Македонија
Османи – Брегу: Регионалната соработка е клучна за успех

Министерот за надворешни работи на Република Северна Македонија, Бујар Османи, оствари средба со генералната секретарка на Регионалниот совет за соработка, Мајлинда Брегу, како дел од нејзината работна посета на земјата.
Османи ја запозна генералната секретарка со приоритетите на надворешната политика на земјата, потенцирајќи ги стабилното и долгорочно пријателство, како ново поглавје во односите со сите соседи; активниот придонес кон мултилатерализмот и регионалните иницијативи за дебалканизација на регионот, како и европските перспективи на земјава како три клучни приоритети, кои претставуваат заеднички интерес на Република Северна Македонија и Советот за регионална соработка.
„Покрај многуте проекти и иницијативи, ги претставив нашите амбиции за отворање до шест нови гранични премини со соседите, како инструмент за поголема и олеснета комуникација во регионот; ја потенцирав нашата иницијатива за отворање на Регионален центар за дијалог – Преспа форум – платформа за промоција на добрососедство и решавање на билатералните прашања, но и форум од каде очекувам да произлезат и нови, автентични иницијативи за регионална соработка.“, посочи Османи.
Посебен акцент на средбата беше ставен на предизвиците и потенцијалите од претстојниот Софиски самит во рамки на заедничкото претседателство на Република Северна Македонија и Република Бугарија со Берлинскиот процес.
„Токму активностите, резултатите и успехот на иницијативите од Берлинскиот процес се во насока на зајакната регионална кохезија и изградба на мостови за соработка за кои веќе неколкупати зборував претходно. Ова не се само декларативни заложби, туку конкретни активности од кои треба да имаат корист граѓаните на целиот регион“, истакна Османи, посочувајќи на повеќегодишната рамка за регионална и економска соработка МАП – РЕА – 2, која предвидува: унапредување на дигиталната инфраструктура и поврзување на земјите од регионот; слободен проток на трговијата и капиталот; поддржување на иновациите и претприемништвото, како и вложување во активностите за задржување и привлекување на талентите во земјите од регионот.
Од страна на ГС Брегу беше изразена убеденост и подготвеност дека и Советот за регионална соработка ќе ги стави сите капацитети во функција на успешност на Софискиот самит согласувајќи се дека тоа ќе претставува и успех на целиот регион, па и понатаму, успех на европската идеја на Балканот.
Соговорниците се согласија дека преку заедничката инвестиција во овие процеси ќе значи зајакнато поврзување, соработка, економски напредок, и со тоа, исклучително позитивно ќе влијаат на зголемување на довербата и меѓу државите и меѓу граѓаните од регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица: Штрајкот во пералната на Клинички центар е аларм за распад на јавното здравство

Штрајкот на вработените во пералната на Клиничкиот центар „Мајка Тереза“ е аларм за целосен распад на јавното здравство, предупредуваат од партијата Левица. Според нив, болниците се во хаос, операциите доцнат, недостасува чиста облека, а пациентите се изложени на ризик од зарази, додека министерот за здравство Азир Алиу останува пасивен и без конкретни одговори.
„Клучното прашање е кој управува со пералната – приватната фирма ‘Скопстер’, позната по енормно високите цени и протуркана од поранешниот министер Арбен Таравари, или пак Службата за општи и заеднички работи? Додека институциите си ја префрлаат одговорноста, вработените остануваат без плати, без здравствено осигурување и со неизвесна иднина,“ велат од Левица.
Тие додаваат дека постои сомнеж за финансиско „перење раце“ меѓу институциите, кои си фактурираат високи суми за услуги, додека интересите на пациентите и вработените се оставаат на страна.
Од Левица потсетуваат и дека, во исто време кога здравството е во хаос, Владата предводена од Христијан Мицкоски најавува ново задолжување од една милијарда евра. „Резултатите во здравството се поразителни – нема нови инвестиции, нема капитални проекти и нема реформи,“ посочуваат од партијата.
Како решение, тие предлагаат инвестирање во современа перална и стерилизација по примерот на Клиниката за гинекологија и акушерство, што, според нив, би значело намалување на трошоците, помалку инфекции и побрз третман на пациентите.
„Очигледно е дека партиите на олигархијата свесно го рушат јавното здравство за да создадат простор за профит во приватниот сектор, каде цените се енормни. На крајот, најголемата штета ја плаќаат граѓаните, кои цел живот издвојувале средства за здравствениот фонд, а сега се приморани да плаќаат скапи услуги во приватни болници,“ велат од Левица.
Македонија
Помалку од еден час се чека на граничните премини Богородица и Табановце

Поради летните одмори, се бележи зголемена фреквенција на возила на граничните премини. На ГП „Табановце“ утрово времето на чекање за излез од државава е околу 30 минути, додека на ГП „Богородица“ се чека околу 40 минути, соопшти Авто мото сојузот на Македонија.
На останатите гранични премини од македонска страна, нема подолги задржувања за влез или излез од државата.
Од АМСМ информираат дека поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Интензитетот на сообраќајот на патиштата надвор од градските средини е зголемен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
(Видео) Кога во пожар не може пинцгауер, гранка му е мајката: Ангелов со малку шега го покажа херојство на четата на Цветко од Рогачево

Со лопати, стапови, гранки во рацете и светилки на главите седуммина доброволци од Рогачево заедно со екипите на Дирекцијата за заштита и спасување, пожарникари, полициски хеликоптери… храбро и по полноќ се бореа со големиот пожар кој го зафати селото Јажинце, општина Јегуновце, а кој вчера повторно се реактивира.
„Благодарение на четата на Цветко од Рогачево со овие храбри луѓе успеавме да изгасиме една цела линија во текот на ноќта, а некаде е околу 1 и 30 по полноќ. Го гасевме пожарот кој ќе се симнеше сигурно до патот и ќе направеше големи неприлики. Ви благодарам од мое име и од името на Дирекцијата за заштита и спасување.“, вели во видеото директорот на Дирекцијата за заштита и спасување, Стојанче Ангелов за пожарот кај Јажинце.
Ова видео кое утрово го објави ДЗС ја покажува храброста на оние кои на терен се борат со големите огнови, но и хуморот кој постојано е присутен кај Ангелов, а со кој, тој на свој начин умешно успева да ја доближи реалноста до јавноста.
Директорот на ДЗС додека го снима видеото во ноќните часови, заедно со уште неколкумина од екипата, во раце држат гранки. Во негов хумористичен стил, по храброто гасење на пожарот Ангелов со насмевка ги прашува волонтерите: „А со што гасевме“? На ова сите со насмевка му одговараат: „Со гранки“. Ангелов на крајот додава дека на местото каде што се наоѓаат ни пинц не се качува (мислејќи на пинцгауерите, доносно пожарникарските возила), туку се качуваат само диви кози и четата на Цветко од Рогачево.
Доцна синоќа пожарот во атарот на селото Јажинце, општина Јегуновце, повторно се реактивира. Набргу потоа поради лесно горливата висока трева, грмушки и смреки пропратени со подзасилен ветер, огнената линија стана подолга од еден километар движејќи се во насока на магистралниот пат Тетово – Јажинце.
„На патот бргу поставивме одбрана со десет ПП цистерни, 8 пинцгауери и еден воден топ на МВР за да не дозволиме огнот да помине преку патот, доколку дојде до него. Околу полноќ се искачив до линијата на огнот високо над патот и откако лично се уверив дека ветрот е поволен, горењето ослабнато и има услови за ноќно гаснење од земја, со мојот возач и 7 жители на Рогачево започнавме гаснење на огнената линија. Гаснењето се одвиваше во две фази, гаснење, контролирање и догаснување на изгаснатата линија. Некаде околу три часот по полноќ ја совладавме целата лева огнена линија во должина поголема од еден километар. Десната огнена линија беше далеку од нас и поради тешко пристапниот терен обраснат со густа вегетација полна со трње, не можевме да се пробиеме до неа. Во овој момент изгаснатата лева линија покажува жешки точки и знаци на разгорување поради што е активиран полицискиот хеликоптер кој со прецизно фрлање на вода дејствува точка по точка. Еден крак од пожарот се движи во насока на с. Дворце кон скопската страна“, велат од ДЗС.
Министерот Тошковски кој синоќа ја посети локацијата на пожарот, цела ноќ и утрово остана со нас. На лице место се наоѓаат пожарникари со навални возила од ТППЕ Тетово, Гостивар, Велес и Кавадарци како и локално население.
„Голема благодарност до сите кои деновиве помагаат да го ставиме под контрола овој тежок пожар. Посебно голема благодарност до седумчлената чета на Цветко Војвода од Рогачево со која успеавме да спасиме неколку хектари трева, грмушки и шума, гаснејки по исклучително тежок за движење терен, изложувакки се притоа и на определен ризик“, додаваат од ДЗС.