ во Ашгабат нуди експертиза и ресурси за понатамошно унапредување на реформите во Туркменистан

Соработката ОБСЕ-Туркменистан, меѓународната и регионална соработка на земјата, климатските промени и заштитата на животната средина беа темите во фокус на разговорот помеѓу Претседавачот со ОБСЕ и министер за надворешни работи, Бујар Османи и претседателот на Туркменистан, Сердар Бердимухамедов.
Средбата Османи-Бердимухамедов се одржа во Ашгабат во рамки на посетата на Централна Азија, еден од клучните региони за ОБСЕ во програмата на Претседавањето на Северна Македонија со Организацијата.
„Центарот на ОБСЕ во Ашгабат ужива одлична соработка со владините институциите и државните агенции, како и со граѓанското општество. Експертизата и ресурсите што ги поседува можат да придонесат за понатамошно унапредување на домашните реформи, особено во областите на добро владеење, заштита на животната средина, економско зајакнување на жените, борба против семејното насилство и родова еднаквост“, истакна Османи на средбата.
Османи и Бердимухамедов разговарале и за меѓународните односи на земјата, како и за резолуцијата на Обединетите Нации иницирана од Туркменистан минатата година, со која Централна Азија се прогласи за зона на мир, доверба и соработка.
Еден од предизвиците што го засега поширокиот регион на ОБСЕ се и климатските промени и справувањето со нив, што е високо на агендата на Претседавањето на Северна Македонија. Во таа насока, истакна Османи, поставен е и Специјален претставник за климатски промени што претставува нов пристап, за прв пат во историјата на ОБСЕ, обезбедувајќи политичка поддршка на заложбите на ОБСЕ.
„Ова е особено важно имајќи предвид дека климатските промени влијаат и на севкупната безбедност во регионот на ОБСЕ, а тоа влијание може да биде ублажено преку заеднички регионален одговор“, рече Османи на средбата.
Османи го поздрави активниот придонес на Туркменистан за ублажување на последиците од климатските промени преку усогласување на работата на клучните пристаништа во земјата со најдобрите еколошки практики за што пристаништето во Туркменбаши доби и сертификат за еко-пристаниште.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.